Nunatta Norge suleqatigilluartorujussuua

- Nuannaarutigaara nunat marluulluta inerititalinnik ukiuni 30-ni amerlanerusuni suleqatigiikkatta, taama Aalisarnermut Piniarnermullu Naalakkersuisoq Kim Kielsen Norgemi Aalisarnermut Imartamullu ministeri Marianne Siverthsen Næss ataatsimeeqatigigamiuk oqarpoq. 

Aalisarnermut Piniarnermullu Naalakkersuisoq Kim Kielsen aggustip 19-iannit 22-annut 2024-mi Norgimiippoq, illoqarfimmi Trondheimimi  aalisarneq pillugu ataasimiinnermut Nor-fishingimut aamma saqqummersitsinermut peqataalluni, Norgellu aalisarnermut imartamullu ministeria  Marianne Sivertsen Næss aamma ataatsimeeqatigaa. Taannaavorlu Kim Kielsenimut qaaqqusisoq. 

Aalisarnermut Naalakkersuisut ataatsimiinnerminni naqissuserpaat nunatta Norgemik ukiuni kingullerni 30-ni inerititalinnik suleqateqarnera, nunat marluullutik isumaqatigiissuteqartarneri, nunap ilaanut aamma nunat tamalaat isumaqatigiissuteqarnerinut aamma tunngasut. Ilaatigut oqaluuseraat nunat marluullutik aalisarneq pillugu isumaqatigiissusertik, ilisimatusarnikkut suleqatigiinnertik, aamma nunat immikkoortuisa aalisarneq pillugu aqutsinernut suliniaqatigiiffiisa suleqatigiinneri oqaluuseraat.   

- Taamaattumik nuannaarutigilluinnarpara Norgemi ministerip attaveqatigiinnitta nukittuninngornissaa pillugu ataatsimeeqatiginissaanut periarfissaqarama. Norgemik ukiuni tulliuttuni 30-ni suleqatigiittuarnissarput qilanaaraa, taama Naalakkersuisoq Kim Kielsen Norgemi aalisarneq pillugu ministerimut ilaatigut oqarpoq. 

Nor-fishing aalisarneq pillugu saqqummersitsivissuuvoq, Trondheimimi ukiut tamaasa pisartoq. Saqqummersitsinersuarmut nunat assigiinngitsut 50-init amerlanerit peqataatitaqartarput, 500-t sinnerlugit saqqummersitsiveqarluni, inunnit 17.000-it missaannik takuniarneqartarlutik.

Trondheimimi saqqummersitsinerup immikkuullarissutaa tassaavoq  alisarnerup ineriartornera pillugu ukkatarineqartarnera aamma aalisarnermi atortut nutaaliat saqqummersitsinermi ukkatarineqarluartarneri. 

Saqqummersitsisoqaannanngilaq, aalisarnermut tunngasut pillugit aamma ataatsimiittoqartarmat aalisarnerullu ineriartornera pillugu aamma ataatsimiittoqartarluni. 
Naalakkersuisumut ilaatigut takutinneqartut ilaat tassaavoq uiluinniarnermi atortut nutaat ilaat Norgemi maannakkut misilittarneqartoq uiluinnut qajassuarnerusumik kilisattartoq. Aalisariutit nukissiuutinik ataavartumik ingerlatillit mingutsitsivallaanngitsullu takuniarneqarput, aamma silap pissusiata allanngoriartornerata ilisimatusarfigineqarnerata piumasaqartitsinera kiisalu immami pisuussutit qanoq atorluarsinnaaneqarneri pillugit siunnersuutit nassuiaassutigineqarput. 

Paasissutissanik amerlanerusunik Aalisarnermut Piniarnermullu Naalakkersuisoqarfimmi pisoqarsinnaavoq: apn@nanoq.gl