Naalakkersuisut Inuit Innarluutillit Pisinnaatitaaffii pillugit Naalagaaffiit Peqatigiit Isumaqatigiissutaata malinneqarnissaanut iliuusissatut pilersaarut 2024-2034 saqqummersippaat

Inuit Innarluutillit Pisinnaatitaaffii pillugit Naalagaaffiit Peqatigiit Isumaqatigiissutaata malinneqarnissaanut iliuusissatut pilersaarut 2024-2034 saqqummersinneqaqqammersup, innarluutillit pillugit nassuiaat 2022-meersoq aallaavigaa suliniuteqarfigisassallu 10-t salliunneqarput.

Inuit Innarluutillit Pisinnaatitaaffii pillugit Naalagaaffiit Peqatigiit Isumaqatigiissutaata malinneqarnissaanut iliuusissatut pilersaarut-mi suliniuteqarfigisassat 10-t nassuiarneqarput,. tassani inuit innarluutillit allat assigalugit inuiaqatigiittut inuunermi peqataasinnaanissaat pingaartinneqarpoq, ullumi saqqummersinneqarpoq.

”Inuiaqatigiinni inuk pisinnaasakinnerulersimasoq allatuulli inuiaqatigiinni peqataaniarnermini akimmiffimmik nalaatsigaangat innarluut pilersarpoq. Akimmiffeqanngitsumik inuiaqatigiinnik pilersitsissaagut. Timikkut akimmiffinnut aamma inuiaqatigiit inatsisillu aaqqissugaanerinut tunngapput. Akimmiffinnik piiaaneq siullertut politikitigut suliassaavoq, kisiannili aamma suliassaq tamanna ataatsimoorluta suliarisariaqarparput.” taama oqarpoq Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede.

Iliuusissatut pilersaarutip nutaap ”Inuit Innarluutillit pillugit Naalagaaffiit Peqatigiit Isumaqatigiissutaata Kalaallit Nunaannit eqquutsinneqarnissaa pillugu nassuiaat” 2022-meersoq tunngavigaa, aammalu Inuit Innarluutillit pillugit Naalagaaffiit Peqatigiit Isumaqatigiissutaata malinneqarnissaanut iliuusissatut pilersaarut piffissamut ungasinnerusumut atugassiaavoq 9-illu suliniuteqarfigisaqarluni.

Suliniuteqarfissat taakku qulingiluat saniatigut Inuit innarluutillit pillugit isumaqatigiissut tunngavigalugu iliuusissatut pilersaarutip matuma suliarinerani suliniuteqarfissat qulingat ilanngunneqarpoq. Suliniuteqarfissat qulingat ulloq unnuarlu neqeroorutinut suliassaqarfimmi nalunaarutinik pingasunik saqqummersitsinerit tunngavigalugit ilanngunneqarpoq, tassani kinguaassiornermut tunngasut inunnullu innarluutilinnut kinguaassiutitigut kannguttaatsuliornerit pinngitsoortinneqarnissaat isiginiarneqarput.

Iliuusissatut pilersaarummi suliniuteqarfigisassap qulingata siunertarai:

1. Inuit innarluutillit tapersersorneqarnissaannut Inatsisartut inatsisaata pitsaanerusumik atulersinnissaa, tassunga ilanngullugu kommuninut pisariaqarfiatigut siunnersortinnissamut ilitsersuutsinnissamullu periarfissaannik pitsanngorsaanissaq.
2. Inunnut innarluutilinnut ilinniartitaanerup aaqqissuussaanerani ataqatigiinnerusumik ingerlatsinissamik pilersitsineq, tassunga ilanngullugit immikkut pisariaqartitat siusissukkut paasineqartarnissaannik qulakkeerinninneq inunnullu innarluutilinnut suli atualinngitsunut neqeroorummiit meeqqat atuarfiannut ilinniaqqiffinnullu pitsaanerusumik ikaarsaariarnerit.
3. Innarluutilinnut suliassaqarfimmi sulisut ilinniartitaanissaannut pikkorissarnissaannullu periarfissanik pitsanngorsaaneq.
4. Suliffeqarfinnik inunnut innarluutilinnut inissaqartitsinerusunik pilersitsineq.
5. Tarnikkut nappaatilinnut immikkoortortaqarfimmi qulaajaanermik aamma Peqqinnissaqarfiup kommunillu akornanni suleqatigiinnermik pitsanngorsaaneq.
6. Inunnut innarluutilinnut inuunermi atugassarititanut tunngatillugu paasissutissanut tunngaviusunik pitsanngorsaaneq.
7. Inunnut innarluutilinnut inissianik naleqqussakkanik naammattunik peqarnissamut qulakkeerinninneq, tassunga ilanngullugit nuna tamakkerlugu ulloq unnuarlu Naalakkersuisut neqeroorutai aamma kommunini najugaqarfissatut neqeroorutit.
8. Innarluutilinnut tunngasuni peqatigiiffinnut aammalu kajumissutsiminnik suliaqartartunut sinaakkutissat pitsaanerulersinneri.
9. Inuiaqatigiinni innarluuteqarneq pillugu paasissutissat nalinginnaasut pitsaanerulersinneri. Inunnut innarluutilinnut tunngasunik isummanik pigiliutiinnakkanik assigiinngisitsinernillu annikillisaanissaq siunertaavoq.
10. Ulloq unnuarlu neqeroorummi kinguaassiutinut tunngasunik ilisimasanik inunnullu innarluutilinnut kinguaassiutitigut kannguttaatsuliornerit pinaveersaartinnissaannut pitsaanerusumik suliniuteqarnissaq periuseqarnissarlu.

“Innarluut naapinnagu inuk naapissavarput, inuk innarluutilik immikkoortinneqartutut, nikanarsarneqartutut kanngunarsaarneqartutulluunniit pineqartoq akuerissanngilarput.” taama oqarpoq Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede.

Inuit Innarluutillit Pisinnaatitaaffii pillugit Naalagaaffiit Peqatigiit Isumaqatigiissutaata malinneqarnissaanut iliuusissatut pilersaarut 2024-2034 uani atuaruk.

Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.