AtuartigukPeqqissutsimut suliassaqarfiup pingaarnertut aaqqissuunneqarneranik naleqqussaaneq: Aaqqissuussaaneq ersarissoq
Nassiussisuuvoq: Peqqissutsimut Naalakkersuisoqarfik
Naalakkersuisut 2023-mi peqqissutsimut tunngatillugu isumaqatigiissut peqqissutsimut suliassaqarfimmi nutaamik aaqqissuussaanikkut malitseqartippaat Peqqinnissaq pillugu ataatsimiititaliarsuup inassuteqaataanik tunngavilimmik. Tassani siunertarineqarpoq ersarissumik aaqqissuussineq immikkoortuni pingaarnerni pingasuni suliassanik akisussaaffinnillu ersarissumik agguataarineq: Peqqissutsimut Naalakkersuisoqarfik, Peqqinnissaqarfik kiisalu Nunatta Nakorsaaneqarfia.
Peqqissutsimut Aqutsisoqarfik naleqqussaanermut atatillugu atorunnaarsinneqarpoq. Peqqissutsimut Aqutsisoqarfimmi sulisut Peqqissutsimut Aqutsisoqarfiullu annersaata maanna suliassai Peqqinnissaqarfimmut nuunneqarput. Taamaaliornermittaaq Allorfik Peqqinnissaqarfimmut ilaalissaaq suliassaqarfittut namminersortutut immikkut ingerlatsinissamut tapiiffigineqartarluni. Taamaalilluni Peqqinnissaqarfik ingerlatsinermik ersarissumik ataatsitut ingerlatsinermi aaqqissuussaalissaaq sulisut tamarmik immikkoortumut ataatsimut ataatsimoortinneqarlutik. Allannguutit ull. 1. januar 2025-mi atortuulertinneqarnissaa naatsorsuutigineqarpoq.
”Peqqinnissamut suliassaqarfinni nutaamik aaqqissuussinissinerup saqqummiussinnaanera nuannaarutigaara, taanna innuttaasunut sulisunullu paasiuminarlunilu ersarissuussaaq. Nutaamik aaqqissuussaanermik naleqqussaanermik suliaq partiinit peqqissutsimut tunngatillugu 2023-mi isumaqatigiissutaannit pingaarnertut suliarineqarpoq. Aaqqissuussaanermik naleqqussaaneq nutaaq nunatsinni peqqinnissaqarfimmik piffissamut pissutsinullu naleqqunnerusumik ineriartortitsilluni suliamik nangitsinertut tunngaviusutut isigineqassaaq”, Peqqissutsimut Naalakkersuisoq Agathe Fontain oqarpoq.
Allorfik ilisimasanik katersuivittut ingerlaannassaaq nunatsinni pinngitsuuisinnaajunnaanermik akiuiniarluni ataatsimut sulinermut akisussaasuussalluni. Allorfik Peqqinnissaqarfimmut ilanngunneqarpoq pinngitsuuisinnaajunnaarnermik ajornartorsiutit ukkatarineqarnerat, nalilersuinermik suleqatigiinneq, nakorsaasersuineq kiisalu innuttaasunut pinngitsuuisinnaanermik tarnikkullu ajornartorsiuteqartunut ataqatigiissakkamik suliniarnerit patajaallisarniarlugit.
”Allorfiup peqqinnissaqarfimmut ilanngutsinneratigut neriuutigaarput aanngajaarniutit naartusunut meeqqallu inuunerissaarnissaannut sunniuteqartarnerannik pitsaaliuinermik suli qaninnerusumik suleqatigiinnissarput neriuutigaara, tassanilu anguniagaalluni siusinaartumik suliniuteqartarnissaq. Aamma kissaatigaarput innuttaasunik tarnikkut nappaateqartunik aanngajaarniutinillu ajornartorsiuteqartunik suleqatigiissutiginninnerit nukittorsarnissaat”, Agathe Fontain oqarpoq.
Peqqinnissaqarfik ukiuni arlaqartuni tatineqarsimavoq, siunissamilu qaninnermi tamatuma sakkukilliartornissaa naatsorsuutigineqanngilaq. Utoqqaat amerliartormata tamanna ilumoortuuvoq, ukioqatigiillu taakku Peqqinnissaqarfimmit neqeroorutinik pisariaqartitsingaluttuinnarput. Peqqinnissamut suliassaqarfik aamma suliassanik pisariusunik amerlasuunillu kiisalu aqutsinikkut isumalluutit eqqarsaatigalugit suliassarpassuaqarpoq aqutsinissamut sullissisinnaasut amerlanngimmata. Aaqqissuussaanermik allannguinermut ilanngullugu taamaammat Naalakkersuisut kissaatigaat Peqqissutsimut Naalakkersuisoqarfimmi, Nunatta Nakorsaaneqarfiani kiisalu Peqqinnissaqarfimmik Aqutsisut sulisoqarnikkut nukittorsarnissaat.
”Naalakkersuisoqatigiinnissamik april 2022-mi isumaqatigiissummi isumaqatigiissutigaarput peqqinnissamut suliassaqarfimmik aqutsinerup nukittorsarnissaa pillugu suliaqassalluta, tassani qulakkeerniarneqassalluni suliassaqarfiup atuisut pisariaqartitaannut naleqqussaanissaq. Tamanna pissaaq Peqqinnissaqarfimmik Aqutsisuni aningaasaqarnermut pisortamik kiisalu peqqissaasunut pisortamik allamik sulisoqalernikkut. Aqutsisut amerlinerisigut aningaasaqarnerup pitsaanermik aqunneqarnerulerneranut aamma Dronning Ingridip napparsimmavissuanik peqqissaavinnillu ingerlatsinerannut pitsanngorsaaqataassapput”, Agathe Fontain nassuiaavoq.
Taakku saniatigut pilersaarutaavoq Nunatta Nakorsaaneqarfiani nakorsat suliassaasa piginnaasaannik kiisalu Peqqissutsimut Naalakkersuisoqarfimmi aningaasaqarnermut inatsiseqarnermullu suliassaqarfimmi annertusaanissaq, tamannalu Peqqinnissaq pillugu Ataatsimiititaliarsuup isumaliutissiissutaanut naapertuuppoq, tassanimi suliassaqarfiit taakkua nukittorsarneqarnissaat pisariaqartinneqartoq tikkuarneqarmat. Allannguinerit taakku naalakkersuinikkut sullissinerup suliassaqarfimmullu tunngasunik saqqummiussissuteqartarnerup pitsanngorsaavigissavaat, taamalu qulakkeerneqassalluni naalakkersuisut pingaarnersiuineri piviusunngortinniarneqassallutik.
Piffissami aggersumi aaqqissuussaanermik naleqqussaanermut sulineq nanginneqassaaq Peqqinnissaqarfiup iluani naleqqussaaneq pitsanngorsaanerlu siunertarineqarluni. Tassani annerusumik ukkatarineqassapput innuttaasut napparsimasullu peqqinnissaqarfimmut isiginninnerat, tassani siunertarineqarluni innuttaasunut Peqqinnissaqarfimmik attaveqartunut pitsanngorsaanissaq.
Paasisaqarnerorusukkuit naalakkersuisup allattaa Birgithe Heinrich e-mailikkut: bihe@nanoq.gl imaluunniit oqarasuaatikkut ugguuna attaveqarfigineqarsinnaavoq: +299 34 66 17.