Imigassaq aalakoornartortalik pillugu siunissami politikkissamut innersuussutit pillugit isumasioqatigiinneq

Peqqissutsimut Naalakkersuisoq, Agathe Fontain, Nuummi isumasioqatigiissitsinermut peqataatitsiffiusumut ulluni 18. aamma 19. september qaaqqusisuussaaq, tassani politikerinut aamma suliaqartunut imigassaq aalakoornartortalik pillugu ukiunut arlalinnut politikkissamut ilisimatusarnikkut tunngavilimmik innersuussutinik ineriartortitsinermut siunnersuuteqartitsiffiusumik ataatsimiittoqassaaq.

- Isumasioqatigiissitsineq ataatsimut aallussinermik pilersitsinissamik siunertaqarpoq, aamma imigassaq aalakoornartortalik pillugu ukiunut arlalinnut politikkissamut ilisimatusarnikkut tunngavilimmik innersuussutinik ineriartortitsinerup nangillugu suliarinissaanut siunnersuutinik pingaarutilinnik katersinissaq. Tamatuma peqatigisaanik innersuussutit piareerpata, isumasioqatigiinneq najukkami aamma nuna tamakkerlugu aalajangiisartunut imigassaq pillugu suliassaqarfimmi piffissaq ungasinnerusoq eqqarsaatigalugu aalajangiinissamut piareersaataaqataasinnaanera neriuutigaara, Peqqissutsimut Naalakkersuisoq Agathe Fontain oqarpoq, nangillunilu:

- Ajoraluartumik imigassap aalakoornartup kingunerluutigisartagai ilisimalluarneqarlutillu ilungersunartuupput. Imigassamik aalakoornartumik ajoqusiisumik atuineq inuiaqatigiit tamakkerlugit aamma pingaartumik meerartatsinnut eqquisarpoq. Imigassaq aalakoornartulik pillugu suliassaqarfimmi nuna tamakkerlugu imigassaq aalakoornartortalik pillugu politikkiliornikkut sunniuteqarluartumik piffissamullu ungasinnerusumik atuuttussamik iliuuseqarnissamik pisariaqartitsisoqarpoq, taamaalilluta meerartatta toqqissisimasumik peroriartornissaat aamma maanna siunissamilu kinguaariinnut imigassamik ajoqusertoqannginnissaa qulakkiissavarput.

Peqqissutsimut Naalakkersuisoqarfik, Innuttaasut Peqqissusiannik Ilisimatusarfik aamma WHO/Europe isumasioqatigiissitsinissap pilersaarusiorneqarnera suleqatigiissutigaat, tassani immikkut ilisimasallit saqqummiissapput, WHO-mi ilisimasallit ilanngullugit, oqaluttuartitsinerit aamma kulturikkut saqqummiussinerit kiisalu peqataasunut annertuumik peqataatitsineq.   

Isumasioqatigiinnermi makku sammineqassapput: 

• Imigassap aalakoornartortallip inuiaqatigiinnut qanoq sunniuteqarnera, aamma iliuuseqarnissamik pisariaqartitsineq
• Inersimasut imigassamik aalakoornartortalimmik ajoqusiisumik atuinerat aqqutigalugu meeqqat pisinnaatitaaffii qanoq innarlerneqartarnerat
• Imigassaq aalakoornartortalik, sakkortuumik misigisaqartarneq aamma imminnut toquttarneq imminnut qanoq ataqatigiinnerat
• Imigassap aalakoornartortallip ajoqusiisumik kinguneqartarneri pitsaaliorneqarsinnaasut, aamma atortussat ilisimatusarnikkut tunngavillit aamma misilittakkanit allaavillit sorliit atorsinnaanerivut 

Kikkulluunniit isumasioqatigiissitsinermut aamma imigassaq aalakoornartortalik pillugu ukiunut arlalinnut politikkissamut ilisimatusarnikkut tunngavilimmik innersuussutinik suliaqarnermut soqutiginnittut internetikkut malinnaanissamut tikilluaqqusaapput. Isumasioqatigiissitsineq Youtubemi Hotel Hans Egedep quppernerani malinnaaffigineqarsinnaassaaq:
https://www.youtube.com/@hotelhansegedestreaming8574

Imigassaq aalakoornartortalik pillugu ukiunut arlalinnut politikkissamut ilisimatusarnikkut tunngavilimmik innersuussutinik saqqummiussaqarnissaq pillugu siunnersuut Inatsisartut upernaakkut 2023-mi ataatsimiinneranni akuerineqarpoq. Inassuteqaatit kingusinnerpaamik upernaakkut 2025-mi ataatsimiittoqarnerani saqqummiunneqassapput. Imigassaq aalakoornartortalik pillugu innersuussutinik suliaqarneq Peqqissutsimut Naalakkersuisoqarfimmit, Innuttaasut Peqqissusiannik Ilisimatusarfik aamma WHO/Europe qanimut suleqatigalugit ingerlanneqarpoq. Innersuussutinik ineriartortitsineq naalakkersuisoqarfiit aamma suliassaqarfiit allat siammasissumik suleqatigalugit pivoq, susassaqartullu tamarmik peqataatinneqarnissaasa qulakkeerneqarnissaat anguniarneqarpoq.

Links:
Pilersaarut – Isumasioqatigiinneq 18.-19. septembari 2024

Pilersaarutinut takussutissiaq

Sukumiinerusumik paasisaqarusukkuit Peqqissutsimut Naalakkersuisoqarfik attaveqarfigineqarsinnaavoq pn@nanoq.gl.