Kalaallit Nunaata imigassaq pillugu politikkissaanik innersuussutinik ineriartortitsinermik suliaqarnermi Nunarsuaq tamakkerlugu peqqissutsimut kattuffik ilisimasanik patajaatsunik tunniussaqarpoq

Nuna tamakkerlugu imigassaq pillugu politikkimut innersuussutinik ineriartortitsinermi suleqatigiinnermi WHO/Europe aamma Kalaallit Nunaanni Innuttaasut Peqqissusiannik Ilisimatusarfik peqatigalugit Peqqissutsimut Naalakkersuisoqarfik aappassaanik workshopimik ingerlataqarpoq. Workshopernerit ullut marluk ingerlanneqarput, tassanilu ataatsimiititaliat siunnersuisut aamma suleqatigiissitaq Nunarsuaq tamakkerlugu peqqissutsimut kattuffimmi (WHO) ilisimasallit siuttut katersorneqarput.

Ilisimasat pissarsiarineqarsinnaasut pitsaanerpaat, iliuusissat pitsaanerpaat aamma imigassat sunniutai ajoqutaasut pinaveersaartinniarlugit nunat allat misilittagaat ataatsimut paasisaqarfiginissaat kiisalu nuna tamakkerlugu imigassaq pillugu politikkimik ineriartortitsinissaq workshopernerup siunertarai.

Peqqissutsimut Naalakkersuisoq, Agathe Fontain oqaaseqarpoq: “Meeqqat imaluunniit inersimasut imigassamit ajoquserneqarfiginngisaannik, siunissamik peqqinnarnerusumik pilersitsinissamut suliniut una alloriarneruvoq pingaarutilik. Siunissami imigassaq pillugu politikkissamut innersuussutinik suliaqarneq siammasissumik suleqatigiinnikkut pinissaa pingaaruteqartorujussuuvoq, innersuussutillu ilisimasanik pissarsiarineqarsinnaasunit pitsaanerpaanit tunngaveqarnissaat.”

WHO/Europemi ilisimasallit peqataasut tassaapput Canadamiut Catherine Paradis aamma Ashley Wettlaufer. Catherine Paradis ukiuni 20-ni kingullerni Canadami imigassaq pillugu politikkinik ineriartortitsinermi aamma atulersitsinermi annertuumik ilisimasaqarnerminit misilittagaqarnerminillu ilisimaneqarlunilu ataqqineqartuuvoq. Ashley Wettlaufer aamma WHO-mit imigassaq pillugu suliassaqarfimmi ilisimasaqartuuvoq, imigassamik atuinermik pinaveersaartitsinermi aamma imigassaq pillugu politikkimik ukiorpassuarni misilittagaqarluni. Workshopini tunngaviit arlallit aallaavigalugit aamma tunngavilersugaalluartumik periuseqarneq, imigassaq pillugu politikkimik ataatsimut isigalugu angorusutat ukkataralugit isumassarsiaq saqqummiuppaat. Tunngavilersorluakkami periuseq politikkinik nutaanik pilersaarusiornermut, atulersitsinermut aamma nalilersuinermut sakkussaavoq sunniuteqarluartoq. Tamanna suleqatigiissitamit aamma ataatsimiititaliamit siunnersuisunit annertuumik soqutigineqarpoq, maannalu taakku imigassaq pillugu politikkissamut tunngavilersorluakkamik periusissamik ineriartortitsileruttorput.

Ataatsimiititaliami siunnersuisuni Kalaallit Nunaanni Innuttaasut Peqqissusiannik Ilisimatusarfik, ICC (Chair Inuit Health Steering Committee), MIO, UNICEF Kalaallit Nunaat, Meeraaqqerisut aamma ernisussiortut pisortaat sinniisuutitaqarput.

Workshopimi WHO aamma suliniutinik aningaasaliinermut sanilliullugu sunniuteqarluartunik saqqummiussaqarpoq, taakku “Best Buys”-itut ilisimaneqarput, nunanilu arlalinni imigassamik atuinermut aamma tassunga tunngatillugu ajoqusernernut annikillisitsinermut sunniuteqarluarsimapput. Taakkunani akit qaffanneqarnerat, killilimmik pissarsisinnaaneq kiisalu imgassanik aalakoornartulinnik nittarsaassineq killilersuiffiusoq ilaapput. Tamatuma saniatigut peqqinnissaqarfimmi imigassamik ajornartorsiuteqarneq pillugu paasiniaanerit, imigassartortarnerup kingunerisinnaasaanik paasissutissiinerit annertuut, kiisalu tupat assigalugit imigassanik aalakoornartulinnik nalunaaqutsersuinerit.

WHO naapertorlugu periusissiat taakku atulersinneqarneri peqqissutsikkut malunnaatilimmik iluaqutitaqassapput aamma ajoqusernerni imigassamut attuumassutilinnut aningaasartuutit appartinneqassallutik.

“Ukiunut arlalinnut imigassaq pillugu politikkimut ilisimasanik ilisimatuussutsikkut tunngaveqartunik innersuussutit” 2025-mi Ukiaanerani Ataatsimiinnermi agguaanneqassapput.

Link: Ukiunut arlalinnut imigassaq pillugu politikkimut ilisimasanik ilisimatuussutsikkut tunngaveqartuni innersuussutinik suliassat allattorsimaffiat 

Paasisaqarnerorusukkuit naalakkersuisup allattaa Birgithe Heinrich e-mailikkut attaveqarfigiuk: bihe@nanoq.gl imaluunniit oqarasuaat: +299 34 66 17.