Sinerissap qanittuani qaleralinniarnermi aqutsinissamut pilersaarut nutaaq

Naalakkersuisut Kalaallit Nunaanni sinerissap qanittuani aqutsinissamut pilersaarut siulleq decembarip 16-ianni 2024-mi akueraat, taanna januaarip aallaqqaataani 2025-mi atulissaaq.

Aqutsinissamik pilersaarummi anguniarneqarpoq aqutsinissamik pilersaarut aalajaatsoq inuiaat aningaasarsiornerinut tunngavigineqassasoq, piujuaannartitsineq tunngavigalugu Kalaallit Nunaata sineriaata qanittua tamaat siunissami qaleralinniarfiussalluni.

Sinerissap qanittuani qaleralinniarnermi aqutsinermut atatillugu TAC-mik aalajangersaanermut tunngatillugu aqutsinissamik pilersaarut naapertorlugu malittarisassaliortoqassaaq. TAC ataavartumik naleqqussarneqartassaaq, atuisut aamma aalisarnerup aqunneqarneranut akuliusimatinneqassallutik.

Tamakkiisumik isigalugu aqutsinermut pilersaarummi periuseq
nutaaq saqqummiunneqarpoq, tassani aqutsinermi iliuusissat soqutigisaqaqatigiit
qanimut oqaloqatiginerisigut aalajangerneqartarlutik. Tamatuma saniatigut aqutsinermut pilersaarummi sinerissap qanittuani qaleralinniarnerup aqunneqarnissaanut periusissat nassuiarneqarput. Piffissap qeqqanut naliliineq ilanngunneqarpoq, tamannalu Aalisarnermut Siunnersuisoqatigiit qanimut suleqatigalugit ingerlanneqassaaq.

Aqutsinissamut pilersaarut januaarip aallaqqaataa 2025-mi atuutilissaaq, aqutsinermut pilersaarut suleqatigiissitanit ukunannga suliarineqarpoq: Aalisarneq pillugu siunnersuisooqatigiit, taassuma ataani, Kalaallit Nunaanni Sulisitsisut, KNAPK, QAK, SQAPK, Halibut Greenland, Nunalerinermut, Imminut Pilersornermut, Nukissiuteqarnermut Avatangiisinullu Naalakkersuisoqarfik, Kalaallit Nunaanni Aalisarnermut Piniarnermullu Nakkutilliisoqarfik, Pinngortitaleriffik, Kommunit, Oceans North Kalaallit Nunaat, Royal Greenland A/S, aamma SFG. Aalisarnermut Piniarnermullu Naalakkersuisoqarfik ataqatigiissaarisuuvoq.

Aqutsinermut pilersaarusiorneq pillugu suleqatigiissitaq aqutsinissamut pilersaarut ukiuni marlunni kingullerni suliarisimavaat.

Aqutsinissamut pilersaarut Naalakkersuisut nittartagaani uani nassaarineqarsinnaavoq: Aqutsinissamik pilersaarutit.

Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl