AtuartigukNiviarsiaqqat siunissamut takorluugaqarnerat
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Niviarsiaqqap Ullua iluatsillugu niviarsiaqqat aamma arnat inuusuttut taakkualu inuuniarnerminni atugarisaat immikkut ukkataraagut.
Niviarsiaqqat arnallu inuusuttut isumannaatsumik, toqqissisimanartumik, peqqinnartumik kiffaanngissuseqarlutillu toqqaasinnaasut ersarilluinnaraluartoq, maani nunatsinni imaluunniit nunarsuarmi tamaaginnartanngilaq. Tamatuma iluarsinissaa pisussaaffigaarput.
Naligiissitaanermut Naalakkersuisoq, Naaja H. Nathanielsen, oqarpoq:
Nammineq timimut, angerlarsimaffimmi toqqissisimanissamut aammalu suiiaassuseq malillugu isumalluarfigineqannginnissamut pisinnaatitaaffeqarneq, nunatsinni niviarsiaqqat arnallu inuusuttut ulluinnarisariaqaraluarpaat, kisianni ajoraluartumik taamaanngilaq. Tamatuma kingunerisaanik niviarsiaqqat pineqartut periarfissaminnik killilersorneqartarput akimmisaartinneqartarlutillu. Tamanna inuiaqatigiit tamarmiusut annaasaqarfigaat. Takorluugaqarnerit anguniagaqarumanerillu isumalluarnerni mattunneqarunik ineriartorsinnaajunnaassapput. Tamanna Naalakkersuisut suliffeqarnerup suiaassutsinut aggulugaajunnaarsinnissaanik suliaqarneranni pingaarutilittut eqqarsartaatsit ilagaat aammalu arnat aallarnisaasut amerlanerulersinnissaannik anguniagaqarnermut tunngaviulluni.
Kialuunniit takorluukkani kisimiilluni angusinnaanngilai. Suliffeqarnerup suiaassutsinut aggulugaasup sulissutigineqarnerata saniatigut, niviarsiaqqat aqutsisutut atorfininnissamut periarfissaannik qulakkeerinissaq, aammalu pisortat missingersuutaanni niviarsiaqqat nukappiaqqatuullu annertutigisumik iluaquserneqartarnissaat, Naalakkersuisut aamma sulissutigaat. Siunnerfigineqarpoq inuiaqatigiinni kikkut tamarmik suiaassuseq apeqqutaatinnagu imminnut naligiillutik peqataanissamut periarfissaqassasut.
Paasissutissanik annertunerusunik piniarnermi attaveqarfigineqassaaq Naalakkersuisup allattaa Jeanette L. Petersen, jalp@nanoq.gl, tlf.: 34 52 06.
Anigorniagassat niviarsiaqqat nalaattagaat ukkatarineqarnissaannut aammalu niviarsiaqqat piginnaatinneqarnerulernissaannut, taakkualu inuttut pisinnaatitaaffiisa naammassineqarnissaannut, Niviarsiaqqap Ullua 2011-miilli ukiut tamaasa ulloq 11. oktober malunnartinneqartarpoq. Ukioq manna Naalagaaffiit Peqatigiinnit qulequtaritinneqarpoq ”Niviarsiaqqat Siunissamut Takorluugaqarnerat”
1995-mi Arnat pillugit nunarsuarmi ataatsimeersuarnermi Beijing-imi ingerlanneqartumi, ”Beijing-imi nalunaarut aamma iliuusissanut pilersaarut” arnat niviarsiaqqallu pisinnaatitaaffiisa siuarsarnissaannut pilersaarut aatsaat taama siuarsaarusussuseqartigisoq, nunat Naalagaaffinnut Peqatigiinnut ilaasortaasut akueraat. Beijing-imi nalunaarut, nalunaarutit niviarsiaqqat pisinnaatitaaffiinik immikkuullarissumik erseqqissaaviusut siullersaraat. “