Peqqissutsimut Naalakkersuisoq, Agathe Fontain, Itillimut Sarfannguanullu tikeraarpoq

Peqqissutsimut Naalakkersuisup Agathe Fontainip Itilleq aamma Sarfannguit piffissami 6.-12. august 2024-mi tikeraarpai. Peqqissutsimut tunngatillugu isumaqatigiissutip aamma peqqissutsimut tunngatillugu isumaqatigiissummi iliuusissat Naalakkersuisut ukiuni tulliuttuni nangillugit suliarissallugit naatsorsuutigisaat saqqummiunneqarnissaat angalanermi siunertarineqarput. Peqqissutsimut tunngatillugu isumaqatigiissut Inatsisartuni partiit amerlanerpaartaasa akornanni novembarimi 2023-mi isumaqatigiissutigineqarpoq.

Itillimi innuttaasunik ataatsimiititsinermi innuttaasut sammisat qitiusut arlallit ilinniartitaanermut peqqissutsimullu tunngasut sammivaat. Sammisaq qitiusoq alla tassaavoq pujortartarnermut pinaveersaartitsineq. Paasititsiniaanermik suliaqarneq atuarfimmi siusinnerusukkut aallartittassasoq innuttaasut kaammattuutigaat, tassami meeqqat amerlasuut apersortinnissamut ukiut suli angunagit pujortartalereersarmata. Aammattaaq Sarfannguani innuttaasut nunaqarfimminnut pinaveersaartitsinermut periusissamik ujartuipput.

"Itillimut Sarfannguanullu tikeraarninni innuttaasut najugaqartut peqqinnissaqarfimmut pisariaqartitaat aamma kissaataat pillugit naleqarluartunik paasisaqarpunga. Innuttaasunik ataatsimiititsininni ammasumik aamma piumassuseqarnermik takutitsisoqarnera qujamasuutigaara.
Innuttaasut nunaqarfinni peqqinnissaqarfimmi sulisut ilinniartitaanerannik aamma pinaveersaartitsilluni suliaqarnernut pingaartitsinerat pimoorussillunga tiguakka. Nunaqarfinnut ataasiakkaanut pisariaqartitanut immikkuullarissunut naleqquttunik aaqqiissutissanik ataatsimoorluta ineriartortitsinissarput pingaaruteqarpoq”, Peqqissutsimut Naalakkersuisoq, Agathe Fontain oqarpoq.


Sukumiinerusumik paasisaqarusukkuit naalakkersuisup allattaa Birgithe Heinrich attaveqarfigiuk e-mail: bihe@nanoq.gl imaluunniit oqa.: +299 34 66 17