AtuartigukLumina Sustainable Materials A/S-ip ilinniarnermut aningaasaateqarfia maanna qinnuteqarfigineqarsinnaanngorpoq
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Lumina Sustainable Materials A/S-ip ilinniarnermut aningaasaateqarfia maanna qinnuteqarfigineqarsinnaanngorpoq. Aatsitassarsiornerup iluani, ingammik Qaqortorsuarmi Luminap piiaaffiani - innuttaasut ilinniarfiillu ilinniarsimanngitsutut ilinniarsimasutullu suliffissanut periarfissanik pitsanngorsaataasinnaasunut suliniutinut pilersaarutinullu tapiiffigineqarnissamik qinnuteqarsinnaapput.
Ulloq 15. oktobarip 2024 qinnuteqarnissamut killigititaavoq
Kikkut qinnuteqarsinnaappat?
- Kalaallit Nunaanni innuttaasut / sulisitat
- Kalaallit Nunaanni ilinniarfiit
Suliniutini assersuutit - takorluuisinnaaneq kisimi killeqarpoq
Innuttaasunut
- Aatsitassarsiornermi sulinissamut piginnaaneqalersitsisinnaasut pikkorissarnerit: assersuutigalugu maskinanik angisuunik ingerlatsinissamut, allaffissornermut, aningaasaqarnermut, peqqinnermut nerisassanullu, isumannaallisaaneq avatangiisillu
- Sulisitanut tuluttut oqaatsinik pikkorissarneq
- Aatsitassarsiornermik piiaaffinnillu ingerlatsinermi ukkataqarluni nunani allani suliffinnik misiliinissamut tapiiffigineqarneq
Ilinniartoqarfinnut
- Piiaaffinnik ingerlatsinermut aatsitassarsiornermullu attuumassutilinnik ilinniarnermik ingerlatsinissanik nutaanik pikkorissaanernillu ineriartortitsineq
- Aatsitassarsiornerup iluani inuusuttut siunissami periarfissaat pillugit paasititsiniaaneq
- Luminap piiaaffianut ilinniarsimasunik saqqummiisoqarluni paasisassarsiorneq
Lumina Sustainable A/S pillugu qinnuteqarnissamut immersuiffissanik paasissutissanillu sukumiinerusumik pissarsiaqarit
Ukunani govmin.gl aamma https://www.luminamaterials.com/ paasissutissanik sukumiinerusumik atuarsinnaavutit:
- Lumina Sustainable Materials A/S aamma Naajat eqqaaniittoq anorthositinik piiaavik.
- Najoqqutassat qinnuteqarnissamullu ilitsersuutit.
Qinnuteqaat mail-ikkut Aatsitassanut Ikummatissanullu Aqutsisoqarfimmut uunga mlsa@nanoq.gl nassiutissavat.
Sukumiinerusumik paasisaqarusukkaanni Immikkut Siunnersorti Rasmus John Franklin Lindholm Atsitassanut Ikummatissanullu Aqutsisoqarfik, 34 68 28, e-mail mlsa@nanoq.gl