Naalagaaffiit Peqatigiit naligiimmik aningaasarsiaqarnermut ullorititaa iluatsillugu oqaaseqaat

Arnat aningaasarsiaat angutit aningaasarsiaannit agguaqatigiissillugu 23 procentinik appasinnerupput, tamatumalu Kalaallit Nunaat nunat sanilliuttakkatta akornanni uggornartorujussuarmik qaffasinnerpaami inissitsippaa. Pissutaasoq arlalinniittoq takuneqarsinnaavoq. Pissutaasoq annertooq tassaavoq, arnat suliaqarfiginerpaasartagaasa angutit suliaqarfiginerpaasagaaniit ajornerusumik aningaasarsiaqartitsiviunera, aamma ilinniartitaanerit assigiimmik sivisussusillit pineqaraluartulluunniit. Pissutaasut allat tassaapput, akeqanngitsumik isumassuinermik suliaqarnerit annertunerpaartaasa amerlanertigut arnanit suliarineqartarnerisa ileqquunera, ernereernermi sulinngiffeqarnissamut naligiinngitsumik pisinnaatitaaffeqarneq aammalu pisortat missingersuutaasa suiaassutsinut tamaginnut naligiimmik iluaqusiisannginnerat.

Naligiissitaanermut Naalakkersuisoq, Naaja H. Nathanielsen oqarpoq;

”Tunngaviulluinnarpoq, kikkut tamarmik – suiaassuseq apeqqutaatinnagu – sulinermut naligiimmik nalilimmut naligiimmik aningaasarsiaqarnissaat. Naligiimmik aningaasarsiaqarnissaq, inuiaqatigiinnut naapertuilluartunut tunngaviusumik pisariaqarluinnarpoq. Arnat angutillu aningaasarsiaasa assigiinngissuteqarnerat aningaasaqarnikkut naligiinngilersitsisaannanngilaq. Aamma niviarsiaqqat arnallu sulinerat, angutit sulinerisa taamaaqataanik naleqanngitsoq aammalu taamaaqataannik pingaaruteqanngitsoq, tamanna takussutissiivoq. Tamatuma saniatigut arnat aningaasaqarnikkut atugassaqarnerisa annikinnerunerat, tamatuma ersarissorujussuarmik sunniutigaa, tamannalu ilaqutariit tamakkerlugit sunniisarpoq”.

Taamaattumik naligiimmik atugassaqartitsinissap aningaasarsialinnullu tamaginnut naligiimmik aningaasarsiaqarnissap siuarsarnissaannut, aalajangersimasunik suliniuteqarnissaq Naalakkersuisut ukkataraat – suiaassuseq apeqqutaatinnagu, ilanngullugit;

aningaasarsianut naatsorsueqqissaarnernik, ilaatigut inuussutissarsiorfinni, suliassaqarfinni ilinniartitaanernilu suiaassutsit agguarsimanerannik takussutissiisunik, katersineq. Taamaalilluta ineriartorneq malinnaaffigisinnaalissavarput, aammalu suliniuteqarnerit, paasissutissat nalunaarsukkat tunngavigalugit suliffeqarnerup suiaassutsinut agguarsimaneranik allanngortitsinissaat, qulakkeersinnaalissallutigu,
suliffeqarnermut suliassaqarfimmi pisortat missingersuutaannik misissueqqissaarnerit, taamaalillutik pisortat missingersuutaat suiaassutsinut tamaginnut iluaqusiissallutik,
suliffeqarfinni pisortaatitani suiaassutsini ikinnerusunut uuttuinermut kisitsisit tamanut saqqummiunneqartarnissaat piumasaqaataavoq. Naligiissitaanerup aammalu pisortatut atorfinni naligiimmik aningaasarsiaqarnissap qulakkeersinnaanissaannut aammalu suliffeqarfiit aningaasarsianut naatsorsueqqissaarnernik tamanut saqqummiisarnissamik inatsisitigut pisussaaffilernissaannut, taamaalillunilu naligiimmik aningaasarsiaqarnissap qulakkeernissaanut, periarfissat misissornissaannut, kisitsisit taakkua sulinermi atorneqassapput.

Paasissutissanik annertunerusunik piniarnermi attaveqarfigineqassaaq Naalakkersuisup allattaa Jeanette L. Petersen, jalp@nanoq.gl, oqarasuaat: 34 52 06.

Pissusiviusunut nassuiaat
Assigiimmik nalilinnik suliaqarnermut naligiimmik aningaasarsiaqarneq nunani tamalaani sulinermut kattuffimmit, ILO-mit, nassuiarneqarpoq, sulisartut tamarmik assigiinnik suliaqarnerinnaanngitsumut, kisianni aamma assigiinngitsunik suliaqarnermut, assigiimmik naleqartutut isigineqartumut, naligiimmik aningaasarsiaqarnissamut pisinnaatitaasut.

Pissusiviusunut nassuiaat
Nunani avannarlerni arnat angutillu aningaasarsiaasa assigiinngissutaat aammalu EU-mi agguaqatigiissillugu makkuupput:

Danmark 13,9 procent
Finland 15,5 procent
Island 9,3 procent
Norge 14,4 procent
Sverige 11,1 procent
EU 12,7 procent

Kisitsisit 2022-mut Nordic Statistics-imeersuupput, tassani pisortani allaffissorneq, illersornissaqarfik aammalu isumaginninnermi sillimmasiinerni pisussaaffiusut eqqaassanngikkaanni, suliffissuit akimorlugit misissorneqarsimapput