Maniitsumi Efterskoli illup iluata silaannaata peqqinnartuunissaa siunissamilu ingerlatsineq qularnaarniarlugit suliniuteqalerpoq

Maniitsumi Efterskolip kollegiaataata ilinniarfittaatalu iluini, ineqarfinni arlaqartuni ilinniartitsisullu inaanni oqummik nassaartoqarfiusuni, silaannaap misissuiffigilluareernerisigut Iluarsartuussinermut Aqutsisoqarfiup kollegiaqarfiup piaartumik qimanneqarnissaa inassutigaa. Peqqissuunissamut aarlerinartoqarnera illullu iluata silaannaata pitsaasuunnginnerata ernumassutaanerat taamatut aalajangernermut tunngaviupput.

Efterskolemi atuartut kingulliit 28-it tamarmik meeqqat atuarfianni allattariarsorluni inaarutaasumik misilitsinnerit naammassivaat, atuartullu arfineq-pingasut eqqaassanngikkaanni efterskolip juunip qeqqani pisortatigoortumik matunissaa sioqqullugu angerlarnissartik toqqarpaat. Toqqissisimanissaat atugarissaarnissaallu qulakkeerumallugit Majoriap kollegiaanut nuunneqarput. Atuartut 28-it tamarmik efterskolernermik naammassisaqarsimanermut uppernarsaammik tunineqassapput.

Ilinniartitaanermut Naalakkersuisoqarfiup Ilinniartitaanermullu Aqutsisoqarfiup efterskolimi pisortaq Maniitsumilu Efterskolimi siulersuisut siulittaasuat 22. aamma 23. maj 2024-imi ataatsimeeqatigivaat, piffissaq qaninnerusoq ungasinnerusorlu eqqarsaatigalugit eftersolip Maniitsumiiginnarnissaanut aaqqiissutaasinnaasunik qulakkeerinninnissaq siunertaralugu.

Piffissaq qaninnerusoq eqqarsaatigalugu ukiumi atuarfiusumi 2024/2025-imi aaqqiissutissat:

Maniitsumi Efterskoli nalinginnaasumik ukiumi atuarfiusumi ilivitsumi atuartunut 60-it missaanniittunut inissaqartitsisaraluarluni suliani annikillillugit atuartunut ikinnerpaamik 36-inut efterskolertitsissaaq. Tamassuma saniatigut Maniitsumi Efterskoli pilersaarpoq atuartunik maniitsumeersunik arlariinnik ulluunerani atuartartussanik tigusisinnaanissaminnik.

2024-ip aasaanerani ilinniartitsisut inaanni klassinilu atuarfiusartuni oqoqarfiit annikinnerusut oquiarneqassapput. Init taakkua aasami feeriareernerup kingorna atoqqinneqarsinnaalissapput.

Efterskolip Maniitsumi Majoriap kollegiartaata ilaa attartussavaa, efterskolimi atuartut ikinnerpaamik 36-it najugaqarfigisinnaasaat. Maniitsumi Majoriap kollegiaatimik ilaata efterskolimit ukiup atuarfiusup tulliup tamarmiusup ingerlanerani attartorneqarnissaa neriorsuutigisimavaa.

Ullumikkut ukiumut atuarfiusumut 2024/2025-imut atuartut 39-it Maniitsumi Efterskolernissaminnik nalunaarfigineqarsimapput. Maniitsumi Efterskolip Efterskoli Villads Villadsenillu pisortaasa atuartut Maniitsumi Efterskolimi atualernissaminnut akuerisaasut ilaasa Efterskoli Villads Villadsenimi atualersinnaanerannut neqerooruteqarfigineqarsinnaanerat oqaloqatigiissutigivaat.

Efterskolit pillugit Inatsisartut inatsisaanni 5. December 2008-meersoq § 10, imm. 1, nr. 4 naapertorlugu Naalakkersuisut atuartitsinermut tapiiffigineqarsinaanermik akuersissutigineqartut iluini efterskolit minnerpaamik 24-inik ukiumut atuartuuteqartut akuerisinnaavaat. Ilinniartitaanermut Aqutsisoqarfiup nalilerpaa, naak atuartut ikinneruleraluartut, taamaattoq silatusaartumik isumalimmillu efterskolertitsinissaq ingerlanneqarsinnaasoq.

Ikinnerusunik atuartoqarluni efterskolertitsineq pædagogikkimik allaanerusumik misiliinissamut periarfissaqartitsissaaq, atuartut ataasiakkaat itinerusumik toqqaannarnerusumillu atuartinneqarfigisinnaasaannik, atuartullu inuttut ilinniakkamikkulluunniit immikkut pisariaqartitsisut atuartitsinermik isumagineqarnermillu namminneq piginnaanereriikkaminnut pisariaqartitaminnullu aaqqissuunneqartumik misigisaqarnissaminnut periarfissaqartillugit.

Ilinniartitaanermut Naalakkersuisoqarfiup Ilinniartitaanermullu Aqutsisoqarfiup piaartumik Maniitsumi Efterskoli oqaloqatigissavaat, aaqqiissutaasussatut siuliani siunnersuut ukiup atuarfiusup 2024/2025-ip kingorna atuarfiullu illuutaasa atuuteqqilernissaasa tungaannut nanginneqarsinnaanerata eqqarsaataasinnaanera pillugu.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup efterskolip illuutaasa qanoq oqoqarfiutiginerisa annertunerusumik misissorneqarnissaat suliniutiginiarlugu aammalu iluarsartuussisoqarnissaanik, nutaamik sanasoqarnissaanik allarluinnarmilluunniit suliaqartoqarnissaanik pisariaqartitsineq pillugit aammattaaq Iluarsartuussinermut Aqutsisoqarfik suleqatigissavaa.


Paasisaqarnerorusukkuit attavigiuk Nuka Kleemann, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik e-mailikkut: nukkl@nanoq.gl imaluunniit oqarasuaatikkut 34 50 00.