Atuartiguk
Naalakkersuisut nuna tamakkerlugu digitalinngortitsinermut periusissiaa 2024-28 piareerpoq.
Naalakkersuisunit tunngaviusumik tamat oqartussaaqataanerat pitsanngorsarniarneqarpoq, Kalaallit Nunaannilu innuttaasut tamarmik assigiimmik pisortaqarfinnut attaveqarsinnaanerat periarfissiissutiginiarneqarluni. Digitalimik ineriartorneq innuttaasunut suliffeqarfinnullu attaveqarneq sukkanerulersillugulu pitsaanerulersissinnaavaa, aammalu Kalaallit Nunaanni pisortaqarfiit akimorlugit pilertornerusumik pisariinnerusumillu suleqatigiittoqarsinnaalluni.
Naalakkersuisuni nuna tamakkerlugu digitalinngortitsinermik periusissiami ukua sammineqarput:
- Digitaaliseeriinermut tunngavissaq
- Paasissutissanut nittartakkatigullu sillimaniarneq pitsaaneq
- Paasissutissat
- Sullissivik.gl
- Digitalimik peqataatitsineq
Periusissiami sammisat naatsumik
Sammisaq ” Digitaaliseeriinermut tunngavissaq”-mi Kalaallit Nunaanni digitaliseeriinissamut sinaakkutissat aaqqissuussaanikkullu iliuusissat sammineqassapput, soorlu IT-qarnermi isumaqatigiissutit digitalimik aaqqissuussineq paasissutissanillu illersuinissamut inatsisit EU-mi GDPR-imut sanillersuunneqarsinnaasut sammineqassasut. Sammisami sunniutaasussat tassaapput paasissutissat pillugit nunani EU-niittuni suleqateqarniarneq pitsaanerusumik ingerlanneqalissasoq, IT-qarnermi isumaqatigiissutit assigiimmik aqunneqalissasut aammalu digitalimik aaqqiissutit ineriartortinneqassasut.
Kalaallit Nunaat nunarsuarmi digitalimik attaveqaatinut peqataaleraluttuinnarpoq, tamaattumik nittartakkatigut saassunneqarneq pinaveersaartinniarlugu paasissutissanillu sillimaniarnikkut ajutoortoqannginnissaa anguniarlugu Kalaallit Nunaanni nittartakkatigut paasissutissatigullu sillimaniarneq qaffasissumiittariaqarpoq. Sammisap iluani iliuuserineqartussani sunniutit tassaapput innuttaasut, suliffeqarfiit pisortaqarfiillu akornanni nittartakkatigut paasissutissatigullu sillimaniarneq eqqarsaatigalugu sillimaniarnerup qaffsinnerulernissaa ilisimasaqarnerulernissarlu.
Pisortaqarfiit suliffeqarfiillu sulineranni paasissutissat pinngitsoorneqarsinnaanngillat. Suleqatigiinnissamut tamanna tunngavissaalluarpoq, suliffeqarfinnilu paasinninneq aallaavigalugu ineriartorfissaqarpoq. Taamaattoqassappalli paasissutissanik pilersitsineq atuinerlu siunertaqartumik periusissiorluakkamillu ingerlanneqartariaqarpoq. Sammisap iluani iliuuserineqartussani sunniutit tassaapput paasissutissanik aaqqissuussamik periuseqartumillu atuinermi pisariillisaaneq pitsanngorsaaneq aammalu aalajangiinissamut tunngavissaqarneruneq.
Sullissivik.gl Kalaallit Nunaanni innuttaasut suliffeqarfiillu pisortaqarfiit digitalimik aaqqiissutaanik atuiniartillutik iserfigisartagaraat. Sullissivik.gl tunngaviusumik digitalimik attaveqaatigaarput, taannalu innuttaasut suliffeqarfiillu digitalimik naatsorsuutigisaannut Kalaallit Nunaannilu digitalimik ingerlatsinissamut piumasaqaatigisaannut nalimmassarneqaannaavittariaqarpoq. Sammisap iluani iliuuserineqartussani sunniutit tassaapput innuttaasunut suliffeqarfinnullu digitalimik aaqqiissutit piffissamut naleqquttut, pitsaasut atoruminartullu.
Kalaallit Nunaata digitaliunerunissaanut anguniagaqarnermi, digitalimik aaqqiissutinik pioreersunik ineriartortitseqqinninnerni ataqatigiissaakkamik digitalimik peqataatitsinissaq qulakkeerniarneqartariaqarpoq. Sammisap iluani iliuuserineqartussani sunniutit tassaapput innuttaasut suliffeqarfiillu tamakkerlutik nuna tamakkerlugu digitalimik aaqqiissutinik atuisinnaanissaannik qulakkeerinninniarneq.
Uani atuaruk: www.digitalimik.gl
Sukumiinerusumik paasisaqarusuttunut attavissaq Digitalinngortitsinermut Aqutsisoqarfimmi e-mail: digitalisering@nanoq.gl