Upernavimmi, Nanortalimmi Narsamilu maannakkut inuusuttunut inissialiortoqalerpoq

Upernavimmi, Nanortalimmi Narsamilu inuusuttunut inissialiornissamut atugassanngortitsinissamik Naalakkersuisut qinnuteqaataat Inatsisartut Aningaasaqarnermut Akileraartarnermullu Ataatsimiititaliaata akuerisimagaa, Ineqarnermut Attaveqaasersuutinullu Naalakkersuisup Hans Peter Poulsenip annertuumik nuannaarutigalugu maannakkut paasissutissiissutigisinnaalerpaa. Akuersissuteqarnermi sanaartornermut akigititassat inaarutaasut isumaqatigiissuteqarfigineqarsinnaalerput, taamaalillutik atortussat ukioq manna inniminnerneqarsinnaalerlutik suliaqarnerlu aallartinneqarsinnaalerluni. Inuusuttunut inissiat tunniunneqarnissaat atorneqalernissaallu naatsorsuutigineqarpoq 2025-mi oktobarimi pissasoq. 

Inoqarfinni pingasuni tamaginni neqeroortitsinermi najukkami entreprenøri ajugaasuuvoq.

Ineqarnermut Attaveqaasersuutinullu Naalakkersuisoq Hans Peter Poulsen ima oqaaseqarpoq: 
”Inuusuttut inoqarfinni minnerusuneersut sumiiffimmi angerlarsimaffigisaminni najugaqaannarusuttartut misigisarparput. Taamatut kissaateqarnermi, ajoraluartumik sumiiffippassuarni inuusuttut pisariaqartitaannut naleqquttunik inissaaleqisoqarnera ilungersunartorsiortitsisarpoq. Inuusuttunut inissianut najoqqutassaq atorlugu pisariaqartitsineq naammassiniarsaraarput aammallu inoqarfinni minnerusuni inuusuttut inersimasunngornerminnik aallartinnissamut aalajaatsunik toqqammavissaqalersinniarlugit.” 

Upernavimmi inissiat pingasut sananeqassapput. Nunaminertaq inuusuttunut inissianik sanaartorfiusussaq kommuni aamma najukkami ataatsimiititaliaq suleqatigalugit nassaarineqarpoq, aammalu inissiat ukioq tamaat imeqarnermut attavilerneqarnissaat periarfissaqarluni. Upernaviup illoqarfia naammattunik kuuffilersuilluni inerisagaanngilaq, aammalu sanaartorfissat atorneqanngitsut killeqarput. Taamaattumik nusuttakkanik WC-liinissamut periarfissalimmik sanaartorfissamik nassaarnissaq iluatsissimanngilaq. Taamaattumik inissiani puussialertakkanik perusuersartarfiliisoqassaaq.

Nanortalimmi inissiat sisamat sananeqassapput. Nunaminertaq inuusuttunut inissianik sanaartorfiusussaq kommuni aamma najukkami ataatsimiititaliaq suleqatigalugit nassaarineqarpoq, aammalu inissiat sumiiffimmi ukioq tamaat imeqarnermut attavilerneqarnissaat kiisalu kuuffeqarfinnut pingaarnernut kuuffiit attavilernissaat periarfissaqarluni.

Narsami inissiat sisamat sananeqassapput. Nunaminertaq inuusuttunut inissianik sanaartorfiusussaq kommuni aamma najukkami ataatsimiititaliaq suleqatigalugit nassaarineqarpoq, aammalu inissiat sumiiffimmi ukioq tamaat imeqarnermut attavilerneqarnissaat kiisalu kuuffeqarfinnut pingaarnernut kuuffiit attavilernissaat periarfissaqarluni.

Inuusuttunut inissianut najoqqutassaq pillugu
Inuusuttunut inissiat, assigiissaartutut najoqqutassami ilaatillugu, ineriartortinneqarput, tassani aallaavigineqarluni inissiat inoqarfinni minnerusuni sananeqarnissaat pisariitsuussasoq, aammalu piujuartitsinissaq pitsaassuseqartitsinissarlu pillugit pingaarnertigut takorluukkanut naapertuutissasoq, tassani aningaasaqarnerup, avatangiisit, silap pissusaata inooqatigiinnerullu oqimaaqatigiinnissaat eqqarsaatigineqarluni. 

Suliassaq inuusuttup nammineerluni najugaqarnissamut ikiorneqarluni inersimasunngornissamut inuusuttup alloriarfissaatut eqqarsaatigineqarpoq. Inuusuttup alloriarnissaa ajornannginnerulersinniarlugu inissiat tamarmik aamma assigiissaakkanik, iserternissamut pisariuallaarunnaarsitsisussanik, pequtilersugaassapput, aammalu attartortussap inissinnialernermini aningaasartuutissai annikinnerpaamiitinneqarsinnaallutik. 

Inissiat ataatsimik initalittut inissiatut aaqqissuunneqassapput angissusaa tamakkerluni 45 m² missaanniissalluni, tassani isaariami torsuusap angisuup saniatigut errorfilimmik errorsivimmullu inissaqartillugu igaffik affarleqartillugu aaqqissuunneqassalluni. Igaffiup affarlianiit uffarfimmut/perusuersartarfimmut isertarfeqassaaq isersimaartarfeqassallunilu. Isersimaartarfimmiissapput igaffik nerinissamut inissaqarluni, isersimaartarfittut immikkoortumi sofaqarlunilu ikkami qarajarluusanngorlugu siniffiliaqassaaq siniffilerneqarsinnaasumik. Qerititsivimmut piniarnermullu atortunut, quimi tassunga atasumi inissinneqarsinnaasunik uninngasuutigineqarsinnaasunillu, inissaqartitsinissamik pisariaqartitsinissaq, ilanngullugu aamma eqqarsaatigineqarpoq.

Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl