2025-mut skattekorti

Akileraartarnermut Aqutsisoqarfiup ukiumut isertaqarfissamut skattekortit innuttaasunut sulisitsisunullu nassiuteqqammerpai.
Ukioq mannali innuttaasut tamarmik 2025-mut skattekortiminni allanngortoqarsimanera malugissavaat. Innuttaasut ilai skattekortiminni ataasiinnarmik allannguiffigineqarput, innuttaasulli allat skattekortiminni arlalinnik allannguiffigineqarlutik.
Allannguutit tunngaviusumik ukuupput:

Inummut ilanngaat qaffanneqarpoq

Innuttaasut tamarmik inummut ilanngaatip 48.000 kr.-nit 60.000 kr.-nut qaffannera misigissavaat. Tamanna akileraartarnermik aaqqissuusseqqinnerup ilagaa, maanna innuttaasuni tamani malugineqartussaq.

Tamatuma inummut ilanngaatip qaammammut 1.000 kr.-nik qaffannera kinguneraa. Tamatumalu innuttaasut ataasiakkaat siusinnerusumut sanilliullugu ukiumut 12.000 kr.-nik isertitaqarnerusinnaanerat kinguneraa.

Meeqqanut akilersuutit ilanngaatigineqarsinnaanerannut periarfissaq atorunnaarpoq
2025 aallarnerfigalugu aapparisamut meeqqanulluunniit akilersuutit ilanngaatigineqarsinnaajunnaassapput. Innuttaasut ilanngaatinik taamaattumik siumoortumik nalunaarsuisimatillugit, nalunaarsuineq taanna peerneqassaaq, skattekortimullu ilanngullugu naatsorsuunneqassanani. Taamaammat 2025-mut skattekortimi aapparisamut/meeqqanut akilersuutinut ilanngaatit ilaatinneqarunnaarput.

Innuttaasut ukiuni isertitaqarfinni siusinnerusuni ilanngaatinik taakkunannga atuisartut, 2025-mut skattekortiminni qaammammut ilanngaatigisamik ukiut siuliinut sanilliullugu minnerulersutut misigissagunarpaat.

Paaqqutarinninnersiutinut ilanngaateqarsinnaanermut periarfissaq atorunnaarpoq

1. januar 2025 aallarnerfigalugu paaqqutarinninnersiutit, tassanngaannartumik paaqqutarinninnersiutit qasuersaartitsillunilu paaqqutarinninnersiutitut A-tut isertitanngussapput. Tamatuma aningaasarsiat ilaannut attuumasunik ilanngaasiisinnaanermut periarfissat atorunnaarnerat malitsigaa.

Innuttaasoq ilanngaammik taamaattumik siusinaartumik nalunaarsuisimatillugu, nalunaarsuineq taanna peerneqassaaq, skattekortimullu ilanngullugu naatsorsuunneqassanani. Taamaammat 2025-mut skattekortimi paaqqutarinninnersiutinut ilanngaat ilaatinneqarunnaarpoq.

Innuttaasut ukiuni isertitaqarfinni siusinnerusuni ilanngaammik tassannga atuisartut, 2025-mut skattekortiminni qaammammut ilanngaatigisamik ukiut siuliinut sanilliullugu minnerulersutut misigissagunarpaat.

Aningaasarsialli 1. januar 2025 aallarnerfigalugu ilanngaatip akileraarusiinikkut nalinganik qaffanneqarput, tamatumalu ilaqutarsiat – aamma ilanngaasiisinnaanermut periarfissaq atorunnaareeraluartoq - akileraarutinut akileereerlutik siornatigutulli aningaasarsisarnerat kingunerissavaa.

Ilaqutarsiat tamarmik allannguineq pillugu kommunit aqqutigalugit ilisimatinneqarput.

Soraarnerussutisiassanut katersanut akiliinnginnerup kinguneranik akileraarummut akiliutit qaffanneri

Innuttaasut ilaasa akileraarummut procentip akiliutimit pisarnermit annertunerunera misigissavaat. Tamanna Akileraartarnermut Aqutsisoqarfiup paasissutissaatai malillugit innuttaasup ukiumi isertitaqarfiusumi 2023-mi siusinnerusumiluunniit soraarnerussutisiassanut aaqqissuussinermut akuerisamut innuttaasup isertitaata inatsisitigut aalajangersarneqartup ilaanik akiliisimannginneranik patsiseqarpoq.

