Inissiat attartortittakkat sisamat Qaanaami sananeqassapput

Inatsisartut Aningaasaqarnermut Akileraartarnermullu Ataatsimiititaliaata Qaanaami inissiat attartortittakkat sisamat sananeqarnissaannut aningaasanik atugassanngortitsinissamut Naalakkersuisut qinnuteqaataat akueraat. Akuersissuteqartoqarneratigut suliarinnittussanut isumaqatigiissutit inaarutaasut atsiorneqarsinnaalissapput, atortussallu pisariaqartut inniminnerneqarsinnaalissallutik, taamaalillunilu suliassat aasamut aallartinneqarsinnaalissapput. Inissiat najukkami sanaartugassalerisumit saneqassapput, aammalu 2026-mi septembarimi atulersinnaanissaat naatsorsuutigineqarpoq.

Ineqarnermut Attaveqaasersuutinullu Naalakkersuisoq Hans Peter Poulsen oqarpoq: 
”Inatsisartut Aningaasaqarnermut Akileraartarnermullu Ataatsimiititaliaat suliamik kajumittumillu suliaqarneranut aammalu Qaanaami najukkami sanaartugassalerisoq suleqatigiilluarnitsinnut qutsavigaakka. Neriuppunga inissiat attartortittakkat nutaat Qaanaami innuttaasut najukkaminni najugaqaannarnissaannut ajornannginnerulersitsissasut. Naalakkersuisut nunatsinni najugaqarfinni minnerni inuunerup oqinnerulernissaanut iluaqutaanissartik anguniagaraat.” 

Qaanaami inissiat attartortittakkat sisamat inuusuttunut inissiat sanaartorneqarnerinut malitsigititatut sananeqassapput. Inuusuttunit inuusuttunut inissianut innersuunneqartunit arlallit piffissap ingerlanerani najukkamini imaluunniit sumiiffimmi allami namminneerlutik inissaminnik qulakkeerinnissinnaanissaat naatsorsuutigineqarpoq. Tamanna inissiamik nammineerluni pigisassamik pisinikkut, illumik sanaqataaffiusumik sananikkut imaluunniit namminersortunit attartornikkut pisinnaavoq. Taamatuttaaq inuusuttunit arlalinnik, najukkaminni najugaqaannarnissamik kissaateqartunik, kisiannili namminneerlutik inissiamik qulakkeerinissamut periarfissaqanngitsunik peqassasoq naatsorsuutigineqarpoq.
Inissianik attartortittakkanik sanaartornermi immikkoortut taakku siunnerfigineqarput. Qaanaami inuusuttunut inissianik attartortut ataasiakkaat siunissami qanittumi 24-liisimasussaapput, tamatumunngalu atatillugu inuusuttunut inissiaq attartugartik qimattussaallugu. Pineqartunut taakkununnga inissianik qulakkeeriniarluni, taamaalillunilu inuusuttut qanigisaminnut uterlutik imaluunniit najugartik qimallugu nuuttariaqalernissaat pinngitsoortinniarlugu, Qaanaami inissiat attartortittakkat sisamat ukioq manna aallartinneqareertussaapput. 
Qaanaami inissiat attartortittakkat nunaminertani, kommuni aamma najugaqartut, illoqarfimmi sanaartorfissanik naleqquttunik ilisimasallit suleqatigalugit nassaarineqartuni sanaartorneqassapput. Illut ukioq kaajallallugu imeqartussatut pilersaarusiugaapput, kisiannili imermut tankimik sillimmatissamik 2000 literimik, inissiat imermik pilersorneqarnerinik qulakkeerissutaasussanik pilerneqassapput, Qaanaami ukioq kaajallallugu imermik pilersuineq ilaanneeriarluni unittoorsinnaasarmat. Inissianik attartortittakkanik sanaartorfissaq kuuffilersugaanngilaq, Qaanaaq ataatsimut isigalugu imermut minguttunut mingunnginnersumullu kuuffilersugaanngimmat. Illoqarfiup kangimut sammisortaani imermut errortuutikumut aqqusersuut pingaarneq, immamut kuutsinneqartoq pigineqarpoq, taannali taamaallaat imermut mingunnginnerusumut atorneqarput. Tamanna pissutigalugu inissianit attartortittakkaniit erngup mingunnginnerusup nunamut kuutsinneqartarnissaa, aammalu qernertunik puulertakkanik anartarfeqarnissaat pilersaarutigineqarpoq.  

Najugaqarfinni minnerusuni attartortittakkanik inissiaqarneq
Najugaqarfinni minnerusuni inissianik attartortittakkanik nalinginnaasunik najugaqartut, aammalu najugaqarfinnut minnerusunut assartuussineq, tikisitsisarneq, atortunik passussisarneq piffissallu sanaartorfiusartut aallaavigineqarput. Taamaattumik Illorput 2023-mik illuliortarnissaq aallaavigineqarpoq. Illuliassaq taamaattoq najugaqarfinni minnerusuni pissutsinut eqqarsaatigisassanullu immikkut ittunut naleqqussagaareerpoq. 

‘Najugaqarfinni minnerusuni inissianut attartortittakkanut najoqqutassiaq’ malillugu illuliassat illutut uiguleriittut affarleriittulluunniit, ataatsimut teknikkeqarfilittut ilusiligaassapput. Inissiat tamarmik immikkut isaariaqassapput/errorfilinnik, asaataasivilinnik, kavaajanut naatiffilinnik sikaavilinnillu igaleqassapput, tassanngaaniillu uffarfimmut perusuersartarfimmullu, aammalu iggavimmut ammaannartumik inilimmut isaariaqassapput. Taakku saniatigut inissiat ataatsimik sinittarfeqassapput, angissusii kisermaanut kiisalu aappariinnut naleqqutissapput, aammalu aappariiusinnaapput, ataatsimik amerlanerusunilluunniit meerallit, inersimasumik/-nik sinittarfeqaqateqarsinnaasunik. Inissiat 57,3 m2-nik angissuseqassapput, taakkununngalu teknikkeqarfik, majuartarfik majuartarfiillu sangoriaat ilanngukkaanni 88-89 m2-nik angissuseqarlutik. Inissiat silataaniissapput majuarfiit sangoriaat, tassanngaanniillu illup teknikkeqarfiat iserfigineqarsinnaassaaq. Illut silataat qisunnik qallerneqassapput, aammalu aappaluttumik taartumik qalipanneqassallutik.

Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl