Kulturikkut nersornaat Konrad Nuka Godtfredsenimut kajumissaammullu nersornaat Heidinnguaq Jensenimut

Ukioq manna kulturikkut nersornaat titartaasartumut Konrad Nuka Godtfredsenimut tunniunneqarpoq, aammalu kajumissaaserneqarluni taalliortoq erinniartorlu Heidinnguaq Jensen.

Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqanermullu Naalakkersuisoq Aqqaluaq B. Egede Katuami nersornaatit Inuiattut Ullorsiorfimmi juunip 21-ani 2024 tunniuppai.

Konrad Nuka Godtfredsen pillugu Aqqaluaq B. Egede ilaatigut oqarpoq:

• Eqqumiitsuliortutut nersugaavoq, piviusorpaluttunillu titartakkanik nangeqattaartulianik, tassa tegneserialiornermik, immikkut ilisimaneqalissutiginikuuaa. Suliamut pulavinnissamik, piffissamik atuinissamik tunniusimanissamillu taamatut suliaqarneq piumasaqartarpoq. Taamatullu suliaqarneq filmiliornermut aamma eqqaanartuuvoq.
• Inuiaqatigiinni titartakkani Andala tusaamasaassutigilerpaa, tassaasoq inuk allatut periartarnermigut pillaqqissuseqartoq imminullu pingaartinngilluinnartoq.
• 2007-imi Nationalmuseets Center for Grønlandsforskning suleqatigalugu nersorniagarput titartakkanik nangeqattaartulianik suliaq annertooq “Oqaluttuat” aallartippaa, taakku oqaluttualiat sisamaapput assiliartalersugaallutik nunattalu oqaluttuarisaanera itsarsuarnisaq pillugu saqqummersitsillutik.
• Inuit aamma qallunaatsiaat inooriaasitoqaat titartakkamini assilianngortilluarpaa, titartakkat atorlugit uummarissisillugit – uagullu eqqarsalersittarpaatigut isumaqalersittarlutalu inuit kulturitoqaanni aamma qallunaatsiaallu kulturitoqaanni inuuneq qanoq ittuusimanersoq.

Heidinnguaq Jensen pillugu Aqqaluaq B. Egede ilaatigut oqarpoq:

• Eqqumiitsuliortutut piginnaasalittut erinagissutullu ineriartornera maluginiarneqarpoq. Kiffaanngissuseqarnermut, maqaasinermut, annilaanganermut, oqimaatsunik nanertuuteqarnermut, aamma inuunermi ajornartorsiorfinnit qaangiiniarnermut erinarsuusiai ilaatigut tunngassuteqarput. Taallat akunnaatsuullutik itisuunik oqariartuuteqarput, uniinnannginnissamut qiimasuunissamullu kajumissaarisuullutik. Taallat aammattaaq nutaanik siunissamilu misigisaqarnissamut, minnerunngitsumillu asanninnermik, imaqarput.
• Taallat nammineq misigisimasanit misigissutsinillu ilaatigut aallaaveqarput. Uummannaq Musicimi ukiuni qulini kingullerni takutitsisartutut erinarsuusiortutullu ineriartorsimavoq, minnerunngitsumillu inuttut. Inuusukkaluaqaluni taalliornermigut pikkunartunik oqariartuuteqarsinnaasimavoq, meeqqanut inuusuttunullu arlalitsigut isumassarsiffissaallunilu maligassiuisuulluni.

Naalakkersuisut Kulturikkut Nersornaat 1982-mi pilersippaat. Nersornaat 50.000 kr.-nik aningaasartaqartoq inummut ataatsimut arlalinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarluarsimasunut tunniunneqartarpoq. Nersornaat ukiut tamaasa Inuiattut Ullorsiornitsinni juunip 21-ani tunniunneqartarpoq. Naalakkersuisut kajumissaatitut nersornaasiuttagaat 10.000 kr.-nik aningaasartaqartoq 2016-mi pilersinneqarpoq. Nersornaat inuusuttumut piginnaanilimmut Kulturikkut Nersornaasiisoqarnerani tunniunneqartarpoq.

Annertunerusumik paasisaqarusunnermi saaffigineqarsinnaavoq Naalakkersuisumut allatsi Rosa Thorsen (Departementet for Uddannelse, Kultur, Forskning og Kirke)
Toqq/direkte 34 5702, email ROSE@nanoq.gl