AtuartigukTAAK-p aningaasanik ajornartoornera pillugu nutaarsiassaqartitsivimmi sermitsiaq.ag-mi allaaserineqartoq pillugu tusagassiorfinnut nalunaarut
Nassiussisuuvoq: Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Aqqaluaq B. Egede matumuuna erseqqissaassuteqassaaq nittartakkakkut nutaarsiassaqartitsiviup sermitsiaq.ag-p allaaserisaanut ”TAAK aningaasaataaruppoq”.
Allaaserisami Timersoqatigiiffiit Assammik Arsartartut Kattuffiat (TAAK)-ip nalunaarutigaa nuna tamakkerlugu arsaattartut tamarmik unammiuaarnernik unitsitsigallartut. Taama aalajangiineq aningaasatigut unamminartorsiorneq peqqutaatinneqarpoq, ilaatigut ukioq manna unammiuaarnerpassuit ingerlanneqarsimasut pissutigalugit nuna tamakkerlugu unammisartullu uninngatinneqarallassapput nuna tamakkerlugu sungiusaasumut aningaasarsiat unitsinneqarlutik, aningaasaqarnerup aaqqinnissaata tungaanut.
Aallaqqaasiutigalugu paasissutissiissutigineqassaaq TAAK 2024-imi ulloq manna tikillugu ingerlatsinermut 1.222.398,00 kr.-inik Kalaallit Nunaanni Timersoqatigiiffiit Kattuffiat, GIF, aqqutigalugu taperneqarsimammat aamma 658.900 kr.-inik Elite Sport Greenland ESG,-imit taperneqasimalluni, katillugit 1.881.298,00 kr. TAAK-ip nammineq aqutassai. Kiisalu tapertinneq tulleq 1.222.398 kr GIF-imiit tunniunneqassapput, TAAK-ip ukiumoortumik naatsorsuutitik naatsorsuuserisumit akuerisaasumit suliarineqarsimasut GIF-ip akuereriarpagit. Naatsorsuutit akuerineqassappata ukiormanna Aalasa pulje ilanngullugu katillugit 3.148.196 kr.-inik TAAK tapiiffigitissaaq ukioq tapiiffiusoq tamakkerlugu namminneq aqutassaminnik.
Taama GIF-ip siulittaasuata Claus Nielsen Naalakkersuisunut TAAK-ip aningaasaqarnera pillugu nassuiaammik nassiussaqarnermini naqissusiivoq.
GIF-ip nassuiaataani ersersinneqarpoq GIF aamma TAAK juunip 6-nili 2024 suligasuarsimasut TAAK-ip aningaasaqarniarnikkut unamminartorsiornera qulaajarlugulu aaqqiiviginiarlugu. Ataatsimiinerit arlallit TAAK-ilu ingerlanneqarsimapput, TAAK-illu aningaasaqarnikkut ilorraap tungaanut saatinissaa siunertaralugu pilersaarut ”Aningaasaqarneq pillugu pilersaarut 2024-2025”, TAAK-ip siulersuisuisa 30. juli 2024 ataatsimiinnerminni akuerisassaat isumaqatigiissutigineqarpoq. GIF-illu kaammattuutigisimavaa TAAK-ip 2024-imi pilersaarutini unitsikkallassagai, aningaasatigut suli amigartooruteqarnerulernissaq pinngitsoortinniarlugu. Isumaqatigiissutissaq akuerineqarpat, TAAK-ip aningaasaqarnera 2025-ip naalernerani ilorraap tungaanut aallarsimassaaq. Tamassuma kingunerissavaa, nunani allani timersoriarnerit ikilinissaat, taamaattorli nunatsinnili timersornerit kalluanngikkaluarlugit.
GIF-p nassuiaammini aamma tikkuarpaa ”TAAK-ip ukiuni kingullerni annertuumik nunanut allanut unammisartunik ingerlatsisimanera tunngaviatigut ajunngikkaluartoq aningaasarpassuarnilli naleqartup pilersaarusiornerlunnikkut pingaarnersiuinerlunnikkullu ingerlanneqarsimanera pitsaasuunngitsutut nalileratsigu. Taamaattumik TAAK pingaarnersiuilluni pilersaarusiornermi aningaasat atorneqarsinnaasut aallaavingalugit pilersaarusiortarnissaa sakkortuumik kaammattuutigisimavarput, aningaasaliissutit iluini pilersaarusiortarnissaq anguniarlugu suliniuteqartarnisaat oqariartuutigalugu”.
