Timmissat toqungasut amerlasuut nassaarineqarsimasut pillugit Kalaallit Nunaanni Uumasunut Nakorsaqarfik Inuussutissalerinermullu Oqartussaqarfimmiit tusagassiutitigut nalunaarut
Nassiussisuuvoq: Aalisarnermut Piniarnermullu Naalakkersuisoqarfik![Udlånt af Pinngortitaleriffik og tage af Carsten Egevang](/-/media/billeder/dyr/fugl/skal_ikke_bruges_igen.jpg?cx=0.5&cy=0.5&cw=975&ch=415&hash=6A80CC12C17951CB5267EA0C8628BA75)
Asseq Pinngortitaleriffimmiik atugaq assiliisoq Carsten Egevang
Tunup sineriaani arlalinni ingammik Ittoqqortoormiip eqqaani appaliarsuit toqusimasut pillugit innuttaasut piffissami kingullermi nalunaaruteqartarput. Taamaallaat appaliarsuit toqungasut takuneqarsimapput.
Kalaallit Nunaanni Uumasunut Nakorsaqarfik Inuussutissalerinermullu Oqartussaaffik (UNIO), Aalisarnermut Piniarnermullu Naalakkersuisoqarfik aamma Pinngortitaleriffik suleqatigalugit timmissanik napparsimasorisanik katersineq misissuinerlu aallartinneqarsimapput
Siornatigut Kalaallit Nunaanni timmissat nualluutaat sakkortuumik tuniluuttartoq napparsimatitsisartorlu (Aviær influenza) uppernarsarneqarsimavoq, aammalu maanna pasitsaassimaneqarpoq timmissat akornanni timmissanut nualluut napparsimalersitsisimasoq toqussutigineqarsimasorlu. Kisianni tamanna maannakkut uppernarsarneqarsimanngilaq.
Timmissat nualluutaannik tunillatsissimasunit inuit timmissanit tunillatsissinnaapput, naak tamassuma pisinnaanera annikikkaluartoq. Taamatuttaaq inuit virusimik taamaattumik tunillanneqarsimasut napparsimarujussualertarnerat qaqutigoortuuvoq. Timmissat nualluutaat nalinginnaasumik qaqutiguinnaq inunnut tuniluuttarpoq, taamaattoqartillugulu tunillatsittoq timmissat imaluunniit timmiaatit qanillisimasarlugit.
UMIO-mit kaammattuutigineqassaaq timmissanik passussinerit pillugu imminut illersornissamut malitassat ataani allassimasut malinneqassasut:
- Qaqorsaaserlutit errortorit, pingaartumik timmissat erlaviinik peersisimaguit.
- Timmissat erisarnagit amiikkit (pujoralatserinnginneruvoq).
Neqit manniillu nualluummik virusitaqarunik ooqqissunngorlugit siallugit/qalallugit virusertaa toqunneqartarpoq.
Timmissat toquinnarsimasut oqartussanik isumaqatigiissuteqareernikkut taamaallaat passunneqartariaqarput.
Pinngortitami timmissanik toqungasunik nassaaraanni UMIO-mut uumasut@nanoq.gl-imut imaluunniit 34 50 00-imut ammasarfiup iluani, tassa ataasinngorneq, marlunngorneq, sisamanngorneq tallimanngornerlu nal. 9.00-miit 15.00-ip tungaanut saaffiginnittoqarsinnaavoq. Pinartoqartillugu Uumasut nakorsaat Stella Ege Kristensen saaffigineqarsinnaavoq oqarasuaat 345390.
Inussiarnersumik inuulluaqqusillunga
Kalaallit Nunaanni Uumasunut Nakorsaqarnermut Inuussutissalerinermullu Oqartussaaffik