Naalakkersuisut Ilisimatusarfik pillugu erseqqissumik politikkiliorput

Ilisimatusarfimmi ilinniartitsisut ilisimatusartullu atorfimminnit soraartut pillugit Demokraatit siulittaasuata Jens-Frederik Nielsenip ernumassuteqarnera allaaserisani arlalinni allaaserineqarpoq. Soorlu Ilisimatusarfimmit akissummi takuneqarsinnaasoq ernumaneq pissusivinnik tunngaveqanngilaq. Aamma erseqqissarneqassaaq pissutsit inuiaqatigiinni avatangiiserisami atuuttut ilaatigut Ilisimatusarfimmi takuneqarsinnaassut, tassani amerlasuut, nunaqavissut tikisitallu atorfimminnik allamik atorfittaartarnerat ileqquulernikuuvoq

Politikkikkut isiginninniartoqarpoq
Ilisimatusarfimmi atorfinitsitsisarnernut soraarsitsisarnernullu suleriaatsit ersarilluinnartut Ilisimatusarfik pillugu inatsimmi allaaserineqarput. Siulersuisut rektori atorfinitsittarpaat. Tamanna prorektorimut pisortamullu aamma atuuppoq, kisiannili rektorip inassuteqarneratigut atorfiit taakku inuttalerneqartarput. Ilisimatusarfimmi instittutini pisortat rektorimit atorfinitsinneqartarput.

Atorfinitsitsisarnernik allanillu innersuussisarnermut suleriaatsit ersarilluinnartut Ilisimatusarfik pillugu inatsimmi allaaserineqarmata Naalakkersuisut Jens-Frederik Nielsenip ujartugaatut immikkoortumi politikkiliornissamut piginnaatitaanngillat.

Naalakkersuisut ineriartortitsinermut isumaqatigiissut naammassiniarlugu Ilisimatusarfimmi siulersuisut suleqatigaat, tassani Ilisimatusarfimmi ineriartortitsinissamik illuatungeriit kissaataat piffissami ukiuni arfineq pingasuni ingerlanneqartussaallutik. Ineriartortitsineq pillugu isumaqatigiissut illuatungeriinnit atsiorneqareerpat tamatut saqqummiunneqassaaq.

Jens-Frederik-Nielsenip Ilisimatusarfimmi sulisoqarnermi pissutsit pillugit politikkimik ujartuimmat, takuneqarsinnaavoq eqqorpianngitsunik saqqummiisoq. Sulisoqarneq pillugu politikki Ilisimatusarfimmi siulersuisut aqutsisullu suliassaraat. Naalakkersuisulli Ilisimatusarfimmi pingaarnertut ineriartortitsineq isummerfiginerussavaat, ineriartortitsinissatullu kissaatigineqartoq pillugu Ilisimatusarfimmi siulersuisunut oqaloqatiginninneq ingerlalereerpoq.

Inussiarnersumik inuulluaqqusillunga

Nuka Kleemann, Naalakkersuisoqarfimmi pisortaq, Toqq/direkte 55 64 64, Nukkl@nanoq.gl