AtuartigukIkiaroornartut akiornissaannut angallannermut, imarsiornermullu suliassaqarfinni suliniutit nutaat
Nassiussisuuvoq: Ineqarnermut Attaveqaasersuutinuullu NaalakkersuisoqarfikIkiaroornartut atugaaleraluttuinnarnerat, ajornartorsiutaaleraluttuinnarnerallu Naalakkersuisut ilungersunangaatsiartutut isigaat. Tamanna pillugu angallannermut, imarsiornermullu suliassaqarfinni inatsisit nutarterneqarnissaat siunertaralugu Ineqarnermut Attaveqaasersuutinullu Naalakkersuisoq Hans Peter Poulsen Erhvervsministerimut, Transportministerimullu kaammattuuteqarpoq. Ineqarnermut Attaveqaasersuutinullu Naalakkersuisoq Hans Peter Poulsen ima oqarpoq:
”Kikkut tamarmik nunami, imaanilu isumannaatsumik angalasinnaanissaat uanni pingaaruteqarpoq. Tamanna pillugu ikiaroortillutik biilertut, angallammilluunniit aquttut tigusarisinnaanngorlugit, pineqaatissinneqarsinnaanngorlugillu inatsisit nutartissallugit pingaaruteqarpoq. Taassuma saniatigut Kalaallit Nunaata sineriaani angallatit amerligaluttuinnarput. Kalaallit Nunaata imartaani angallatit taamak ittut nakkutigisinnaanissaat, imaani angallannermi isumannaallisaanermut pingaaruteqarpoq.”
Taassuma saniatigut Kalaallit Nunaata imartaani angeqisumi, ilaatigullu inuilaajoqisumi angalasunik nakkutiginninnissamut periarfissat pitsaanerussasut, Erhvervsministerimut saaffiginnissuteqarnermi kissaatigineqarpoq. Matumani Kalaallit Nunaanni pissutsit malillugit pissuseqartoqarnissaa qulakkeerniarneqarpoq.
Allannguutissatut kissaatigineqartut Erhvervsministerip suliassaqarfiani qulakkeerneqassaaq, inuit ikiaroortillutik angallammik aquttut ima ikiaroorsimatigisut isumannaatsumik angallammik aqutsisinnaajunnaarsimasut politiit uppernarsartussaajunnaassammassuk. Taamaalilluni aak ikiaroornartoqartoq uppernarsarneqartillugu angallammik aqutsinissaq inerteqqutaalissaaq. Taassuma saniatigut allannguutit kingunerisaannik, Kalaallit Nunaata imartaani oqartussat umiarsuarnik nakkutiginninnissaminnut periarfissagissaarnerunissaat qulakkeerneqassaaq.
Transportministerip suliassaqarfiani allannguutit aamma qulakkiissavaat, inuk ikiaroortilluni biilertoq ima ikiaroorsimatigisoq isumannaatsumik biilersinnaajunnaarsimasoq politiit uppernarsartussaajunnaassammassuk. Tassani aak ikiaroornartoqartoq paasineqariartoq biilernissaq aamma inerteqqutaalissaaq.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl