Isukasiata eqqaata matugallarnerat

Nuup Kangerluata avannaata tungaaniittumi Isukasiani saviminissamik atuinissamut akuersissuteqarlutik Naalakkersuisut 2013-imi nalunaaruteqarput.

Ingerlatseqatigiiffiup akuerineqarsimasup naammassisassaanut piffissaliunneqarsimasut sivitsorneqaqattaareernerisa kingorna saliinissanullu aningaasartuutissanut qularnaveeqqusiisoqarnissaanik aatsitassarsiornermut oqartussat piumasaqaataanik naammassinnittoqarneq ajornerata kingunerisaanik Naalakkersuisut 2021-mi aalajangerput ingerlatseqatigiiffik kinguartitseqqissinnaajunnaartoq. Tamatuma malitsigisaanik atuinissamut akuersissutip atornissaanut piffissaq naavoq akuersissullu utertinneqartussanngorluni.

Akuersissummik piginnittuusimasup Kalaallit Nunaani Namminersorlutik Oqartussat 2022-mi eqqartuussivimmut suliassanngortippai. Eqqartuussivimmi suliaq suli aalajangiiffigineqanngilaq.

Matuneqarallarpoq
Eqaartuussivimmi suliap aalajangiiffigineqarnissaata tungaanut aatsitassarsiornissamut atatillugu kisermaassinissamut akuersissummik allanit qinnuteqarfigineqarsinnaassanngilaq. Tassani pineqalutik aatsitassanut akuersissuteqartarnerit aamma sumiiffinni aatsitassarsiornermi ingerlataqarnerit (siusinnerusukkut annikitsumik aatsitassarsiornissamut akuersissutitaasimasut). Misissueqqaarnissamut akuersissuteqarnerup aamma nalaani piffimmi allanik ingerlatsisoqarsinnaassanngilaq.

Taamaattorli sumiiffinni aatsitassarsiornernik assigiinngitsunik ingerlatsinissaq periarfissaajuassaaq. Nunaqavissut akuerineqaqqaaratik ujaqqanik kaanngarsimasunik katersisinnaatitaassapput atortorissaarutillu tigummiaannartakkat atorlugit piiaasinnaatitaassallutik. Sumiiffinni aatsitassarsiornermik ingerlatsineq pillugu Inatsisartut inatsisaat nutaaq tamatumani aallaaviuvoq, inatsimmi nutaaq aqqutigalugu nunaqavissut pisuussutinik pinngortitameersunit atuisinnaatitaanerat pitsanngortinneqarnikuummat. Kalaallit Nunaani aalajangersimasumik najugaqareersut aamma Kalaallit Nunaanni ukiuni tallimani tamakkiisumik akileraartussaatitaareersimasut inatsit naapertorlugu nunaqavissutut isigineqarput.

Suliat aatsitassarsiornermi inatsimmi ilaatinneqartut matusigallarnermi kisimik pineqarput. Inatsisit allat aqqutigalugit suliat matusigallarnermi eqqorneqarnavianngillat.

Apeqqummut tassunga tunngatillugu nutaarsiassaasarsimasunut linki:

• 2. januar 2024: London Miningip aamma Kalaallit Nunaanni Namminersorlutik Oqartussat eqqartuussivilersuussinerat
• 22. november 2021: Isukasiani atuinissamut akuersissut utertinneqassaaq

Attaveqarfik
Tusagassiorfinnit saaffiginnissutit: Jørgen T. Hammeken-Holm, oqarasuaat 346800 imaluunniit asn@nanoq.gl
Saaffiginnissutit allat: Aatsitassanut Aqutsisoqarfik, mlsa@nanoq.gl