Kalaallit Nunaat Mineral Security Partnership-imi (MSP) suliaqartuusutut qitiusutut malunnartitsivoq

Ulloq 20. november Kalaallit Nunaat aatsitassanik pisariaqartinneqarlutik piumaneqartunik ineriartortitsinissaq ukkataralugu MSP Forum-imi nunani aamma MSP-imi aaqqissuussinermik ingerlatsisuusuni, siullersaasutut, oqaluttuarisaanermi inissisimalerpoq.

MSP tassaavoq Mineral Security Partnership aammalu nunat, aatsitassanik pisariaqartinneqarlutik piumaneqartunik pilersuiffiusut aalajaatsuunissaannik qulakkeerinissamik sulissutiginnittut, akornanni suleqatigiiffiulluni.
MSP Forum-imi ilaasortatut aammalu aatsitassanik pisariaqartinneqarlutik piumaneqartunik nunatut avammut nioqquteqartartunngorsinnaasutut, Kalaallit Nunaat suleqatigiiffimmi immikkut inissisimalerpoq. Aatsitassanit pisariaqartinneqarlutik piumaneqartunit 50-iusunit 39-t, USA-mit suussusersineqarsimasut, Kalaallit Nunaanni nassaassaapput. Pissusiviusup taassuma aatsitassanik pisariaqartinneqarlutik piumaneqartunik nunarsuarmi pilersuiffiusuni aammalu mingutsitsinngitsumut allanngoriartortitsinermi periusissatigut suliaqartutut Kalaallit Nunaat pingaaruteqartunngortippaa.

Mingutsitsinngitsumik aaqqiissuteqarnissami suliaqartuusuni pingaaruteqartoq
Aatsitassarsiorfinnik ingerlatsinerup tunngavissinneratigut aammalu aatsitassanik pisariaqartinneqarlutik piumaneqartunik nunanut MSP-mi ilaasortaasunut avammut nioqquteqartarnikkut, nunarsuarmi mingutsitsinngitsumut allanngoriartortitsinermut tapersiinissaq, Naalakkersuisut aalajangiusimalluinnaraat, Naaja H. Nathanielsenip, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisup, erseqqissarpaa.

“One door”-imi periaatsitut taagorneqartukkoortumik ingerlanneqartumi pisinnaatitsissutit allaffissornikkut aqunneqarneranni Naalakkersuisut aatsitassarsiorfimmik ingerlatsinernut maleruagassiinerup oqinnerulersinnissaa siunnerfilimmik sulissutigaat. Periaatsimi pisariitsumi tassani suliffissuit aamma oqartussat sunniuteqarluartumik suleqatigiinnissaat qulakkeerneqarpoq.

“Aatsitassanik pisariaqartinneqarlutik piumaneqartunik ineriartortitsineq nunarsuarmi ataatsimoorluni suliassatut Naalakkersuisuni isigaarput, tassanilu Kalaallit Nunaat aalajangiisuulluinnartumi inissisimalersinnaavoq. Aatsitassanut pisariaqartinneqarlutik piumaneqartunut nunani tamalaani aningaasarsiorfinni siunissami suliaqartutut pingaaruteqarsinnaasutut aammalu pilersuiffiusut aalajaatsuunissaannik qulakkeeriniarluni suliaqarnermi suleqatissatut tutsuiginartutut Kalaallit Nunaata inissisimanera, ataatsimeersuarnermi uppernarsineqarpoq. Taamaattoq taamatut inissisimanermi annertoorujussuarnik aningaasaliinissaq pisariaqarpoq. Taamaattumik Kalaallit Nunaanni aningaasaliinissamut nunani tamalaani soqutiginninnerup siuarsarnissaanik ukkatarinninnerput Naalakkersuisuni ingerlatiinnarparput,”erseqqissaavoq Naalakkersuisoq, Naaja H. Nathanielsen.

Naalakkersuisup piffissaq iluatsillugu aatsitassanut suliassaqarfiup iluani Kalaallit Nunaata periusissatigut nukittuffii anguniaqarumaneralu erseqqissarpai. Ilaatigut 2025-2029-mut Namminersorlutik Oqartussat Aatsitassanut periusissiaa, akuerineqaruni, Kalaallit Nunaata aatsitassanik pisariaqartinneqarlutik piumaneqartunik nunat MSP-imi ilaasortat pilersornissaat suli annertunerusumik ukkataralugu Kalaallit Nunaata sulisinnaanera, qulakkeerneqartussaasoq oqaatigaa.

Ataatsimeersuarnerup Kalaallit Nunaat nunarsuarmi nunap assinganiilersippaa
Amerikami Nunanut allanut ministereqarfimmi aningaasaqarnikkut siuariartortitsinermut, nukissiuuteqarnermut avatangiisinullu amerikami atorfilittat, Jose W. Fernandez-ip sulisuisa, qaffasissumi inissisimasut, suliniuteqarnerisigut ataatsimeersuarneq piviusunngortinneqarpoq.
USA-p saniatigut Australien-imiit, Tuluit Nunaanniit aamma EU-Kommission-imiit peqataasoqarpoq. Tamatuma saniatigut namminersortut suliassaqarfiinit, aningaasaqarnermut sullissivinnit aallartitat aammalu Kalaallit Nunaanni ingerlatseqatigiiffiit pisinnaatitsissummik pigisaqartut arfineq pingasut ualikkut peqataapput.

Paasissutissanik annertunerusunik piniarnermi attaveqarfigineqassaaq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik, Email: asn@nanoq.gl Oqarasuaat: +299 34 50 00