2024-mi Avatangiisinut Aningaasaateqarfik suliassanut 14-inut 10,6 mill. koruuninik agguaaniarpoq

Avatangiisinut Aningaasaateqarfik ukioq manna suliassanut 14-inut; kommuninit, suliffeqarfinnit namminersortunillu aallartinneqartussanut katillugit 10,6 millioner koruuninut agguaaniarpoq. Ilaatigut Kommune Kujallermi, Avannaata Kommuniani aamma Qeqqata Kommuniani eqqagassalerinermik piorsaanissamut, Sisimiut aamma Uummannap eqqaanni aalisakkanut qassutikunik qalluinissamut, kiisalu Kommune Kujallermi illoqarfimmi Narsami aamma Qassiarsummi eqqakkanik saliinissamut tapiissuteqartoqassaaq. Kiisalu nuna tamakkerlugu eqqagassalerinermi aaqqiissutissap ESANI A/S-ip pilersinneqarneranut tapiisoqassaaq.

”Nuannaarutigaara Avatangiisinut Aningaasaateqarfik ukioq manna aammaloorluni nuna tamakkerlugu avatangiisit pillugit sulianut pissanganartunut tapersiisinnaammat. Suliniutitut nutaatut kommunit eqqagassalerinermi piorsaanissamut katillugit 15 mio. koruuninik, 2024-mut aamma 2025-mut agguarneqartussanik taperserneqartussaapput. Kommuninut aningaasat saniatigut immikkoortitat atorlugit Qeqqata Kommunia Kangerlussuarmi inersuarmik kiassagaanngitsumik, sulisunut atortulimmik pilersitsinissamut aningaasanik atuissaaq, kiisalu Avannaata Kommunia eqqagassalerinermut maskiinanik pisiniassalluni. Suliat avatangiisinut innuttaasunullu sunniuteqartumik ineriartornissaasa sunniutissaasalu malinnaaffiginissaat qilanaaraara", Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Suliat tapersersorneqartussat pingaarnertut ukununnga tunngasuupput:

Kommunini eqqagassalerineq
Aalisakkanut qassutikunik/piniariartarfinnik isumaginninneq
Suliat eqqagassanik immikkoortiterinermik, atueqqinnermik issunngortitsinermillunniit siuarsaaffiusut

Suliassat tapiiffigineqartut allattorsimaffiat uani takuuk.

Avatangiisinut Aningaasaateqarfik suua?
Inatsisartut 2018-imi Ukiakkut Ataatsimiinnermi aalajangerput, Avatangiisinut Aningaasaateqarfik nuna tamakkerlugu avatangiisinik pitsanngorsaanissamik suliaqarnermut tapersiissuteqarfiusartussaq pilersinniarlugu. Ukiut tamaasa suliniutinut, avatangiisinut iluaqutaasunut aningaasanik immikkoortitsisoqartartussaavoq.

Attaveqarfissaq:
Annertunerusumik paasisaqarusunnermi Naalakkersuisumut allatsi Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu attaveqarfigineqassaaq.