AtuartigukKitaata avannarpasissuani avataasiorluni misileraalluni saarullinnik aalisarneq pilersinneqarpoq
Nassiussisuuvoq: Aalisarnermut Piniarnermullu Naalakkersuisoqarfik
Kitaani, sumiiffinni (1D, 1E aamma 1F) NAFO-p kujasinnerusortaani misileraalluni saarullinnik aalisarneq pilersinneqareernikuuvoq. Kitaata avannarpasissortaani (NAFO 1A, 1B aamma 1C) avataasiorluni misileraalluni saarullinniarnerup taamaaqataanik nutaamik pilersitsisoqassasoq Aalisarnermut Piniarnermullu Naalakkersuisoq aalajangerpoq. Tassunga tunngaviusut piumasaqaatillu kujasinnerusumi misileraalluni aalisarnermut naapertuupput. Misileraalluni aalisarnermut allaaserinninneq pillugu tunngaviusut piumasaqaatillu taakkua uani atuarneqarsinnaapput.
Misileraalluni aalisarnissani immikkut piumasaqaatit ilaat Naalakkersuisoqarfimmit erseqqissumik saqqummiukkusunneqarput. Imartat NAFO-p oqartussaaffigisani pingasuusuni misileraaffigineqartussani piffiit ilaat ataasiinnaq marlulluunniit kisiisa misileraaffiginissaanut qinnuteqartoqarsinnaanngilaq. Pisassat peqataasussat akornanni ajornanngippat assigiimmik agguaanneqassapput imartanilu NAFO-p oqartussaaffigisaani ataasiakkaani pisassaminnik tunineqassallutik.
Naalakkersuisoqarfiup erseqqissaatigissavaattaaq peqataasut ilisimatuussutsikkut atugassanik misiligutissanik tigusisarnissamik aammalu Pinngortitaleriffimmut aalisakkanik nassitsisarnissamik piumasaqaat malittussaammassuk. 2023-mi misileraanermit misilittakkat naapertorlugit misiligutissanik tigusisarnissamik ilitsersuutit maleqqissaarneqarsimanngillat, tamannalu misileraalluni aalisarnerup ingerlasimaneranik nalilersuinermi unammillernartoqartitsivoq. Ilisimatuussutsikkut misissugassanik misiligutissanik tigusisarneq misileraanermi tunngaviit pingaarnersaraat taamaattumillu misiligutissat tamarmik pimoorullugit naammassineqartassapput, nalunaarsorneqartassapput nalunaaqqutserneqarlutillu misiligutissanillu tigusisarnissanut ilitsersuut akuersissummut ilanngullugu nassiunneqartussaq naapertorlugu Pinngortitaleriffimmut nassiunneqarlutik. Akuersissuteqarnermut atatillugu pineqartoq piumasaqaataammat 2024-mi misiligutissanik tigusisarnissat 2025-mi misileraanerit ingerlanneqassappata tassani qinnuteqartut aallaavigalugit ingerlanneqassapput.
2024-mi misileraalluni aalisarnissani peqataanissamut qinnuteqarusuttut qinnuteqarfissat uaniittut Sullissivikkut una linki aqqutigalugu qinnuteqarsinnaapput
Peqataanissaq pillugu qinnuteqaatip nassiunnissaanut piffissaliussaq kingulleq tassaavoq ulloq: 16/07/2024
Paasisaqarnerorusukkuit Aalisarnermut Piniarnermullu Naalakkersuisoqarfik attavigiuk , apn@nanoq.gl.
______________________________________________________________________________
Ilisimatitsissutit: Kujataa tungaani saarullinnik misileraalluni aalisarnissamut suliaqarnermit Pinngortitaleriffimmit nalunaarut Aalisarnermut Piniarnermullu Naalakkersuisoqarfimmit ingerlateqqinniarpaa:
Saarullinniarnermi DNA atorlugu misissueqqissaartarnerit peqassutsinut tunngatillugu Pinngortitaleriffiup nalilersuisarnerini pingaarnerpaapput, Pinngortitaleriffillu naapertorlugu tamakku misissoqqissaarneqartarnissaat akissaqartinneqanngilaq. Misissueqqissaarinermut ingerlatseqatigiiffiit peqataasut aningaasatigut tapiisinnaanerat Pinngortitaleriffimmit ujartorneqarpoq. Ingerlatseqatigiiffiit aningaasaleeqataassutissaat misileraanermi peqataanermut sanilliullugu annertugisassaanngillat. Pinngortitaleriffiup nalunaarutigaa NAFO oqartussaaffigisaani ataasiakkaani misiligutissat amerlanerpaamik 200-iussasut misissugassallu ataatsip misissorneqarnera 200 koruunit missaanik akeqartoq.
Annertunerusumik paasisaqarusukkuit Pinngortitaleriffimmut saaffiginnigit, fisk-afdeling@natur.gl