Naligiissitaaneq assigiinngisitsinnginnissarlu pillugit Inatsisartut inatsisaata amerlanerussuteqartunit ulloq 28. maj 2024 akuersissutigineqarneranut atatillugu oqaaseqaat
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik![Naaja H. Nathanielsen](/-/media/naalakkersuisut/naaja-h-nathanielsen/naaja-torso-sort-front.jpg?cx=0.5&cy=0.5&cw=975&ch=415&hash=2B0DEF59EE59B30D7696EBAC33BB0179)
Upernaakkut ataatsimiinnermi ullut ataatsimiiffiusut kingullersaanni naligiissitaaneq assigiinngisitsinnginnissarlu pillugit inatsit nutaaq Inatsisartuni amerlanerussuteqartut akuersissutigaat. Inatsit ulloq 1. juli 2024 atuutilissaaq naligiissitaanerlu pillugu inatsimmik nutarterinermik imaqarluni, tamatumalu peqatigisaanik assigiinngisitsineq akiorniarlugu illersuineq inatsisikkut eqqunneqarpoq aamma innuttaasut Naligiissitaaneq pillugu aalajangiisartunut sulianik saqqummiussisinnaanerat inatsisikkut periarfissinneqarluni.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq ima oqaaseqarpoq:
”Inatsisissatut siunnersuummut Inatsisartuni amerlanerussuteqartut tapersersuimmata annertuumik oqiliallannarpoq nuannerlunilu. Assigiinngisitsivigineqarnissamut nunami innuttaatut tamarmik illersorneqarnissaasa aamma naligiimmik pineqarnerup naligiissitaanerullu siuarsarneqarnissaasa qulakkeerneqarnissaat, Naalakkersuisunut pingaaruteqarpoq. Kiffaanngissuseqarluni kinaassuseqarsinnaaneq aamma assigiinngitsitsivigineqannginnissaq neriuginartumik tamanna immitsinnut kissaatigaarput. Amerlanerpaartaasugut qujanartumik inuunitsinni assigiinngisitsivigineqarneq misigineq ajorparput. Kisianni innuttaaqateqarpugut assigiinngisitsivigineqarnermik misigisartunik taakkulu massakkut imminneq pillutik suliaq Naligiissitaaneq pillugu aalajangiisartunut saqqummiussinnaanngorpaat. Siuariarnerujussuuvoq, taakkununngaannaanngitsoq tamatsinnulli. Inuppassuit ataasiakkaarlutik, NGO´t aamma sullissiviit qasusuillutik inatsisip pingaaruteqassusaa pillugu uparuartuisarnerannut qutsavigiumavakka. Tamatta pilluarta”.
Paasisaqarnerorusukkuit naalakkersuisup allattaa Jeanette L. Petersen attaveqarfigiuk, jalp@nanoq.gl, oqarasuaat: 34 52 06.