Innuttaasutut soraarnerussutisiassanut katersinermut aaqqissuussamut naammattumik akiliisimanngikkaanni, tamatuma skattekortimi procentip akileraarutaa Akileraartarnermut Aqutsisoqarfiup qaffassavaa. Innuttaasoq sulisitsisumigut il.il. akileraarutinut ingerlaavartumik ilanngaanneqarnermigut aningaasanik amigaataanik akiliineranik tamanna kinguneqassaaq. Akileraartarnermut Aqutsisoqarfiup ajornanngippat aningaasat innutaasup soraarnerussutisianut katersivianut nassiunnissaat isumagissavaa. Taamaanngippat innuttaasoq sinnerlugu SISA-mi aaqqissuussaq pilersinneqassaaq.

Naak procenti akileraarutaasoq innuttaasumut annertunerugaluartoq, matumani innuttaasup akileraarutinut akiliisarnera pineqanngilaq. Innuttaasup ukiumi isertitaqarfiusumi 2023-mi ukiumiluunniit siusinnerusumi nammineerluni soraarnerussutisiaminut akiliisimannginnera pissutigalugu, innuttaasoq skattekorti aqqutigalugu taamaalioqquneqaannarpoq.

Akileraartarnermut Aqutsisoqarfik pissutissaqanngitsumik procentimik akileraarutaasumik qaffaasimasoq isumaqaraanni:

Inatsisit malillugit soraarnerussutisiassanut aaqqissuussivimmut aningaasat akilerneqartussaatitaasut akilerneqarsimanerat pissutigalugu, procentip akileraarutaasup qaffanneqarnera isumaqatiginngikkaanni, Akileraartarnermut Aqutsisoqarfiup paasissutissat nammineq pissarsiai kisiisa tunuliaqutaralugit, innuttaasup procentimik akileraarutissaanik qaffaasarnerata pisarnera erseqqissaatigissallugu pisariaqarpoq.

Akileraartarnermut Aqutsisoqarfik kukkusoq innuttaasoq isumaqaruni, innuttaasup piumasaqaatinik naammassinnissimanini aningaasanillu naammattumik soraarnerussutisianut katersivimmut akuerisamut akiliisimanerminik allakkatigut uppernarsaassaaq. Uppernarsaatit ukiumut aningaasarsiat allagartaanni innuttaasulluunniit soraarnerussutisiassanik katersiviani nassaarineqarsinnaapput.

Innuttaasup uku nassiullugillu uppernarsassavai:

1. Soraarnerussutisiassanut katersivimmut akiliutit innuttaasuminngaanneersut, assersuutigalugulu innuttaasup sulisitsisuanit innuttaasup aqqa atorlugu akiliutigineqartut
2. Akiliutit soraarnerussutisiassanut katersivimmut inatsisini ilaatinneqartumut pissaaq:
   • Nunatsinni; SISA, Grønlandsbanken aamma Bank Nordik (maanna Bankivik) Nuuk
   • Danmarkimi; soraarnerussutisiassanut katersiviit aamma pensionskarsit (taamaattoq aningaaseriviit ileqqaarnermik aaqqissuussaat minillugit), CS-Pensionsfond imaluunniit HKKF-fonde
3. Soraarnerussutisianut aaqqissuussivimmut ulloq akiliiffik
4. Ukiumut sumut innuttaasoq katersinersoq, aningaasallu akilerneqarpiartut, innuttaasup soraarnerussutisiassaminut akiligai

Innuttaasoq Akileraartarnermut Aqutsisoqarfiup allaffiinut uppernarsaatinik pappiaqqanik tunniussisinnaavoq imaluunniit allakkatigut Akileraartarnermut Aqutsisoqarfimmut nassiussilluni. Innuttaasup aamma paasissutissat e-mailimut pension@nanoq.gl nassiunnerisigut uppernarsaasinnaavoq.
Akileraartarnermut Aqutsisoqarfiup aningaaserivimmi kontonnit anisitat (ass. Netbankimit) soraarnerussutisiassanulluunniit akiliutit taakku tulliuttut ersippata uppernarsaatitut atorneqarsinnaanerat akueraa:

• akiliutit
• aningaasartat
• nassitsisoq
• tigusisoq
• ullorlu

Innuttaasoq uppernarsaatinik nassitsinermini ‘soraarnerussutisiassanut katersisussaatitaaneq’ sammisami allassimassaaq.

