Utoqqalinersiallit ilaannut appariartuaartitsinermi akigititaq appasinnerusoq

Ulloq 1. januar 2024-mi utoqqalinersialinnut pilersuisussaaqatigiinneq atorunnaarsinneqarpoq. Tamanna isumaqarpoq, utoqqalinersialik aappaasup isertitai tunngavigalugit ilanngaanneqassanngitsoq. Taamaattoq utoqqalinersiallit ilaannut tamanna aamma isumaqarpoq, immikkut ittumik tapeq annaagaat. Tamanna siunertaanngilaq, aamma ajornartorsiut aningaasanut inatsimmi ilassuteqarnikkut piaartumik aaqqiivigineqarallarpoq. Maannakkut utoqqalinersiaqarnermut inatsimmik allannguineq Inatsisartut aalajangiinerisigut ataavartunngorpoq, tamatuma utoqqalinersiallit tamarmik aappaarisaata isertitai tunngavigalugit ilanngaanneqannginnissaat aamma utoqqalinersiallit ikinnerusut immikkut ittumik tapermik tigusaqartarnissaat qulakkeerlugu.

Inatsisartuni amerlanerussuteqartut utoqqalinersiallit immikkut ittumik tapeqarnissaata atuutilerseqqippaat, utoqqalinersiaqarsinnaatitaanngitsumik aappaqarlutik inooqateqarpata, aamma aappariit ukiumut katillugit 300.000 kr-it inorlugit akissarsiaqarpata, qaffasinnerusumik utoqqalinersiaqartitsisoq.

Malittarisassani nutaani immikkoortut pingaarnerit:

• Tapeqarnermut pisinnaatitaanerup atuutilerseqqinnera: Utoqqalinersiaqarnermut inatsimmi allannguutip nutaap, utoqqalinersialinnut utoqqalinersiaqarsinnaatitaanngitsumik aappaqarlutik inooqateqartunut, aappariit ukiumut katillugit 300.000 kr-it inorlugit isertitaqarpata, kisermaatut utoqqalinersianut tapermik pisinnaatitaaneq atuutilerseqqippaa.
  
  
• Appariartuaartitseriaaseq: Malittarisassat nutaat atorlugit utoqqalinersianut tapeq utoqqalinersiallit utoqqalinersiat saniatigut nammineq isertitaat taamaallaat 35 %-imik annikillisinneqassapput, taamaattoq 160.368 kr-inik ilanngaaserlugit (2024-mut kisitsisit). Tapeq aapparisap isertitai tunngavigalugit appariartuaartinneqassanngilaq.
  
  

Tunuliaqut
Inatsisartut 2023-mi ukiakkut ataatsimiinneranni pilersuisussaaqatigiinnermik atorunnaarsitsineq pillugu inatsimmik allannguinerup kingunerisaanik, utoqqalinersiaqarneq pillugu Inatsisartut inatsisaanniit § 5, imm. 2 peerneqarpoq.

Malittarisassap taassuma utoqqalinersiallit, utoqqalinersiaqarsinnaatitaanngitsumik aappaqarpata aamma aappariit ukiumut katillugit 300.000 kr-it inorlugit akissarsiaqarpata, immikkut ittumik tapeqarnissamut pisinnaatitaaffeqartippai.

Malittarisassaq atorunnaarsinneqarpoq utoqqalinersiallit tamarmik pilersuisussaaqatigiinnermik malittarisassanut ilaatinneqannginnissaat qulakkeerniarlugu. Tamaattoq taassuma kinguneraa, utoqqalinersiallit ilaasa isertitakitsut, kisermaatut utoqqalinersianut tapermiit utoqqalinersiallit aappariinni tapermut appasinnerusumut nuunnerminni, isertitamik ilaat pingaaruteqartoq annaaneqarmat. Tamanna Naalakkersuisut siunertarinngisaannarpaat, aamma tamanna siunertarineqanngitsumik kingunerisaasup iluarsineqarnissaa pisariaqarsimavoq.

Taamaattumik Naalakkersuisut Inatsisartut Aningaasaqarnermut akileraartarnermullu Ataatsimiititaliaat qinnuigaat, aningaasanut inatsimmi immikkut ittumik oqaasertaliussamik ilanngussisoqassasoq, taamaalillutik immikkut ittumik tapeq kommunit tunniussisarnerat ingerlaannarsinnaaqqullugu. Oqaasertaliussaq utaqqiisaasumik aaqqiissutaavoq.

Inatsisartut maannakkut utoqqalinersiaqarneq pillugu Inatsisartut inatsisaata allannguutaa akuersissutigaat. Allannguutip taassuma utoqqalinersiaqarnermut inatsimmi tapeqarnissamut pisinnaatitaaneq atuutilerseqqippaa. Peqatigalugu tapeqarnermut malittarisassat assigiissarneqarput, utoqqalinersiallit kisermaat tapermik tigusisarnerat assingannik, aamma tapeq aappaasup isertitai tunngavigalugit appariartuaartinneqartarunnaarluni.

Attaveqarfissaq
Annertunerusumik paasisaqarniaruit attaveqarfigiuk naalakkersuisup allattaa Helene S. Pedersen e-mailikkut: hspd@nanoq.gl imaluunniit oqarasuaatikkut. + 299 34 56 11