Siusissukkut suliniuteqarneq aamma Ujartuilluni sulineq pillugu isumasioqatigiisitsineq

Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede, ulluni makkunani “Siusissukkut suliniuteqarneq aamma Ujartuilluni sulineq” pillugit isumasioqatigiisitsiniarluni Narsamiippoq. Tamanna Inuilimi juunip ulluisa 11-aniit 13-ianut pissaaq.

Peqataasut suliffeqarfinnit assigiinngitsuneersuupput, ilaatigut Kommuninit, PI/SPS-imit, Ilisimatusarfimmit, Isumaginninnermut Aqutsisoqarfimmit, NIISIP-mit, Tilioq-mit kiisalu MIO-mit.

Meeqqanut Inuusuttunullu Naalakkersuisoq isumasioqatigiisitsinermik suliniuteqarsimasoq aaqqissuussineq atorlugu nunatsinni ilaqutariit atugarliornerpaat samminiarpai. Siusissukkut suliniuteqarneq atorlugu inuit atugarliornerpaat qanoq ikiorneqarsinnaanerannik siunnerfik ataatsimoorussaq pillugu peqataasut nalunaarummik suliaqassapput.

”Kalaallit Nunaanni meerarpassuit toqqissisimallutik – asannittunik inersimasunik avatangiiseqarlutik peqqinnartunillu soqutigisaqarlutik peroriartorput. Taamaakkaluartorli aamma pisariaqarpoq ersarissarnissaa, kisitsisitigut aamma takuneqarsinnaasoq inuiaqatigiinni meerarpassuit, inuusuttorpassuit ilaqutariippassuillu artorsaateqartut. Inuiaqatitsinni ilaqutariit tunngavissiisussaapput taamaattumillu pisariaqarluinnarpoq tamakkiisumik ilaqutariinnut sammiveqarnissarput”, Meeqqanut Inuusuttunullu Naalakkersuisoq, Aqqaluaq B. Egede, oqarpoq.

”Pinaveersaartitsilluni suliaqarnermi siusissukkut suliniuteqarneq pingaarutilerujussuuvoq. Siusissukkut suliniuteqarneq angajoqqaat meeqqaminnik sumiginnaanissaannik aamma angerlarsimaffiup avataanut inissiisarnernik pinaveersaartitsisuuvoq. Siusissukkut suliniuteqarneq tassaavoq inuiaqatigiinni kikkunnit tamanit malinneqartussanngorlugu suliaq. Uagut suliffeqarfiit pisortanit pigineqartuusugut siusissukkut suliniuteqarnermik suliamik siuttuunissatsinnik kivitsinissatsinnillu immikkut ittumik akisussaaffeqarpugut. Namminersorlutik Oqartussani, kommunini aamma ilaqutariinnut siusissukkut suliniuteqarnermik pisariaqartitsisunut attaveqartunut sulisunut soorunami maligassiuisuussaagut. Isumasioqatigiisitsinermi siusissukkut suliniuteqarnermut aamma ujartuilluni sulinermut ersarissumik siunnerfeqaqatigiissaagut, taamaasilluta ilaqutariinnut atugarliortunut ikiuisinnaanissatsinnut suliniuteqarnissamut pingaarutilimmut tapersersoqatigiissinnaassaagut”, Aqqaluaq B. Egede oqarpoq.

Isumasioqatigiisitsineq ulluni pingasuni ingerlassaaq, tassani suliassaqarfimmik paasissutissiisunik assigiinngitsunik saqqummiisoqartassalluni. Meeqqanut, inuusuttunut ilaqutariinnullu atugarliortunut siusissukkut suliniuteqarnermik aamma ujartuilluni sulinermik patajaallisaasussat, meeqqanut inuusuttunullu tunngasut iluanni anguniakkat pingasut salliunneqarnissaat isumasioqatigiisitsinermi anguniagaavoq.


Attavissaq
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 55 33 03 attavigiuk.