Avannaata Kommuniani illoqarfinni nunaqarfinnilu 24-ni ammaannartumik ikuallaasarnissamut immikkut ittumik akuersissutaagallartoq

Naalakkersuisut aalajangerput, Avannaata Kommunianut kommunimi illoqarfinni nunaqarfinnilu 24-ni ammaannartumik ikuallaasarnissamut immikkut ittumik akuersissuteqarniarlutik. Immikkut ittumik akuersissuteqarnermut kommunip siunissamut ungasissumut eqqagassalerinermut pilersaarusiorluni ingerlallualersimanera peqqutaavoq.

Eqqagassanik ikuallassinnaasunik ikuallaasarneq ikuallaavinni avatangiisinut akuerisani ingerlanneqassaaq. Kisiannili Naalakkersuisut kommunalbestyrelsip qinnuteqarneratigut sivisunerpaamik qaammatini pingasuni eqqakkanik ikuallanneqarsinnaasunik ammaannartumik ikuallaasarnissamut immikkut ittumik akuersissuteqarsinnaapput.

”Naalakkersuisuniit eqqagassalerinermut suliassaqarfik pingaartinneqarpoq. Eqqagassalerineq kommunip isumagisassaraa. Tamatumunnga atatillugu kommunit tamaasa eqqagassalerinermi unammilligaat tusarniaaffigalugit tikeraarpakka. Kommunit tamarmik ilisimatinneqarput, ukiuni 2024-2025-mi kommunit tamarmik immikkut eqqagassalerinermik pitsanngorsaanissamut tapiiffiginiarlugit 3 mio. koruunit tikillugit tunineqarsinnaasut. Qaammat kingulleq nuna tamakkerlugu eqqagassalerinermi ataatsimut aaqqiissutissani ikuallaavik siulleq atulerpoq. Ikuallaaviit eqqagassalerinitta annertoorsuarmik pitsaanerulernissaanut, taamaalilluni ammaannartumik ikuallaasarnerit pisariaarunnissaannut qulakkeerisussaapput. Ammaannartumik ikuallaasarnerit peqqissutsimut avatangiisinullu annilaanganartortaqarput”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Naalakkersuisunit erseqqissaatigineqassaaq kommunenut immikkut ittumik akuersissummik tunisisarneq ingerlateqqinneqassanngimmat, kommunit eqqagassalerinermut pilersaarutitik malillugit ingerlalermata.

”Ammaannartumik ikuallaasarnerit periarfissat kingullersaattut atortuartussaavagut. Siusinnerusukkut kommunimut ammaannartumik ikuallaasarnissamut immikkut ittumik akuersissuteqartarnermi piumasarineqarpoq, eqqagassat passunneqartarnerinut tamakkiisumik aaqqiissutissanik pilersitsinissaq sulissutigineqassasoq piumasarineqartarpoq, tamannalu kommunimit malinneqarsimanngilaq; maanna pilersaarut nassiunneqartoq tamanna naammassineqarpoq. Taamaattumik Avannaata Kommunia ammaannartumik ikuallaasarnissamut akuersissutaagallartumik tunineqarpoq”, Naalakkersuisoq Kalistat Lund oqarpoq.

Sumiiffinni ukunani ammaannartumik ikuallaasarnissamut immikkut ittumik akuersissutaagallartumik nalunaaruteqartoqarpoq:

• Qaanaaq nunaqarfiillu Qeqertat, Savissivik aamma Siorapaluk.
• Upernavik nunaqarfiillu Naajaat, Tasiusaq, Upernavik Kujalleq, Aappilattoq, Innaarsuit, Kangersuatsiaq, Kullorsuaq, Nutaarmiut aamma Nuussuaq.
• Uummannaq nunaqarfiillu Ikerasak, Niaqornat, Qaarsut, Ukkusissat aamma Saattut.
• Ilulissat nunaqarfii Oqaatsut, Qeqertaq, Saqqaq, aammalu Ilimanami anartarfiit puussiartaat imaqanngitsut.
  
  

2020-2031-mut eqqagassalerinermut pilersaarut
Nuna tamakkerlugu ikuallaaviit nutaaliaasut qanoq iliorlutik nuna tamakkerlugu eqqagassanik suliaqartassanersoq 2020-2031-mut eqqagassalerinermut pilersaarummi allassimavoq.

2020-2031-mut eqqagassalerinermut pilersaarut atuaruk, uani.

Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi naalakkersuisup allattaa Manasse Berthelsen tlf.: 345603-mut imaluunniit e-mail mabr@nanoq.gl imaluunniit pan@nanoq.gl aqqutigalugit attaveqarfigineqassapput.