Umiatsiaararsortut 500-rujunit amerlanerusut PNNP-mut ikaarsaarnissartik kissaatigaat

Aalisarnermut inatsit nutaaq aqutsiveqarfimmi 47-mi Uummannami, Upernavimmi aamma Qeqertarsuup Tunuani umiatsiaararsortunut periarfissiivoq, kissaatigigunikku qaleralinnik paggatassanik aalisartut PNNP tunngavigalugu, qaleralinnik pisassiissutinik niuerutigineqarsinnaasunik nammineq pigisanik aalisalersinnaassasut.

PNNP tunngavigalugu januaarip aallaqqaataanit 2025-mi aalisalernissamut qinnuteqarfissaq oktobarip 15-iannut killeqarpoq. Aalisarnermut Piniarnermullu Naalakkersuisoqarfik PNNP tunngavigalugu januaarip aallaqqaataanit aalisalerusullutik soqutiginnillutik qinnuteqaatinik 509-nik tigusaqarsimavoq. 3. Taakku aqutsiveqarfik 47-mi 2023-mi aalisartut katillugit 42 %-teraat.

Qinnuteqaatinik suliarinninneq maannakkut aallartinneqarpoq. Tamannalu peqqutigalugu aalisartut ataasiakkaarlutik tamarmik pisassiissutinut pigisanut missingiummik naatsorsuutitalimmik tusarniummik tigusaqassapput. Pisassiissutinit pigisassat ukiuni tallimanit ukiut pingasut aalisarluarfigineqarnerpaat tunngavigalugit pisassiissutaassapput, ukiuni aalisarfiusuni 2019-imit 2023-mut.Tamatuma kingunerisaanik pisat uumatillugit tamakkiisumik oqimaassusaat aqutsiveqarfik 47-mi aalisartunit tamanit pisaasimasut inernera kisitsinermi aallaaviuvoq. Naatsorsuinerup tamatuma qulaani taaneqartutut pisassanit pisassiissutissap inernerivaa. Ukiuni kingullerni tallimaasuni ukioq ataaseq taamaallaat imaluunniit ukiuni marlunni aalisartoq aalisarsimappat, pisassiissutinit pigisassatut naatsorsuut naleqqiullugu annikillilerneqassaaq.

Pisassiissutit pigisat naatsorsorneqareeraangata 2025-mut pisassat naatsorsorneqarsinnaalissapput. Pisassat aalajangerneqartarput pisassiissutit pigisassat tunngavigalugit, aamma 2025-mut TAC-ip aalajangerneqarnera tunngavigalugu. 2025-mut pisassanut missingiussaq allakkani takuneqarsinnaassaaq taassumalu 2025-mut TAC-mut naatsorsuutigineqartoq aallaavigissavaa.

Ukiumut pisassiissutit ukiumiit ukiumut pisassiissutissat tamakkiisut (TAC) amerlassusilerneqarneranik aallaaveqartumik allannguuteqartarsinnaavoq. Pisassiissutinit pigisassaq tunniunneqartoq allanngorsinnaavoq nammineerluni pisassiissutinik pigisanikkut imaluunniit tunisinikkut.

Naatsorsuinermut maalaaruteqarnissamut qinnuteqartut tamarmik qaammammik ataatsimik periarfissinneqassapput. Naalakkersuisoqarfik maalaarummik kingusinnerpaamik ulloq 25. November 2024 tigusaqarsimanngikkuni naatsorsuineq allaaserineqartoq atorneqassaaq, qinnuteqaallu tunngaviusut taakku aallaavigalugit suliarineqassalluni.

Ulloq 25. novemberip kingorna inaarutaasumik naatsorsuinerit suliarineqassapput qinnuteqarsimasullu tamarmik aalisarsinnaanermut akuersissummik ukioq 2025-mut inaarutaasumik pisassiissutinit pigisat pisassallu annertussusissaannik tigusaqassapput. Tassa imatut paasillugu inaarutaasumik pisassiissutinit pigisat aatsaat ulloq 25. Novemberi 2024-p kingorna pineqassammat.

Ukioq manna oktobarip 15-iat 2024 nallertinnagu qinnuteqarnissaq angumerisimanngikkaanni aappaagu oktobarip 15-iat nallertinnagu qinnuteqartoqarsinnaavoq, taamaalilluni PNNP tunngavigalugu januaarip aallaqqaataanit 2026-mi aalisartoqarsinnaalissalluni.