Jessie Kleemann-imut Eckersberg Medaillen 2024-mik nersornaaserneqarnerani pilluaqqusissut.

Naalakkersuisut ilisimatinneqarsimapput, aaqqissuussinermi ulloq 14. marts 2024 ingerlanneqartumi Eckersberg Medaillen 2024 kalaallimut assilialiorluni eqqumiitsuliortumut Jessie Kleemann-imut nersornaasiunneqarsimammat. 

Det Kongelige Akademi for de Skønne Kunster, Akademiraadet ukiumut ataasiarluni arfinilinnik nersornaasiisarpoq, taakkua illussanik titartaasartunut assilialiorlutik eqqumiitsuliortunut kiisalu illussanik ilusilersuisartunut suliaminni naammassisaqarluarsimasunut danskillu assilialiortarnerannut ilusilersuisarnerannullu pitsanngorsaaqataasunut tunniunneqartarlutik.

1754-mili ukiut tamaasa Akademi pilersinneqarsimanera pillugu nalliuttorsiortoqartarpoq.  Tassani nersorniaasiinerit ataqqinartorsuaq Dronningimit ingerlanneqartarput. Tassani ilisaritinneqartarput assilialiortartut, illussanik titartaasartut kiisalu ilusilersuisartut piginnaasatigut kaammattuinermikkut takutitsilluarsimasut nersorniarneqarlutik.

Suliat pillugit ilisimasat tunngavigalugit Akademiraadet nersornaasiisarpoq. Siunnersuisooqatigiinni ilaasortat piukkunnartunik arlalinnik innersuussisarput, tamatumalu kinguneranik nalilersorneqartarluni kikkut nersornaaserneqassanersut. Siunnersuisooqatigiit ataatsimoorlutik nersornaasiisarput, tamannalu ima isumaqarpoq, piukkunneqartoq nersornaammik pissarsissaguni marluulluni ilisimasalinnik taaneqarsimasariaqarluni.  

Tamatumunnga ilanngullugu Eckersberg Medaillen, tunniunneqartarpoq, eqqumiitsuliortunut pitsaassusaa qaffasissumik suliaqarsimasunut kiffaanngissuseqarlutik imaluunniit aalajangersimasumik suliaqarlutik takutitsisimasunut. 

Akademiraadet-ip eqqumiitsuliortoq nersornaaserniaramiuk ima tunngavilersorsimavaa: ”Jessie Kleemann-ip suliai saqqummiussassaniit tusarnersuliatut taallianut aamma video-miit qalipakkanut tunngassuteqarput.  Sammisap annertusinerani tusagassiorfiit killissarititaat qaangerneqartarput, aammalu taakkuinnaanngillat qaangerneqartarlutik.  Ilisarnarunnaarsaaneq, ilisarsisinnaaneq aamma pinniitsunik takutitsisarneq Kleemannip qitiutillugit sunniuteqartussatut suliarisarpai.”

Akademiraadet-ip naliliinermini pingaartissimavaat suliai sakkortuut qunusuitsumillu suliat, tamannalu tunngavigalugu 2024-mi Eckersberg Medaille nersornaasiullugu.

”Suliatit sakkortuut qunusuitsullu pillugit Eckersberg Medaillen 2024-mik nersornaasigaaninni Naalakkersuisut sinnerlugit pilluaqquakkit.
Nuannaarutigaarput tulluusimaarutigalugulu taama kusarnartigisumik nersorniarneqaravit.  Naalakkersuisut siunissamik iluatsitsilluarfiusumik pilluarnartumillu kissaappaatsit," taama oqarpoq Aqqaluaq B Egede.

Annertunerusumik paasisaqarusukkuit una attavigiuk:

Naalakkersuisup allattaa Rosa Thorsen tlf. 34 5702, e-mail rose@nanoq.gl