2024-ip ukiaanerani covid 19-imut nualluummullu nalinginnaasumut (influenza) akissussutissiineq

Ukiarsarpoq ukiorlu qalliartuaalerpoq nualluutip influenzap covid-19-illu tuniluunnerulernissaasa naatsorsuutigineqarsinnaalerfiat. Influenzamut covid-19-imullu akiuussutissinneqarnikkut peruluutigisinnaanerat annikillissaaq. Tamaammat 65-ileereersimasut inuillu taakkunannga peruluuteqarsinnaasut covid-19-imut influenzamullu akiuussutissinneqarnissaat Nunatsinni Nakorsaaneqarfimmit innersuussutaavoq. 

Amerlanerpaat covid-19 influenzalu sakkukitsimik atussavaat, Inuilli ilaannut influenza aamma covid-19 perulutsitsisinnaapput, napparsimmavimmut uninnermik kinguneqarsinnaallutik ajornarpaaffimminnilu inuunermut navianartorsiortitsisinnaallutik.

Kikkut covid-19-imut influenzamullu akiuussutissinneqarnissamut neqeroorfigineqarpat?

• 65-ileereersimasut 
• 65-iliisimanngitsut, peruluuteqarsinnaasut (ataaniittoq takuuk)
• Naartunerup pingasunut avinnerisa aappaani pingajuannilu naartusut 

Akiuussutissinneqarnissamik neqeroorfigineqarnissamut kingusinnerpaamik 2025-imi januaarip 15-ianni 65-ileereersimanissaq- tassalu 1960-imi januaarip ulluisa 15-ianni tamatumaluunniit siorna inunngorsimanissaq piumasaqaataavoq.

65-iliisimanngitsut peruluuteqarsinnaasut tassaapput:

Anigigassaanngitsunik nappaatillit

• KOL-imik nappaateqartut, ASTMA-rtut imal. allamik anigugassaanngitsumik pualluuteqartut.
• Type 1 imal. type 2 diabetesimik nappaateqartut.
• Uummalluttut, uumatip taqaasa nerukillisimanerannik allamilluunniit uumatikkut taqqatigullu nappaatillit (aap taqqanut naqitsinerata qaffasinneranut taannalu kisiat nappaatigalugu nakorsarluakkat ilanngunnagit).
• Kræftimik nappaateqartut.
• Naamikkut imal. tingummikkut tartumikkulluunniit nappaateqartut.
• Gigtimik nappaateqartut (naggussat nungullarsimanerannik patsiseqanngitsut).
• Sianiuteqarfitsigut nappateqartut.
• Inunnguutsimik kingornaluunniit- nappaatinut akiuussinnaasusaat annikitsut 
• Nukiit sanngiillisimanerannik patsiseqartumik anersaartorniarnerat sunnerneqasimasoq.
• Allanik anigugassaanngitsunik nappaateqartut, nalinginnaasumik nuallunnikkut imal. covid-19-imik tunillatsinnikkut perululersinnaasut.

Nappaatit allallu

• Inuit pualavallaat (BMI-at 35 sinneqartoq) 
• Inuit allanik navianaatilinnik nappaateqartut, influenza covid 19-iluunniit peqqissusaannut navianartorsiortitsisinnaappat.
• Inunnut inunnguutsiminnik imal. kingorna nappaatinut akiuussinnaassusaat annikillisimasunut inoqutaasut imal. meeqqat nualluummik imal. covid 19-imik peruluuteqarsinnaanermut aarlerinartorsiortut.

Peqqinnissaqarfimmit immikkut aarlerinartorsiorsinnaasunik akiuussutissiinissamut aggersaasoqassanngilaq. Innuttaasut neqeroorfigineqartut namminneq najukkaminni piffissami akiuussutissiiviusussami saaffiginnittussaassapput. Piffissamik inniminniisoqaqqaatariaqanngilaq. Neqeroorfigisanut ilaaneq nalornissutaappat napparsimmavigisamut/peqqissaavimmut saaffiginnittoqarsinnaavoq. 

Akiuussutissat suut neqeroorutaassappat?

• Covid-19: Covid-19-ip allannguutaanut naapertuussagaq mRNA-akiuussutissaq BioNTech/Pfizer-imeersoq neqeroorutaassaaq.
  
  
• Influenza: Akiuussutissaq nualluummullu nalinginnaasumut 2024/2025 ukiami ukiumilu allannguutinik immikkoortunillu atugaanerusussatut naatsorsuutigisanik akulik neqeroorutaassaaq. 

Sumi qaquguli akiuussutissiisoqassava?
Nunarput akimorlugu illoqarfinni tamani akiuussutissiisoqassaaq pingasunngornermi oktobarip ulluisa 16-ianni pingasunngornermilu oktobarip ulluisa 23-ianni 2024 Takussutissiaq ataaniittoq takuuk. 

Nunaqarfinni innuttaasut Peqqinnissaqarfiup najukkani angalanissanut pilersaarutai naapertorlugit akiuussutissinneqarnissamik neqeroorfigineqassapput.

Paasissutissat sukumiinerusut nunatta nakorsaaneranutt Paneeraq Noahsenimut mailikkut: nun@nanoq.gl imal. Oqarasuaatikkut: 34 51 92 attaveqarnikkut pissarsiarineqarsinnaapput.