GIF-ip ukiuni kingullerni kattuffiit ataatsimoorussamik naatsorsuusiortoqalernerat angusimavaat, kattuffiit aningaasaqarnerat qanimut malinnaaffigalugulu nakkutigineqarnerusumik ingerlatsiniassagamik, GIF-ilu kattuffinnut sukannersumik aningaasatigut ingerlatsisoqarnissa kaammattuutigisarpaat, tamanna iluarisimaarneqarlunilu pitsanngorsaaffiusoq kattuffinniit oqaatigineqarpoq.
TAAK-ip aningaasaliiffigineqarnera Aningaasanut inatsisikkut konto pingaarneq 40.94.13 ”Timersornermut tapiissutit” atorlugu ingerlanneqarpoq. Timersornermut tapiissutit, taamalu TAAK-imut tapiissutit Kalaallit Nunaanni Timersoqatigiiffiit Kattuffiata, GIF-ip aqutaraa. GIF-ip tapiissutinik (aamma TAAK-imut tapiissutinik) tigusisartuuvoq. GIF-illu tapiissutit kattuffinnut agguaassisussaatitaavoq aamma TAAK-imut, GIF-imi sinniisuutitanit aalajangersarneqartumik.
Taasuma saniatigut TAAK Aningaasanut Inatsimmit konto pingaarnermit 40.94.21-imit Danske Spil A/S-p Kalaallit Nunaanni kaaviaartitaanit (tapiissutitut) Elite Sport Greenlandimit aqunneqartumit taperneqartarpoq.
TAAK-ip aningaasatigut ingerlanera ukioq 2023 – 24
| 2023 | 2024 | |
| Hv.kto 40.94.13 (via GIF) | ||
| Ingerlatsineq tapiissutit 1. tunniussineq |
1.234.111 | 1.222.398 |
|
Ingerlatsineq tapiissutit 2. tunniussineq |
1.184.011 | (aappassanik tunniussat 1.222.398 ukiumut naatsorsuutit GIF-imit tiguneqarnerani tunniunneqartussat) |
| Kursus-ertisineq | 180.620 | |
| Norca 2023 1. tapiissut |
2.600.000 | |
| Norca 2023 2. tapiissut | 1.000.000 | |
| Alasa pulje | 44.500 | |
| Hv.kto 40.94.21 (ESG aqqutigalugu) | ||
| Isumaqatigiissut malillugu | 850.000 | 600.000 (indtil nu) |
| Nuna tamakkerslugu sungiusaasoq tapiissut | 190.000 | 58.900 |
| Bonos VM-imut anngunniunneq | 400.000 | |
| U-21 VM tapiissut | 300.000 | |
| VM-Nuuk anngunniunneq | 500.000 | |
| Ialt | 8.438.742 | 3.148.196 GIF-ip ukiumut naatsorsuutit akuerissappagit |
Timersornermut Ilageeqarnermullu Naalakkersuisoqarfik ukiuni sisamani atuuttumut 1. januar 2022 – 31. Januar 2026 atuuttussamik angusaqarnernissamut isumaqatigiissusiorput. Angusaqarnissamut isumaqatigiissutip siunertaa tassaavoq illuatungeriit susassaqartitsinernut naatsorsuutigisaasa imarisassaanik aamma erseqqinnerusumik annertussusissaanik aalajangersaanerunissaq, matumani ilanngullugu nalunaarusiortarnissamik piumasaqaateqarneq aamma naatsorsuusiorneq. Angusaqarnissamut isumaqatigiissummi takuneqarsinnaavoq GIF-ip specialforbund-inut ilaasortarisaminut tapiissutinik akiliisartussaasoq GIF-ip kattuffinniit aallartitaasa ataatsimiinnerini aalajangiifigineqartut naapertorlugit. Ataatsimoorussamik tapiissutit marlunnut avillugit tunniunneqartarput, siullermik 1. januar sinneruttullu 1. juli tunniunneqartarlutik.
Naalakkersuisut matumani atatillugu erseqqissaassutigissavaat GIF specialforbundillu akornanni suleqatigiilluarneqarmat, matumani aamma TAAK ilanngullugu.
Paasissutissanik annertunerusunik kissaateqartoqarpat Naalakkersuisoqarfiup pisortaanera departementschef Nuka Kleemann attavigineqarsinnaavoq oqarasuaat 34 70 00 imaluunniit pr. e-mail ikin@nanoq.gl atorlugu.