Arctic Hubimut siulersuisunik toqqaaneq

Naalagaaffinngornissamut Nunanullu Allanut Naalakkersuisoq Vivian Motzfeldt ulloq 4. juli 2024-mi Arctic Hubimut siulersuisussanik toqqaavoq.

Ilisimatusarnermut, ilinniartitaanermut, nutaaliornermut, inuussutissarsiornermut inuiaqatigiinnullu ataatsimoorfeqalernissaq pilersinniarlugu Arctic Hub pilersinneqarsimavoq. Arctic Hub ilaatigut ilisimatusarnermi avatangiiseqartunut najukkanilu neqeroortartunut kiffartuussinikkut ilisimasatigullu attaveqaatinik pilersitsiniarnissamik suliassaqarpoq, tamannalu ilisimasat nutaat inuussutissarsiutillu nutaat aqqutigalugit ilisimatusarnikkut suliat angusallu iluaqutiginissaannut aqqutissiuusseqataasinnaavoq.

Ilaasortat toqqarneqartut tassaapput:

• Nuunu Ludvikka Johansen Jeremiassen, SIP-ip siulitaasua, Sulinermik Inuussutissarsiuteqartut Katuffiat (SIK)
• Elna Thomsen Heilmann, siulitaasoq, Ilinniartitsisut Meeqqat Atuarfianneersut Kattuffiat (IMAK)
• Frederik Larsen, pisortaq, Nunatta Katersugaasivia Allagaateqarfianilu

Danmarkimi Ilinniartitaanermut Ilisimatusarnermullu ministeriaqarfimmi Naalakkersuisut akornanni suleqatigiinnissamut isumaqatigiissiortoqarnerata kingunerisaanik Arctic Hub 2020-mi pilersinneqarpoq. Ilisimatusarnerup annertusiartortumik Kalaallit Nunaanni aallaaveqarnissaa aamma attanneqarsinnaasumik inuiaqatigiinnik ineriartortitsineq anguniarlugit Arctic Hub kalaallinit, danskinit nunanilu tamalaani Issittumi ilisimatusartunut Issittumilu soqutigisaqartunut immikkuullarissumik katersuuffissaatut atuuffeqassaaq.

Naalakkersuisup Vivian Motzfeldtip neriuutigaa, ilaasortanngorlaat ilisimatusarneq inuiaqatigiinni siammartissagaat taamatullu Kalaallit Nunaanni aamma Kalaallit Nunaat pillugu ilisimatusarnermut tunngatillugu suliat innuttaasunit peqataaffigineqarlutillu iluaquteqartussanngortillugit.

Kalaallit Nunaanit siulersuisunut ilaasortat saniatigut Danmarkimiit Arctic Hubimut sisamanik ilaasortaqalerpoq:

• Ulrik S. Korsholm, pisortap tullia DMI – Danmarks Meteorologiske Institut
• Torben Røjle Christensen, ilisimatusartunut pisortaq, Greenland Ecosystem Monitoring and Zackenberg Research Station
• Lise-Lotte Terp, CEO & Founder ProConsi International
• Ditte Mesick, pisortap tullia, Uddannelses- og forskningsstyrelsen

Paasissutissat sukumiinerusut pillugit attavigineqassaaq: Naasunnguaq Beck Kristensen, naalakkersuisup allattaa, e-mailikkut: nabk@nanoq.gl oqaraasuaatikkulluunniit +299 345682