PNNP soqutigineqarluarpoq

Aalisarnermut Piniarnermullu Naalakkersuisoqarfimmeersut PNNP, pisassiissutit niuerutigineqarsinnaasut nammineq pigisat, pillugit aqutsiveqarfik 47-mi Upernavimmi, taassumalu nunaqarfiisa ilaanni umiatsiaarsortunut maannakkut paasititsiniaallutik ataatsimiitsitsisarlutik angalapput. Tamaanilu paasititsiniaanertik naammasseqqammerpaat. Tikitaat tassaallutik Nuussuaq, Kullorsuaq, Upernavik aamma Upernavik Kujalleq.

Umiatsiaararsortut PNNP pillugu soqutiginnittorujussuupput. Taanna tunngavigalugu aalisalerunik sunik nassataqarlunilu kinguneqarsinnaanersoq paaserusuttorujussuaat. PNNP pillugu saqqummiussisoqareeraangat soqutiginnillutik apersuisartorujussuupput.

“PNNP, pisassiissutit niuerutigineqarsinnaasut nammineq pigisat, tunngavigalugit aalisareersimatilluni qaleralinnik paggatassanik aalisartoqalersinnaava, PNNP-mik piginnittoq qaleralinnik tulaassinermi ilaasariaqarpa aamma CVR-iuna qanoq atorneqartussaq”, tassaapput umiatsiaararsortut Aalisarnermut Piniarnermullu Naalakkersuisoqarfimmi sulisunut paasititsiniaalluni ataatsimiinnerni ilaatigut apeqqutigisartagaasa ilaat.

PNNP-ilu pillugu nalornisimasut paasitinneqarlutik misigisimasarput.

Aalisarnermut Piniarnermullu Naalakkersuisoq Kim Kielsen aamma Aalisarnermut Piniarnermullu Naalakkersuisoqarfimmi sulisut Uummannamiittareerput PNNP pillugu paasititsiniaallutik.
Aalisarnermut atortunik Polar Expomik Ilulissani oktobarip 8-annit 10-annut saqqummersitsisoqalerpat Aalisarnermut Piniarnermullu Naalakkersuisoqarfik peqataatitaqassaaq. Aalisartut PNNP pillugu annerusumik paasisaqarusuttut paasiniaanissaminnut periarfissaqassapput.

Aqutsiveqarfimmi 47-mi Upernavimmi, Uummannami aamma Qeqertarsuup Tunuani umiatsiaararsortut PNNP-mik qinnuteqarfissaq Sullissivik.gl-imiittoq; Aqutsiveqarfik 47-mi; Upernavik; Uummannaq aamma Qeqertarsuup Tunuani umiatsiaararsorluni PNNP-mik qinnuteqaat, atuarsinnaavaat imaluunniit Naalakkersuisoqarfik ugguuna attavigisinnaavaat: aalisa@nanoq.gl

Kinaluunniit umiatsiaaqqamik aalisartoq qaleralinniarnissamut aqutsiveqarfimmi 47-mi, Upernavimmi, Uummannami aamma Qeqertarsuup Tunuani aalisarnissamut akuersissuteqartoq PNNP tunngavigalugu januaarip aallaqqaataani 2025-mi aalisalersinnaavoq. PNNP-mik aalisalernissaq nammineerluni qinigassaavoq, taannalu ukiut tamaasa januaarip aallaqqaataanit aalisalernissamut qinnutigineqarsinnaalluni. PNNP tunngavigalugu januaarip aallaqqaataanit 2025-mi aalisalernissamut qinnuteqarfissaq ulloq kingulleq tassaavoq oktobarip 15-iat 2024. Paasissutissanik amerlanerusunik perusukkuit uunga allassinnaavutit: apn@nanoq.gl