Naalakkersuisut takornariaqarnerup iluani attaveqaasersuutinut 3,8 mio.-t sinnerlugit tapiissuteqartut

Photo by Ívar Eyþórssony - Visit Greenland

Ukiorpassuarni nunatsinni pinngortitami sumiiffiit immikkuullarissut ornigarluarneqarsimanermik kinguneranik aserfallassimaqaat. Sumiiffiit arlallit takujuminarsarniarlugit allagartalersuisoqaranilu atortulersuisoqarsimanngilaq.

Kommunit taakkualu ineriartortitsinermik suliaqartartui qinnuteqarneatigut attaveqaasersuutinut minnerusunut aningaasaliissutaasimasunit tapiissutinik Naalakkersuisut tunniussipput. Ilaatigut Qassiarsummi innarluutillit perusuersartarfinnik atuisinnaalernissaannut, pisuffissanik sanaartornissamut, Kapisillit nalaanni isikkivissiornissamut ikaartarfinnullu, Ilulissani ikaartarfinnut, Upernavimmi Siorapalunnilu illoqarfimmi allagartalersuinissamut aningaasaliisoqarsimavoq.
Suliniutit maanna aasallu ingerlanerani aallartisarneqarsinnaapput, ukiullu naanerani naammassereersimassallutik.

Naalakkersuisoq Naaja H. Nathanielsen, ima oqaaseqarpoq:
”Sumiiffinni ataasiakkaani pinngortitap avatangiisillu illersornissaannut attaveqaasersuutinut minnerusunut aningaasaliissutaasimasunik agguaasinnaagatta nuannaarutigeqaarput. Pinngortitami pingaartitatta qulakkeerneqarnissaat siunissamilu illersorneqarnissaat pingaaruteqarpoq. Aningaasaliissutaasut takornariaqarnerup iluani piujuartitsinermut iluaqutaapput, kiisalu sumiiffinni sanasunut pilersuisunullu, pineqartunik suliaqartussaasunut tapersersuinerullutik.”

2027-p tungaanut kommunit taakkualu ineriartortitsinermik suliaqartartui ukiumut attaveqaasersuutinut minnerusunut aningaasaliiffigitinnissamut Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmut qinnuteqarsinnaapput. Qinnuteqaatit upernaakkut nassiunneqartassapput.

Paasissutissat sukumiinerusut pissarsiariniaraanni naalakkersuisup allattaa Jeanette L. Petersen attavigineqassaaq uunga 34 52 06 imaluunniit mailimut: isiin@nanoq.gl.

Aningaasaliiffigineqartut

Avannaata Kommunia

• Ilulissani anartarfik ingerlaartartoq anngajaaq akiliisarfilik
• "Nakkaavik"-up tungaanut ikaartarfik
• Isikkivinnut issiaartarfinnut ikaartarfik
• Iliveqarfik qaangerlugu ikaartarfik pisuffissaq sungaartumi
• Sermermiuni isikkiviup tungaanut ”piratsti”-tut taaneqartartup nalaani ikaartarfik
• Pisuffissaq sungaartumi Nukissiorfiup tunuani ikaartarfik/majuartarfiit
• Kunngip ikaartarfiata aaqqissuunneqarnissaa
• Siorapalummi illoqarfimmi allagartat
• Qattarmiunut pisuffissap nalunaarsorneqarnissaa
• Upernavimmi illoqarfimmi allagartat paasissutissartallit
• Illoqarfiup kortiinut ilisiffissat

Qeqqata Kommunia/ Arctic Circle Business

• Itinneq Bridge
• Kangerluarsunnguaq Trail

Kommuneqarfik Sermersooq

• Nuup tunuanukarnissamut aqqutissanik pitsanngorsaaneq
• Kapisilinni pisuffissanik isikkivissiornissamullu sanaartorneq
• Paamiut: Nasiffik/Qaqqittarfik/Blue pointimut majuartarfinnik pitsanngorsaaneq
• Ittoqqortoormiini perusuersarfinnik tamanit atorneqarsinnaasut
• Kapisilinni taseq 1(alleq) taseq 2-llu nalaani ikaartarfiliorneq

Kommune Kujalleq

• Containerit 3 x 5 perusuersartarfiit, containerit tamarmik ataatsimik innarluutilinnut perusuersartarfeqassapput
• Containereq ataaseq perusuersartarfissaq, marlunnik perusuersartarfeqassaaq
• Perusuersartarfiit tamanit atorneqarsinnaasut, perusuersartarfiit ikuallaavittallit
• Qassiarsummi perusuersartarfinnik nutarterineq