AtuartigukPikkorissaanerit piginnaasanik ineriartortitsiviusut inunnut innarluutilinnut eqqortumik ikiuisarnerit qulakkiissavaat
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Ukiami sulianik suliarinnittartunut piginnaasanik ineriartortitsiviusunik pikkorissaanissanik kiisalu septembarip aallartinnerani isumasioqatigiissitsinissamik Naalakkersuisut pilersaarusiorsimapput.
Avannaata Kommuniani nalunaaqqaarluni nakkutilliiartorneq inunnut innarluutilinnut sullinneqartarnerannullu tunngatillugu inassutinik peqqussutinillu kinguneqarpoq. Tamanna innuttaasunut qanigisaannullu, kisiannili aamma innuttaasut inatsisitigut isumannaatsuunerannut ernumanarluinnartuuvoq:
Inuit innarluutillit inuupput assigiinngitsunik tunuliaqutaqarlutillu anguniagallit, inuit tamarmik assigalugit nammineq inuunillit. Ilai suliffeqarput, inissiami attartukkami najugaqarlutik, timersornermik aallussisuullutik, biileqarlutik, meeraqarlutik katisimallutillu. Ilai najugaqarfissatut neqeroorummi najugaqarput, immikkut atugassarititalimmik suliffeqarlutik, inummit tapersersortimit tapersersorneqarlutillu isumassorneqartarlutik, nammineq kajumissutsiminnik sulinermi peqataasarlutik allarpassuillu. Inuilli innarluutillit assigiiffigisaat tassaavoq inuit allat assigalugit inuiaqatigiittut inuunermi peqataanissaminnut eqqortumillu ikiorneqarnissaminnut akimmiffeqartarnerat.
Inuunermik nammineq toqqakkamik inuuneqarsinnaanissamut inuiaqatigiinnilu tapersiisinnaanissamut peqataasinnaanissamullu periarfissalimmik inuunermik isumaqarluartumik inuuneqarnissamut, inuit innarluutillit kommunimit ikiorneqarnerat kiisalu ilitsersorneqarlutillu siunnersorneqarnerat qitiulluinnartuuvoq.
Innuttaasup eqqortumik ikiorneqarnissaa inuiaqatigiit pisussaaffigaat, aamma sulianik suliarinninnermut tunngatillugu. Inuit innarluutillit inuit allat assigalugit inuinnartut, naalakkersuinikkut, aningaasaqarnikkut, inooqataanikkut kulturikkullu peqataasinnaanerisa siuarsarnissaa pingaaruteqarpoq.
”Innuttaasutta pisinnaatitaaffiisa qulakkeernissaannut tunngatillugu eqqortumik sulianik suliarinnittarneq pingaaruteqarluinnarpoq. Kommunini sulianik suliarinnittartunik amigaateqarneq aamma piginnaasanik ineriartortitsineq eqqarsaatigalugu kommunit assigiinngitsut annertuumik ilungersunartoqartikkaat ilisimavarput.” taama oqarpoq Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede.
Taamaattumik ukiami sulianik suliarinnittartunut piginnaasanik ineriartortitsiviusunik pikkorissaanissanik kiisalu septembarip aallartinnerani isumasioqatigiissitsinissamik Naalakkersuisut pilersaarusiorsimapput, taakkulu Pissassarfimmiit aamma Isumaginninnermut Aqutsisoqarfimmiit Meeqqanut Inuusuttunullu Naalakkersuisoqarfik suleqatigalugu ingerlanneqassapput, Pissassarfiup kommunillu pitsaanerusumik suleqatigiinnerulernissaat siunertarineqarpoq:
”Qularinngilara Avannaata Kommuniani sapinngisartik tamaat atorlugu iliuuseqartut aamma sulianik suliarinnittartut ingerlatsivinni ileqqorissaarnissamut tunngaviit aallaavigalugit sulisut, innuttaasunullu suut pitsaanerpaajunersut nalunngikkaat. Ataatsimoorluta innuttaasugut pillugit akisussaaffimmik tiguseqatigiitta.” taama oqarpoq Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede.
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.