Quppernerup imarisaanut ingerlaqqigit
Oqaaseq toqqaruk

Kalaallisut ( Toqqarneqarpoq )

Qallunaatut

🔈 Atuartiguk

Sikorsuaqarnerata malitsigisaanik Kujataani ikiorsiissuteqartoqassanngilaq

Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik

Immikkut illuinnartumik sikorsuaqarnerata malitsigisaanik Kujataani ikiorsiissutissat pillugit Aningaasaqarnermut ataatsimiititaliap aalajangiinera, Naalakkersuisut ullumikkut tiguaat. Aningaasaqarnermut Ataatsimiititaliami amerlanerussuteqartut qinnuteqaat itigartippaat.

Kujataani pilersaarutaasumik ingerlatassat sikorsuaqarneratigut ingerlanneqarsinnaasimanngimmata, ingerlatsisut kaaviiaartitatigut appariaateqarnerinut ikiorsiissutissat taartitut ikiorsiissutigineqartussaagaluarput.

Aalajangiineq Inuutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisumit Naaja H. Nathanielsenimit isornartorsiorneqarpoq, ima oqaaseqartumit:

”Aningaasaqarnermut ataatsimiititaliap itigartitsineranut pakatsillungalu paasisinnaanngilara. Piffissami inuussutissarsiutit ineriartortinneqarnissaannut pisariaqartumi siumut ilimagineqarsinnaanngitsup, ajornakusoortullu iliuuseqarfigineqarnissaannut Kujataani inuussutissarsiutillit ikiorusunneqannginnerat annertuumik eqqarsarnartoqartippara. Inuussutissarsiutit eqqorneqartut ikiorneqarnissaannut periarfissat Naalakkersuisut aasarli pimoorussillutik misissugarilerpaat, isumaqarpungalu siornatigut pisuni ajornakusoortuni politikerit tungaanniit ikiuisimanitsitut ikiuissasugut inuussutissarsiutillit tupinnanngitsumik ilimagisimassagaluaraat. Aningaasaqarnermut ataatsimiititaliap itigartitsinini tunngavilersunngilaa. Isumaqarpunga, ikiorsiissutissanut patsisaasoq, piareersarneqarneralu eqqarsaatigalugit suliaq peqqissaarullugu, tunngavilersorluarlugulu suliaasimasoq.”

  • Ingerlatsisunit eqqugaasunit saaffiginnissutit siulliit Naalakkersuisut juulip aallartinnerani tiguaat
  • Kujataani ingerlatsisunut aningaasatigut ikiorsiissutissat pillugit Naalakkersuisut isummernissaannut tunngavissiaq Naalakkersuisut 2024-mi aggustip 9-ni akuersissutigaat
  • Naalakkersuisut isummernissamut tunngavissiaq Aningaasaqarnermut Ataatsimiititaliamut aggustip 23-ani nassiuppaat
  • Isummernissamut tunngavissiamut apeqqutit kiisalu Aningaasaqarnermut Ataatsimiititaliap septembarip pingajuani aalajangiinerata kingunerisaanik malittarisassanik noqqaassut Naalakkersuisut septembarip 12-iani tiguaat
  • Apeqqutinut akissutit, malittarisassiallu Naalakkersuisut septembarip 26-ani nassiuppaat
  • 2024-mi oktobarip 10-ani Aningaasaqarnermut Ataatsimiititaliap isummernissamut tunngavissiaq itigartippaat

Annertunerusumik paasisaqarusunnermi naalakkersuisumut allatsi Jeanette L. Petersen, oqarasuaammut 34 52 06-imut imaluunniit mailimut isiin@nanoq.gl-imut attavigineqassaaq