Assigiinngisitsineq pillugu naammagittaalliuut Naligiimmik Pinninnissaq Pillugu Aalajangiisartunut ima saqqummiutissavat

Naligiissitaaneq assigiinngisitsinnginnissarlu pillugit inatsit Ulloq 1. juli 2024 atuutilerpoq. Suiaassuseq, naartuneq, qitornavissiartaarneq, qitornartaarsimalluni sulinngiffeqarneq, suiaassuseq kajungerfigisaq, suiaassutsikkut kinaassuseq, suiaassuseq ersersitaq, suiaassutsip ilisarnaatai, inuiaat ilisarnaataat, ammip qalipaataa, inuiaqatigiinni, inooqatigiinnermi imaluunniit inuianni pinngorfik, innarluuteqarneq, ukiut, politikkikkut isiginnittaaseq, upperisaq imaluunniit upperisaqarneq imaluunniit nakkarsarneqarneq toqqaannartumik imaluunniit toqqaanngitsumik misigisimagukku, Naligiimmik Pinninnissaq Pillugu Aalajangiisartunut naammagittaalliorsinnaaneq maanna periarfissanngormat, tamatuma kinguneraa.

-----------------------------------------------------------------------------------------------------

Piviusut: Toqqaannartumik aamma toqqaannanngitsumik assigiinngisitsineq

Toqqaannartumik assigiinngisitsineq tassaavoq inuup, inuup allap pisup assingani pineqarsimaneranit imaluunniit pineqartussaaneranit, ajornerusumik pineqarnera.

Toqqaannanngitsumik assigiinngisitsineq tassaavoq inuit imaluunniit inuit eqimattakkuutaat allanit ajornerusumik inissinneqarnerat. Taamaattoq tassunga ilaanngitsunik peqarpoq. Assigiinngisitsineq tunngavilersorluagaappat aamma naleqquttumik siunertanut ilapittuutaappat, inatsit atuutissanngilaq. Assersuutigalugu tamanna utoqqarnut immikkut ittumik akikilliinerusinnaavoq imaluunniit inunnut eqimattakkuutaanut aallaaviatigut amerlanerussuteqartunit annertunerusumik tapersersorneqarnissamik pisariaqartitsisunut iluaqutissaasinnaallutik.

-----------------------------------------------------------------------------------------------------

Piviusut: Suiaassutsikkut kinaassuseq, suiaassuseq ersersitaq aamma suiaassutsip ilisarnaatai

Paasinneriaatsit pingasut siornatigut inatsisiliornermi taaneqarsimanngitsut, inatsisimmi sammineqarput.

Suliaassutsikkut kinaassutsimi inuup ataatsip inuttut suiaassutsimut aalajangersimasumut ilaanerminik misigisimanera pineqarpoq.

Suaassusermi ersersitami inuup ataatsip, assersuutigalugu atisalersornermigut, nutsaminik inissiinermigut aamma pissusilersornermigut, suiaassutsiminik inuttut takutitsinera pineqarpoq.

Suaassutsip ilisarnaataani timimi suiaatsummi aalajangersimasumiittumi ilisarnaatit takussaasut takussaanngitsullu aamma suiassutsip aappaanit immikkooruteqartut, assersuutigalugu kinguaassiuutit, suiaassutsimut hormonit, nukiit- aamma orsut- pissusaat, iviangit, qooqqaq, takissuseq, siffissap silissusaa, kiatsip silissusaa aamma nipi pineqarput.

-----------------------------------------------------------------------------------------------------

Allakkamik allallutit, e-mail-imik allallutit, sianerlutit, inuttut saaffiginnillutit imaluunniit Atuisartoqarnermut Unammilleqatigiinnermullu Aqutsisoqarfiup Naligiimmik Pinninnissaq Pillugu Aalajangiisartunut internettikkut nittartagaani aua-gl/ligebehandling-imi naammagittaalliornissamut skiimap immersorneratigut naammagittaalliorsinnaavutit.

Paasissutissat suut naammagittaalliornermi ilaatillugit nassiunneqartussaanersut pillugit internettikkut nittartakkami atuarsinnaavatit.

Nammineq misigisimasat taamaallaat naammagittaalliuutigineqarsinnaapput. Allat sinnerlugit naammagittaalliorsinnaannginnerit, tamatuma kinguneraa.

Naammagittaalliuut nassiunneqarpat, Atuisartoqarnermut Unammilleqatigiinnermullu Aqutsisoqarfiup naammagittaalliuutip Naligiimmik Pinninnissaq Pillugu Aalajangiisartunit suliap suliarineqarnissaa isumagissavaa.

Naligiimmik Pinninnissaq Pillugu Aalajangiisartut naammagittaalliuummik suliaqarnermut atatillugu inunnit suliarisamik ilisimasalinnit nalunaarummik pissarsisinnaapput.

Naligiimmik Pinninnissaq Pillugu Aalajangiisartut suliami aalajangiippata, aalajangiineq pillugu allattoqarfiup akuusut ilisimatissavai aamma suliap eqqartuussivinnut saqqummiunneqarsinnaanera pillugu periarfissaq pillugu ilisimatitsissallutik.

Naligiimmik Pinninnissaq Pillugu Aalajangiisartut aalajangiineri inaarutaasumik aalajangiinerupput taamaammallu allaffissornikkut oqartussaasumit allamit nalilerneqarsinnaanatik. Naligiimmik Pinninnissaq Pillugu Aalajangiisartut aalajangiinerat isumaqatigineqanngippat, taamaammat suliap eqqartuussivimmut saqqummiunneqarnissaa taamaallaat periarfissaavoq.

Naligiimmik Pinninnissaq Pillugu Aalajangiisartut Naalakkersuisunit ulloq 20. juni 2024 toqqarneqarput. Aalajangiisartut aasaanerani sulinngiffeqarnerup kingorna siullermeerlutik ataatsimiissasut, Naalakkersuisunut ilisimatitsissutigineqarsimavoq. Taamaattoq massakkut naammagittaalliuutinik nassiussisinnaavutit.

-----------------------------------------------------------------------------------------------------

Naammagittaalliornissamut aqqutit

Internettikkut nittartagaq: https://aua.gl/ligebehandling/
E-maili: aua@nanoq.gl
Oqarasuaat: 32 80 33
Najugaq: Imaneq 29, init quleriit siulliat, 3900 Nuuk
Postboks 689
-----------------------------------------------------------------------------------------------------

Annertunerusumik paasisaqarusukkuit, Naalakkersuisoqarfimmi pisortaq Jørgen T. Hammeken-Holm, e-mail: joeh@nanoq.gl; oqarasuaat: 34 68 46 atorlugit attavigiuk.