AtuartigukQeqertarsuarmi inuusuttunut inissialiassat sisamat aasamut aallartinneqassapput
Nassiussisuuvoq: Ineqarnermut Attaveqaasersuutinuullu Naalakkersuisoqarfik
Qeqertarsuarmi inuusuttunut inissiassanik sisamanik sanaartornissamut aningaasanik atugassanngortitsinissamik Naalakkersuisut noqqaassutaat, Inatsisartut Aningaasaqarnermut Akileraartarnermullu Ataatsimiititaliaata maanna akuerimmagu Ineqarnermut Attaveqaasersuutinullu Naalakkersuisup Hans Peter Poulsenip nuannaarutigilluinnarpaa.
Ineqarnermut Attaveqaasersuutinullu Naalakkersuisoq Hans Peter Poulsen ima oqaaseqarpoq:
”Inuusuttunut inissiaqartitsinerput maanna Qeqertarsuarmi aamma aallartinneqarsinnaalermat nuannaarutigaara. Inoqarfinni minnerni inuusuttut pisariaqartitaannut naleqqussakkanik inissianik amigaateqartoqarnerani, inuusuttunut inissiat inuusuttunut ikiuutaapput pingaarutillit. Inuusuttup inersimasunngornermut ikaarsaarnissaani, inuusuttunut inissiaq ikaarsaarfiusinnaavoq pingaarutilik.”
Akuersissuteqarnikkut inaarutaasumik isumaqatigiissusiortoqarsinnaalerpoq, taamaalillunilu umiarsuup siulliup, aappaatalu angumerinissaat siunertaralugu, atortussanik piniartoqarsinnaalerluni. Taamaalilluni inuusuttunut inissialiassanik sanaartorneq 2024-mi juunip naanerani aallartinneqarsinnaassaaq, naatsorsuutigineqarlunilu 2025-mi novembarip aallartinnerani tunniunneqarlutillu atulissasut.
Inuusuttunut inissiat katillugit sisamat, tamakkiisumik 213 m2-iusussat sanaartorneqassapput. Najukkami sanaartugassanik suliassinneqartartoq, najukkamilu nunaminertanut oqartussaasup suleqatiginerisigut nunaminertami nassaarisami, inuusuttunut inissiat sanaartorneqassapput.
Nunami inoqarfinni minnerni inuusuttunut inissianik pisariaqartitsinerup iliuuseqarfigineqarnissaa, inuusuttunut inissialiornerni siunertaavoq. Inuusuttorpaaluit najugartik qimakkusunnagu kissaateqartarput, pisariaqartitaminnulli naleqqussakkanik inissianik amigaateqartarlutik.
Ineqarnermut Attaveqaasersuutinullu Naalakkersuisoqarfiup paasissutissiissutigisinnaavaa, Kangaamiuni Inuusuttunut inissialiassat neqeroortitsissutigineqarnerat taamaatinneqarmat. Pilersaarut qaqugu neqeroortitsissutigineqaqqittariaqarnersoq Naalakkersuisoqarfiup misissussavaa.
Inuusuttunut inissiaqartitsineq pillugu
Nalinginnaasumik najoqqutassiamut atatillugu inuusuttunut inissiat ineriartortinneqarput, tassanilu inissiat inoqarfinni minnerni ajornanngitsumik sanaartorneqarsinnaanissaat kiisalu aningaasaqarneq, avatangiisit, silap pissusaa, inooqataanerlu oqimaatigiissinneqarlutik piujuartitsinissamik, pitsaassutsimillu ataatsimut takorluugaqarnermut naapertuunnissaat aallaavigineqarluni.
Inuusuttoq nammineersinnaalernissaminut ikiorneqarluni, inuusuttup inersimasunngornermut ikaarsaarfissaatut pilersaarut eqqarsaataavoq. Iserternermi isumagisassat annertunatik, attartortullu inissiamut iserternermini aningaasartuutissai minnerpaaffimmiisissinnaallugit, ikaarsaariarneq inuusuttumut ajornannginnerulersinniarlugu inissiat tamarmik assigiinnik aamma pequtsersugaassapput.
Inissiat ataatsimik initaqassapput, tamakkerlutillu 45 m²-it missaannik angitigissallutik, torsuusallu angisuujunerata saniatigut igaleq errorfittaqassaaq, errorsivillu inissaqassalluni. Igaffiup silarlianit uffarfimmut/perusuersartarfimmut aammalu inimut isaariaqassaaq. Ini igaffittaqassaaq nerisarfittalimmik, aammalu nalaasaarfittaqassaaq siniffimmullu immikkoortoqassalluni. Qerititsiveqarfimmik piniutaasivimmillu aamma pisariaqartitsineq eqqarsaatigineqarput, taakkulu quimut illumut atasumut inissinneqarsinnaassallutik.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl