Erik Jensen ajugaasunik qulinik makitsivoq
Nassiussisuuvoq: Aningaasaqarnermut Akileraartarnermullu NaalakkersuisoqarfikSumi najugaqarusunnitsinnut pingaaruteqartunik Naalakkersuisut misissuipput. Najugaq.gl-imi apeqqutinik akisassat atorlugit februaarimi marsimilu misissuisoqarnikuuvoq. Ulluinnarni atortussanik niuertarfimmi pisiniarnermi atugassanik 1.000 kr.-nik qulinik makitsinermi peqataanissamut periarfissaqarnikuuvoq.
Aningaasaqarnermut Akileraartarnermullu Naalakkersuisoq Erik Jensen ajugaasunik qulinik ullumikkut makitsivoq.
Ajugaasut qulit taakku ukunani najugaqarput: Narsaq, Nuuk, Sisimiut, Aasiaat, Ilulissat kiisalu Tasiilaq. Taakku Namminersorlutik Oqartussanit toqqaannartumik nalunaarfigineqassapput.
- Misissuinitsinni amerlasuut peqataanerat nuannaarutigaara. Apeqqutinik akisassani akissutit 1.530-t tiguagut. Misissuinermi peqataasut innuttaasut tamarmiusut 3%-ingajaraat, Erik Jensen oqaluttuarpoq nangillunilu, apeqqutit akisassat atorlugit misissuineq taamaalilluni iluatsitsiviusorujussuuvoq.
Misissuineq Nuna Tamakkerlugu Pilersaarusiorneq pillugu 2023-mi Nassuiaammik nangitsineruvoq, ilimagineqarporlu akissuterpassuarni paasisat 2024-p ingerlanerani piariissasut.
Attavissaq: Naalakkersuisup allattaa Nukaaka Tobiassen, tlf. 345517 aamma nukat@nanoq.gl