Killavaat Alannguat pillugu Demokraatinut ammasumik akissut

Allattoq Naaja H. Nathanielsen, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq.

Killavaat Alannguanni aatsitassarsiorfissap Tanbreezimit pigineqartup siumut ingerlanera pillugu allakkanik ammasunik Demokraatit Naalakkersuisunut nassiussipput. Allakkani Demokraatit Naalakkersuisunut arlalinnik apeqquteqarput. Tanbreezip ingerlatseqatigiiffimmit allamit tiguneqarsimanera pillugu nutaarsiassamut Naalakkersuisut isumaat Demokraatit paaserusuppaat. Tamatuma saniatigut Kommune Kujallermi kommunip aningaasaqarnikkut ilungersunartorsiornera eqqarsaatigalugu, inuussutissarsiortunut suliniutissanik nutaanik sulissutiginninnissamut Naalakkersuisut piumassuseqarnersut kajumissuseqarnersullu Demokraatit akissutissarserusuppaat.

Naalakkersuisut aatsitassanut suliassaqarfimmi siumut ingerlanissaq aammalu inuussutissarsiutit ataatsimut isigalugit ineriartortitsinissaq sulissutigimmassuk, erseqqissarlugu aallarniutigilara. Naalakkersuisut inuussutissarsiornermut inatsisinik nutarterineq aallartilluareermassuk, tamanna takuneqarsinnaavoq. Aatsitassanut suliassaqarfimmi inatsisinik nutarterilluni ukiuni arlalinni suliaqarneq Naalakkersuisut naammasseqqammerpaat, taamaalilluni ilaatigut najukkaneersunut annikitsumik aatsitassarsiorluni suliassaqarfiup iluani aallartinnissamik kissaateqartunut akuersissuteqarnissamut sukkanerusumik periarfissaqalerluni maleruagassallu ikinnerulerlutik. Demokraatit suliaqarneq taanna akerleralugu taasipput.

Tamatuma saniatigut Naalakkersuisut aatsitassanut periusissiamik nutaamik, ukiup nikinneraniit atuutilertussamik, suliaqarneq ingerlappaat. Ingerlatseqatigiiffinnut aningaasalersuinissamut periarfissanik siuarsaanissaq Naalakkersuisut ilungersuullugu sulissutigaat. Assersuutigalugu direct marketing atorlugu aningaasalersuisartuusinnaasunik ataatsimeeqateqarnertigut, isumaqatigiissuteqarnertigut, soorlu EU-mut isumaqatigiissut siorna novembarimi isumaqatigiissutigineqartoq, suleqateqalernikkut, soorlu Naalakkersuisut ilannguffigeqqammigaanni naapittarfimmi amerikamiunit siulersorneqartumi peqataanertut ittumik, aammalu nuisitsivinni ataatsimiinnernilu peqataanertigut.

Takornariartitsisarnermut suliassaqarfimmi Naalakkersuisut takornariartitsinermut inatsit suliaraat, tassani najukkani sullivissat aamma najukkanik suliffeqarfiit iluaquserneqartussaallutik aammalu inuussutissarsiutinik ineriartortitsinissatsinnut, peqatigisaanillu ukiuni makkunani takornariarpassuaqalernerani pinngortitap kulturillu paarilluarnissaannut pisariaqartunik killissalersuisoqassalluni. Misissueqqissaarneq saqqummeqqammerpoq, tassani takutinneqarluni takornariartitsisarneq nunatta aningaasaqarnerani annertuumik ilaasoq pingaaruteqartorlu, aammalu takornariartitsisarneq siuariartortoq.

Ukiamut Naalakkersuisut aallarnisaasartunut ataatsimoortitanik saqqummiussissamaarput, tassaniissallutik inatsisit aammalu suliniutissat nutaat. Suliaqarnerit ilai annertuut aallartinneqareerput, tassami ukioq manna aningaasanut inatsimmi taarsigassarsiaaqqanut aningaasassanik amerlanerusunik immikkoortitsisoqarmat, taannalu aaqqissuussineq iluatsilluartumik ingerlasimasoq paasinarsisimalluni.

Tassalu aappi, – inuussutissarsiutit nunarput tamakkerlugu iluaqutaasussarpiaat iluanni -inuussutissarsiortunik aammalu inuussutissarsiornermut periarfissanik ineriartortitsinissaq ilungersuutigalugu sulissutigineqartoq, Naalakkersuisut Demokraatit eqqissisarsinnaavaat.

Killavaat Alannguat pillugu inissisimanermut tunngatillugu, aatsitassarsiorfiutileqatigiiffik Tanbreez siunissami aningaasaliinissat pillugit isumaqatigiissuteqarsimasoq, Naalakkersuisut ilisimatinneqarsimapput. Naalakkersuisut uppernarsaatinik Tanbreezimiit suli tigusaqanngillat, kisianni aningaasaliineq annertusiartuaartinneqartussaq, aatsitassarsiorfiutileqatigiiffiup tiguneqarsinnaaneranik malitseqarsinnaasoq, tassani pineqartoq paasivarput. Tamanna ilusiliaavoq ingerlatseqatigiiffeeqqanit akuttunngitsumik atorneqartartoq. Aatsitassanut suliassaqarfimmi aningaasaliinerit aamma aatsitassarsiorluni misissuinissamut pisinnaatitsissutit amerlassusai 2023-mi amerlanerpaaffimminiilersimanerannut, nutaarsiassaq naapertuuppoq. Taamaalilluni nutaarsiassat nuannersut arlallit taanna ilagaat.

Aaqqiissutissat eqqortut inissinneqarnissaasa sulissutiginissaanut Naalakkersuisut kajumissuseqartuaannarput, taamaalilluni nunarput tamakkerlugu aatsitassarsiorfiutileqatigiiffinnik pissusiviusuni ineriartortitsisoqarsinnaassalluni. Inatsisit, akuersissutit, akuersissuteqarnerit isumaqatigiissutillu isumaqatigiissutigineqarsimagaluartut malinneqarnissaat, Naalakkersuisutut akisussaassusilittut piumasaqaataaginnarpoq.