Greenland Ruby A/S akiliisinnaajunnaartutut nalunaarutigineqarpoq

Ulloq 24. september 2024, Greenland Ruby A/S akiliisinnaajunnaartutut nalunaarutigineqarpoq. Ingerlatseqatigiiffimmi aqutsisut akiliisarnerminnik unitsitsillutik sivisuumik suliffeqarfik annaanniarsarigaluarpaat, kisianni tamanna ajoraluartumik ajornarsimavoq.

Naalakkersuisut ineriartornera pillugu ingerlaavartumik ilisimatinneqartarsimapput, aammalu pisumi tassami maleruagassat atugassarititaasullu tamarmik naammassiniarneqarnissaat Naalakkersuisut pingaartippaat.

Naaja Nathanielsen, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq oqarpoq:

“Akiliisinnaajunnaarluni nalunaaruteqarneq taanna tupaallannartutut saqqumminngilaq. Piffissami sivisunerusumi Greenland Ruby A/S-imut tunngatillugu ingerlatat annikilliartuaartinneqarsimapput, kisianni neriuutigineqarsimagaluarpoq Qeqertarsuatsiaat eqqaanni rubininik piiaanermut attanneqarsinnaasumik siunissamillu qulakkeerisumik allatut Greenland Ruby A/S aaqqiissutissarsisinnaassasoq. Aaqqiissutissap sulissutigineqarnera maannakkut immikkoortup tullianut ikaarsaarpoq, tassani maannakkut akiliisinnaajunnaarnermi pigisanut isumaginnittussat eqqartuussissuserisut toqqarneqarlutik, aammalu Namminersorlutik Oqartussat pisumi tassani pitsaanerpaanik aaqqiissutissarsiniarnissaq pillugu qanimut oqaloqateqarneq ingerlatiinnassallugu.
Pisumi tassani ingerlatseqatigiiffimmi nalillit sinneruttut qulakkeerneqarnissaat, ilanngullugulu ingerlatseqatigiiffiup nunatsinni nunanilu allani toqqorsiviisa isumannaarnissaat, Namminersorlutik Oqartussanut pingaaruteqarpoq. Aatsitassanut oqartussap aaqqiissutissarsinissamut eqqartuussissuserisut pigisanut isumaginnittussat qanimut attaveqarfigaat, ilanngullugit nunatsinni nunanilu allani toqqorsivinnik assartuisinnaaneq iliuuseqarfiginnissinnaanerlu.”

Suliap ingerlanera tamaat Aatsitassanut oqartussap eqqartuussissuserisut pigisanut isumaginnittussat aammalu Greenland Ruby A/S-imi aqutsisut qanimut oqaloqatigisarsimavaat. Siunnerfigineqarpoq inuiaqatigiinnut kalaallinut aammalu Namminersorlutik Oqartussanut sapinngisamik pitsaanerpaamik aaqqiissutissarsinissaq.

Siunissami rubininik tunisassiorneq

Akiliisarnerit unitsinneqarnerisa nalaanni pisisussaasinnaasut arlallit Kalaallit Nunaanni rubininik tunisassiornerup tigunissaanut ingerlateqqinnissaanullu soqutiginnillutik takutissimavaat. Eqqartuussissuserisut pigisanut isumaginnittussat qanimut suleqatigalugit, siunissami Kalaallit Nunaanni rubininik tunisassiornerup ingerlaqqissinnaaneranut periarfissat maannakkut Aatsitassanut oqartussap misissorpai. Soqutiginnittumik pisisussaqassappat, pisisussaq rubininik tunisassiornerup ingerlateqqinnissaanut pisariaqartunik aningaasaqarnikkut piginnaaneqarnersoq teknikkikkullu ilisimasaqarnersoq, oqartussat nalilersussavaat.

Naalakkersuisut ineriartorneq malinnaaffigeqqissaarpaat aammalu suliami nutaarsiassaqalerpat oqaaseqassallutik.

Paasissutissanik annertunerusunik piniarnermi attaveqarfigineqassaaq:
- Naalakkersuisoqarfimmut pisortaaneq Jørgen Hammeken-Holm, joeh@nanoq.gl, oqarasuaat 346846