AtuartigukNaalakkersuisoq: Angajoqqaat kalaallit Danmarkimi angajoqqaatut piginnaasanik suli misissuiffigineqartarnerat ingasappoq
Nassiussisuuvoq: Meeqqanut Inuusuttunullu Naalakkersuisoqarfik
Kalaallit kulturikkut oqaatsitigullu paasinninnerat eqqarsaatiginagit, angajoqqaat kalaallit angajoqqaatut piginnaasaannik silassorissusaannillu Danmarkimi kommuninit suli misissuiffigineqartarnerat assut ernumanarpoq, taama oqarpoq Meeqqanut Inuusuttunullu Naalakkersuisoq, Aqqaluaq B. Egede.
Danmarkimi meeqqat kalaallinik angajoqqaallit amerlangaatsiartut angerlarsimaffiup avataanut inissinneqartarnerannik Naalakkersuisut eqqumaffiginnipput.
Ajornartorsiut tamanna Danmarkimi kommunit, kalaallit kulturikkut oqaatsitigullu paasinnittariaasiat eqqarsaatiginagu, suli angajoqqaatut piginnaasanik misissuisartut ilaatigut angajoqqaanit ernumasunit, innuttaasunit tusagassiuutiniillu oqaatigineqarpoq.
Angajoqqaat kalaallit angajoqqaatut piginnaasaannik misissuiffigineqartarnerannut, tarnip pissusaanik ilisimasallit kalaallit aamma sulisut isumaginninnerup iluani ilinniagaqarsimasut Danmarkimi kalaallit illuinut atassutillit, atorneqartalernissaannut aallartitsinissamik, januaarimi ukiut marlunngussapput danskit oqartussaasui suliamut iliuuseqaqqullugit Naalakkersuisunit kaammattorneqarmata.
”Misissuinerit kalaallit innuttaasuinut naleqqussarneqarsimanngitsut ingerlanneqaraangata, ullumikkumut ilaqutariit kalaallit inuit pisinnaatitaaffiinit suli illersorneqartannginnerat ingasallunilu isumakulunnarpoq. Ilaqutariinnut kalaallinut toqqissisimananngitsupilussuuvoq. Kalaallit innuttaasut naalagaaffeqatigiinnermi naligiittut innuttaasuupput taamaammallu ilaqutariinni kalaallini angajoqqaatut piginnaasanik nalilersuinermi kalaallit kulturiat oqaasiilu ilanngunneqarnissaat pingaaruteqarpoq” Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede naqissusiivoq.
Taamaammat Naalakkersuisup sakkortuumik erseqqissaatigeqqinniarpaa, angajoqqaat piginnaasaannik misissuinerit ingerlanneqaraangata, inassut manna paatsoortoqarnissaanut aarlerinaatip annikillisinnissaanut ikiuutaasinnaasoq, peqatigitillugulu meeqqap pisariaqartitai pitsaanerpaamik isumagineqarsinnaassasut.
Attavissaq
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.