Kalaallit Nunaata Parisimi isumaqatigiissut akuerigaa

Naalakkersuisut ullumikkut - ulloq 20. juni 2024 - nalunaarutigaat Kalaallit Nunaata Parisimi isumaqatigiissut akuerigaa. Kalaallit Nunaata Parisimi isumaqatigiissummik akuersinera pillugu nalunaarneq FN-ip silaannaq pillugu allattoqarfiani Allattaaneq Simon Stiell aamma ineriartortitsinermik suleqatigiinnermut nunarsuarmilu tamarmi silaannaq pillugu politikkeqarnermut ministeri Dan Jørgensen najuuttoralugit pivoq.

Nunalerinermut, Imminut Pilersornermut, Nukissiutinut Avatangiisinullu Naalakkersuisup Kalistat Lundip ullumikkut – Naalakkersuisut sinnerlugit – Kalaallit Nunaata Parisimi isumaqatigiissummik akuersinerata FN-ip silaannaq pillugu allattoqarfianut nalunaarutiginissaa pillugu Inatsisartut aalajangernerat piviusunngortippaa. Tamanna Hans Egedep Illuani atsiornermik nalliuttorsiorpaluttumik katerisimaarnermi pivoq FN-ip silaannaq pillugu allattoqarfiani Allattaaneq Simon Stiell aamma ineriartortitsinermik suleqatigiinnermut nunarsuarmilu tamarmi silaannaq pillugu politikkeqarnermut ministeri Dan Jørgensen najuuttoralugit.

"Parisimi isumaqatigiissut akuersaarparput isumaqaratta uaguttaaq maani Kalaallit Nunaanni silaannaap pissusaata allanngoriartorneranut ataatsimoortumik suliniutaasunut taperseeqataassasugut. Silaannaq pillugu ajornartorsiutaasut nunap killeqarfii uniffigineq ajorpaat, ataatsimoorussamillu qanoq iliuuseqarfiginngikkaanni aaqqiivigineqarsinnaanatik. Maani Kalaallit Nunaanni – aniatitsiffiit pilersitsiffiusut ungasilluinnarlugit – nunarsuarmi tamarmi silaannaap pissusaata allanngoriartornerisa kingunerisaanit uaguttaaq aamma eqqugaavugut. Akuersinitsigut Naalakkersuisut, Inatsisartut inuiaqatigiillu kalaallit tamarmiusut kalerriutigaat uagut maani najugaqartuusugut sermimut aakkiartortumut toqqaannartumik isiginnaartuinnaanngitsugut. Uaguttaaq aamma silaannaap pissusaata allanngoriartornerinut ataatsimoorussamik suliniuteqarnissanut peqataanissatsinnut piareersimavugut, inuiaqatigiitsinnullu iluaqutaasussamik nukissiuutinut mingutitsinnginnerusunut saakkiartornerup qularnaarnissaannut”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Parisimi isumaqatigiissutip akuerineqarnissaa piareersarniarlugu Kalaallit Nunaata aamma Danmarkip suleqatigiinnermik isumaqatigiissut nutarsarsimavaat, suleqatigiinnerup patajaallisarnissaanik siunertaqartoq nunallu assigiinngitsut akornanni silaannaq pillugu isumasioqatigiinnerni Kalaallit Nunaata soqutigisaasa isumagineqarnissaasa qularnaarnissaannik. Suleqatigiinnermik isumaqatigiissutip nutarsakkap piviusoq nutaaq maanna peqataaasut marluusut tamarmik Parisimi isumaqatigiissummut akuulernerat ersersippaa. Suleqatigiinnermik isumaqatigiissut Namminersorneq pillugu Inatsimmik tunngaveqarpoq, aamma naligiinnermik Kalaallit Nunaatalu Danmarkillu akornanni ataqqinninnermik tunngaveqarluni.

"Kalaallit Nunaat sumiiffiit silaannaap pissusaata allanngoriartornerinit sakkortuumik eqqugaasimasut ilaattut Parisimi isumaqatigiissummut isumaqataalernera nalunaaqutaavoq pingaaruteqartoq. Tamanna nunarsuarmi tamarmi suleqatigiittariaqarnerup pisariaqartinneqarneranik kalerriutaavoq sakkortooq, takutillugulu Kalaallit Nunaat silaannaap pissusaata allanngoriartorneranut suliniuteqarnernut aallussilluni peqataaneranik. Nuannaarutigaara maanna kunngeqarfik ataatsimoortoq Parisimi isumaqatigiissummut peqataalermat, Kalaallit Nunaannillu suli qaninnerusumik suleqateqarnissamut qilanaarlunga", ineriartortitsinermik suleqatigiinnermut nunarsuarmilu tamarmi silaannaq pillugu politikkeqarnermut ministeri Dan Jørgensen oqarpoq.

Kalaallit Nunaata Danmarkillu akornanni suleqatigiinnissamik isumaqatigiissutitip nutartikkap atsiorneqarnerata kingorna Naalakkersuisup Kalistat Lundip FN-ip silaannaq pillugu allattoqarfiani Allattaanermut Simon Stiell-imut allakkat tunniuppai. Allakkani Naalakkersuisup Kalistat Lundip FN-ip silaannaq pillugu allattoqarfia ilisimatippaa Kalaallit Nunaata Parisimi isumaqatigiissut akuerigaa.

"Parisimi Isumaqatigiissummi siunertat angunissaat tassaavoq nunarsuarmi tamarmi silaannaq pillugu ajornartorsiutit kingunipiluisa ajornersaasa pinaveersaartinnissaannut periarfissaat pitsaanerpaaq aamma periarfissatuaat, kisiannili nunarsuarmi tamarmi angusanik naatsorsuinerup siulliup takutippaa aqqutigisassarput atuanngikkipput. Aamma nalunngilarput Issittoq nunarsuarmioqatigiinnii tamarmi agguaqatigiissutaasuminngarnit sukkanipilussuarmik kissatsikkiartortoq, Kalaallit Nunaannilu silaannaap allanngornerata sunniutai Kalaallit Nunaata nunarsuullu tamaani immikkoortuata killingi qaangerujussuarlugit siammaattumik kinguneqartitsisinnaasut. Nunarsuarmi naalagaaffiit inuiaallu tamarmik ataatsimut sukkatsittumik suliniuteqalernerat kisimi nunarsuaq aqqummut atuagassamut piseqqissavaa. Kalaallit Nunaata pisortatigoortumik Parisimi isumaqatigiissummut akuulernera pillugu tikilluaqqungaarpara, aamma Danmarkip silaannaq pillugu qanoq iliuuserineqartuni nangittumik siuttuunera nersornartillugu. Aamma malugaara Kalaallit Nunaanni Nunap Inoqqaavisa, nunarsuullu immikkoortuini tamaniittut, ilisimasaat silaannarlu pillugu aaqqiissutissaat aatsaat taama pingaaruteqarluinnartigisut", FN-ip silaannaq pillugu allattoqarfiani Allattaaneq Simon Stiell oqarpoq.

Nunat assigiinngitsut akornanni silaannaq pillugu isumaqatiginninniarnerit pillugit Naalakkersuisut aamma danskit naalakkersuisuisa akornanni suleqatigiinnissamik isumaqatigiissut nutarsagaq atuarneqarsinnaavoq uani.

Naalakkersuisup Kalistat Lundip oqalugiaataa uani atuarneqarsinnaavoq.

Paasissutissat amerlanerusut piniarlugit Naalakkersuisup allattaa Manasse Berthelsen oqar. attavigiuk: 34 56 03/54 88 68 imaluunniit e-mailikkut: pan@nanoq.gl