Ilinniartitsisoq, atuarfiup pisortaa soraarneq, nipilersortartoq politikkerilu, Leo Rosing akornatsinniikkunnaarpoq

Leo Rosing, kulturikkut anersaakkullu Nunatsinni, qularnanngitsumillu Nunatta avataani annertuumik sunniuteqaqataalluareerluni 72-nik ukioqarluni septembarip 29-iani 2024 toqukkut qimaguppoq.

Leo Rosing inuuvoq ilakkuminartoq, imminut salliutinngitsoq pingaarnerunianngitsorlu, ajunngitsussaq pillugu anguniakkat iliuusissallu tungaatigut inuiaqatigiinni nunaqqatiminullu kiffartuussisoq ataatsimoortitsisorlu.

Aammali tassaasimavoq pissutsinut allanngujaassorisanut akuersaaginnanngitsoq, ilaatigut erinniaatigut taalliaatigullu tamanna ersertarpoq. Aammattaaq Aasiviit aallartisarneranni ineriartortinneqarneranilu peqataalluartut tinnersaaqataalluartullu ilagisimavaat.

Inoqatimi akornanni ataqqineqartuuvoq, inuuvorlu saamasoq, illarumatooq nuannersussarsiortorlu.

Atuarfimmi pisortaasimasoq politikeriusimasorlu Leo Rosing politikikkut suliaqarnermini piffissaq kingulleq naapeqatigiissutissat pingaarnerutillugit suleqataasarsimavoq, politikkikkut sammivik suunersoq pingaarnerutinnagu, kimillu saqqummiunneqarnera apeqqutaatinnagu tapersersuisoq aqqutissiuusserusuttorlu.

Nipilersornikkut aamma taalliortutut erinniortutullu piginnaaneqarluartuuvoq, piginnaanini massa motorilerisutut ilinniartuunermi nalaani assami illua innarleraluartoq aporfiginagu takutittuarsimavaa kingornalumi aamma ilinniartitsisutut naammassilluni, ukiorpassuarnilu ilinniartitsisutut atorfeqarluni.

Leo Ilaquttaminut, kinguaaminut ikinngutiminullu asannittuuvoq qanilaartuullunilu, tamannalumi ilaatigut ersersinneqarpoq saqqummersitaminik nuannarineqarluartumik puigunaatsumillu qimatsivigimmasigut tassaasumik ”Soraluannguit”. Erinnap taassuma ataatsimuualaarnerni atorneqaraangami pilluarnermik ataqatigiinnermillu misigisitsisarnera qaqugumorsuaq Leop anersaavanik uatsinnut Leomut nuannarinnittuusunut eqqaasitsiuartassaaq.

Leop ilaqutanngui qanigisaalu misiginneqatigingaarlugit ulluni artornartuni nukissanik eqqissinermillu kissaappagut.

Leop eqqaaneqarnera ataqqinartuuli.

Saniatigut paasissutissartai:
• 1981 ilinniartitsisunngorpoq
• 1987 Ilinniartitsisuuneq
• 1989-2008 Aasianni kommunalbestyrelsemi ilaasortaavoq
• 1996 Atuarfiup Pisortaa (Ado Lyngep Atuarfia)
• 2016-imi soraarninngorpoq.
• Nipilersornikkut ilaatigut saqqummersitseqataaffigai: Aasivik 77, Qangattarsa qangattarsartigut, FAM.