AtuartigukSchweiz-imi Bern-imi Kalaallit Nunaat pillugu saqqummersitsineq
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Schweiz-imi Bern-imi Katersugaasiviup ALPS-ip Kalaallit Nunaat pillugu saqqummersitsinissaq piffissami sivisuumi piareersarsimavaa. Saqqummersitsineq ulloq 24. oktober 2024 ammassaaq. Bern-imi Katersugaasiviup ALPS-ip sumiiffinni qaqqartuuni inuuneq ulluinnarni ukkataraa. Matumani Kalaallit Nunaanni inuuneq pillugu katersugaasivik saqqummersitsisussanngorpoq. Saqqummersitsinermi init assigiinngitsut arfineq-marluupput, nipinik takusassanillu imaqartinneqarlutik. Init tamarmik immikkut qulequtaqartinneqarput, assersuutigalugu aatsitassat imaluunniit nipilersorneq aamma kulturi.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, saqqummersitsinissamut apersorneqarpoq. Naalakkersuisup apersorneqarnerani qulequttat ilaatigut tassaapput Kalaallit Nunaanni nunap sannaani aatsitassat, taakkualu piiarneqartarnerat, nunarsuarmiit isigalugu. Saqqummersitsineq assersuutigalugu aamma nunap sannaanut aamma qaqqat sisoortarnerannik pitsaaliuinermut tunngassuteqarpoq, qulequtaq taanna Schweiz-imiut qaqqat sisoortarnerannik nammineerlutik misilittagaannut qanittuaraavoq.
Takusaasut Kalaallit Nunaanni inuit sumiiffinnit assigiinngitsuneersut videuliarineqarnerat misigisinnaavaat. Jonas Kristensen, piniartoq Kullorsuarmeersoq aamma rappertartoq kulturikkullu malunnaatilik, Kim Jakobsen, amerlanernit Kimojax-itut ilisimaneqarnerusoq, inuppassuit saqqummersitsinermi videunik takusassiaatigut takuneqarsinnaasut tusaaneqarsinnaasullu ilagaat. Apersorneqartut immiunneqarneri tamarmik tyskisut, franskisut tuluttullu allagartalersugaapput.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, oqarpoq: ”Katersugaasiviup Schweiz-imi Katersugaasivittut ALPS-itut ittup Kalaallit Nunaannut Kalaallillu Nunaanni pissutsinut inuuniarnermilu atukkanut ammasumik soqutiginninnerminik alapernaasernerminillu ammasumik takutitsinera pingaartippara. Aatsitassat aamma Kalaallit Nunaanni nunap ilua pillugit apeqqutini pingaarutilinni Kalaallit Nunaata isiginninnera ilanngussinnaagakku nuannaarutigaara. Aamma nunatsinni sumiiffinnit arlalinnit nipit arlallit assigiinngitsut tusaaneqarsinnaallutik takuneqarsinnaallutillu, Kalaallit Nunaat pillugu saqqummersitsinermut taperseeqataalluni nuannerpoq. Neriuutigaara amerlasuut aggerlutik saqqummersitsineq takussagaat.”
Københavnimi Kalaallit Nunaata Sinniisoqarfianut pisortaq, Jens Heinrich, Kalaallit Nunaanniit peqataatillugu saqqummersitsineq ammarneqassaaq. Isiginnaartitsisartoq, Aka Niviâna Mørch, aamma nipilersortartoq, Inunnguaq Petrussen, aamma saqqummersitsinerup ammarneqarnerani peqataassapput. Bern-imi Katersugaasiviup ALPS-ip saqqummersitsineq takusarlugu amerlasuut takusaanissaat naatsorsuutigaa.
Attaveqarfissaq: Naalakkersuisoqarfimmi pisortaaneq Jørgen T. Hammeken-Holm, joeh@nanoq.gl, +299 34 68 46 imaluunniit
Københavnimi Kalaallit Nunaata Sinniisoqarfiani pisortaq, Jens Heinrich, jehe@ghsdk.dk, +45 31 16 66 14.
Assiliisoq Gian Suhner, ALPS Museum Bern: Akitsinnguaq Olsen, Kullorsuaq.