Kalaallit Nunaanni Naligiissitaanermut Siunnersuisooqatigiinni 2025-2028-mut ilaasortanngortut

Piukkunneqartutut inassutigineqartut aallaavigalugit Kalaallit Nunaanni Naligiissitaanermut Siunnersuisooqatigiinni 2025-2028-mi ilaasortanngortussanik maannakkut Naalakkersuisut toqqaapput.

Kalaallit Nunaanni Naligiissitaanermut Siunnersuisooqatigiit suiaassutsit akornanni naligiissitaanikkut pisinnaatitaaffeqarlutik soqutigisaqarlutillu naligiissitaanerup siuarsarnissaa sulissutigaat aammalu suiaassutsit akornanni naligiissitaaneq pillugu paasissutissiisarlutik. Ilaatigut sammisaqarnertigut aammalu pisortat ingerlatsinerannut taakkunanilu sullissivinnut, suliffeqarfinnut namminersortunut inuiaqatigiinnilu ataasiakkaanut siunnersuisutut atuunnikkut, tamanna pisarpoq.

Kalaallit Nunaanni Naligiissitaanermut Siunnersuisooqatigiinnut ilaasortat piffissami 1. januar 2025 aallarnerfigalugu ukiunut sisamanut toqqarneqarput. Siunnersuisooqatigiit siulittaasoqarput aammalu allanik 6-inik ilaasortaqarlutik.

Naalakkersuisut Qillaq Olsen, Sipineq+-imit inassutigineqartoq, siulittaasutut toqqarpaat. Kalaallit Nunaanni Naligiissitaanermut Siunnersuisooqatigiinni ilaasortatut toqqarneqartut sinneri 6-it tassaapput:

• Britta Keldsen, Sulisitsisunit inassutigineqartoq
• Birte Olsen, Sipineq+-imit inassutigineqartoq
• Bonnie Jensen, IPS – Inuit Pisinnaatitaaffii Pillugit Kalaallit Nunaanni Siunnersuisooqatigiinnit inassutigineqartoq
• Kasper Berthelsen, IPS – Inuit Pisinnaatitaaffii Pillugit Kalaallit Nunaanni Siunnersuisooqatigiinnit inassutigineqartoq
• Emma Lennert, ICC – Inuit Circumpolar Council-imit inassutigineqartoq
• Jokum Zeeb, SIK-imit inassutigineqartoq

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq oqarpoq:
”Kalaallit Nunaanni Naligiissitaanermut Siunnersuisooqatigiit ukiut 25-t sinnerlugit suiaassutsit akornanni naligiissitaanerup siuarsarnissaa sulissutigaat. Aammalu ukioq manna siusinnerusukkut suliassaqarfimmi inatsisit, naligiissitaaneq assigiinngisitsinnginnissarlu pillugit inatsimmi nutaami, pisariaqartumik pitsanngorsarneqarput. Naligiissitaanermut siunnersuisooqatigiit nutaat angutit arnallu akornanni naligiinngitsunut tunngasunik ukkatarinninnertik ingerlatiinnassavaat aammalu naligiissitsilernissamut sulineq tapersersussallugu. Naligiissitaaneq inuiaqatigiit tamakkerlugit pitsaasunik sunniisarpoq. Taamaattumik nunarput tamakkerlugu iluaqutaasussamik, siunnersuisooqatigiinnik suliatigut nukittuunik piginnaasaqartunillu Naalakkersuisut pilersitsisimasut nalunaarutigisinnaagakku nuannaarutigaara. Kattuffiit, peqatigiiffiit suliffeqarfiillu, Kalaallit Nunaanni Naligiissitaanermut Siunnersuisooqatigiinnut ilaasortassanik inassuteqarsimasut, qutsavigaakka. Ilaasortanngortut pilluaqquakka. Aammalu siulittaasumut tunuartumut, Britta Kjeldsen-imut, sulisimaneranut qujanaq.”.

Pissusiviusut
Kalaallit Nunaanni Naligiissitaanermut Siunnersuisooqatigiit pillugit paasissutissat annertunerusut taassuma nittartagaanni< rel="noopener noreferrer"a href="https://nali.gl/" target="_blank"> https://nali.gl/ aamma Naligiissitaaneq assigiinngisitsinnginnissarlu pillugit Inatsisartut inatsisaat Inatsisartut inatsisaat nr 36, 04_06_2024-meersoq takukkit


Paasissutissanik annertunerusunik piniarnermi attaveqarfigineqassaaq Naalakkersuisup allattaa Jeanette L. Petersen, jalp@nanoq.gl, oqarasuaat: 34 52 06