Soraarnerussutisiassanut nammineq akiliutissat amigarnerisa malitsigisaannik, akileraarummut akiliutaasa qaffanneqarnissaat innuttaasup qanoq ililluni pinngitsoortissinnaavaa?
Isertitap ilaa aalajangersimasoq inatsisitigut piumasaqaatigineqartoq soraarnerussutisiassanut katersinermut aaqqissuussamut akilersimanngikkaanni, innuttaasutut marlunnik iliortoqarsinnaavoq:
1. Procentip akileraarutigineqartup qaffanneratigut soraarnerussutisiassanut nammineq katersannut akiliineq. Akiliut taanna qaavatigut akileraarutaanngilaq kisiannili soraarnerussutisiassanut nammineq katersannut ikineqassapput. Sorlermut ikineqassanersut nammineq toqqarsinnaavat.
2. Nammineq soraarnerussutisiassanut katersivimmut aningaasat amigaataasut akilerlugit, tamannalu siuliani nassuiarneqartutut akiliisimaneq uppernarsarlugu.
Akileraartarnermut Aqutsisoqarfiup uppernarsaat tigullugulu akuerereerpagu, inuttaasoq skattekortimik nutaamik appasinnerusumik procentimik akileraarutinut akiliutissartalimmik pissarsissaaq.

Innuttaasoq 2024-mi soraarnerussutisiassanut katersivimmut akuerisamut ileqqaarnissaminik naammassinnissimanngippat, innuttaasoq 2025-mi skattekortimik qaffasinnerusumik procentimik akileraarutilimmik tigusissasoq, Akileraartarnermut Aqutsisoqarfiup erseqqissaatigissavaa.

Taamaammat innuttaasup ileqqaarnissamut pisussaaffimminnik atuuttumik – ukiumi isertitaqarfiusumi maanna atuuttumi tullermilu - naammassinnissimanerminnik qularnaarinissaannik, Akileraartarnermut Aqutsisoqarfiup kaammattuinnarumavai.

Naalakkersuisut 2025-mi soraarnerussutisiaqarnermut immikkoortumi aaqqissuusseqqinnissaat

Soraarnerussutisiaqarnissamut aaqqissuussinermik nalilersuineq ineqqammertoq kiisalu utoqqarnut periusissiami Attassiinnarnissamullu Ineriartortitsinissamullu Pilersaarut II-mi siunnerfiit aallaavigalugit, Naalakkersuisut isumaginninnikkut oqimaaqatigiittumik inuiaqatigiillu aningaasaqarneranni siunissamut isumannaakkamik, isumaqatigiissuteqartut 2025-p ingerlanerani isumaqatigiissuteqarfissatut siunniussaanni, politikikkut isumaqatigiissuteqarnissamut atugassatut, soraarnerussutisiaqartitsinermut ataatsimut siunnersuusiornissaat naatsorsuutigineqartoq, 2025-mut Aningaasanut inatsimmik isumaqatigiissummi aalajangersarneqarpoq.

Naalakkersuisut nunatsinni soraarnerussutisianik katersisussaatitaanermut tunngatillugu immikkoortut taakku misissussagaat tamatuma kinguneraa:

• Qallunaat ukiut inuuffigisassaat sinneruttunit kalaallit ukiut inuuffigisassaannut sinneruttunut ikaarsaarneq: Soraarnerussutisiat qallunaat ukiut inuuffigisassaat atornagit kalaallit ukiut inuuffigisassaat sinneruttut tunngavigineqarsinnaanerannik naliliineq.
• Soraarnerussutisianik akiliinermik eqaannerulersitsineq: Soraarnerussutisianut akilikkat ilaat amerlanerusut kittaartumik soraarnerussutisianut inissinneqarsinnaanerannik periarfissamik misissuineq.
• Ukiut ileqqaarfiusup allanngortinneri:
  o Qaqugukkut ileqqaartussaatitaanerup aallartittarnerani ukiorisanik qaffaaneq (ass. 18-nit 21-nut).
  o Ileqqaartussaatitaasup atorunnaarnerani ukiorisat appartinneqarnerat (ass. 63-init 61-inut).
• Akileraartarnermik aaqqissuussinermik nalimmassaaneq: Skattekortimi akileraarutinut procentimik soraarnerussutisiassanullu ileqqaagassanik procentinik takutitsisumik atulersitsineq.
• Soraarnerussutisiassanut katersorneqartussaatitaasut naammassinngitsuukkat pillugit nammineq piumassutsimik aaqqissuussinerit: Innuttaasup nammineerluni allaffissornikkut pisariitsumik soraarnerussutisiassaminut katersugassaminut akiitsuminik akiliisinnaaneranik periarfissanik misissuineq.

Suliniutit taakku soraarnerussutisiassanik aaqqissuussinermik piujuartitsinerusumut, nunatsinnilu pissutsinut nalimmassaanissamut siunnerfeqarput.

Apeqqutit:
Innuttaasutut sulisitsisutulluunniit siuliani allassimasunut apeqqutissaqarussi, tax@nanoq.gl imaluunniit oqarasuaatip normua 346510 atorlugu Akileraartarnermut Aqutsisoqarfimmut attaveqarsinnaaneq tikilluaqquneqarpusi.