Elcykelinik inerteqqutaajunnaarsitsineq pillugu nalunaarutissatut missingiutip tusarniutigineqarnera
Nassiussisuuvoq: Ineqarnermut Attaveqaasersuutinuullu Naalakkersuisoqarfik![](/-/media/billeder/sport/elcykel.jpg?cx=0.5&cy=0.5&cw=975&ch=415&hash=BD2BB34FE84E84E31F7530BB580559A6)
2023-p ukiaani ersarissivoq nunatsinni elcykelit knallertinut malittarisassanik naammassinnissinnaanngippata inerteqqutaasut. Tamanna pillugu Naalakkersuisup Hans Peter Poulsenip Danmarkimi transportministeri Thomas Danielsen qinnuigaa, elcykelit inerteqqutaajunnaarsittussanngorlugit inatsisip allanngortinneqarnissaa qulakkiissagaa.
Taamaattumik elcykelinut inatsisitigut tunngaviusariaqartumut qulakkeerinnissinnaalluni nalunaarutissatut missingiummik, Færdselsstyrelsi suliaqarpoq. Nalunaarutissap 2024-mi juunip aallaqqaataani atuutilersinneqarnissaa siunertaralugu, kingusinnerpaamik apriilip 18-iani akissuteqarfissalerlugu missingiut maanna tusarniutigineqarpoq.
Hans Peter Poulsen ima oqaaseqarpoq:
”Elcykelinik sikkilertartut 2024-p aasaani sikkilersinnaanissaat qulakkiissallugu siullertut anguniarneqarpoq. Elcykelinut malittarisassat allanngortinneqaqqissanersut siunissami ungasinnerusumi misissorsinnaavarput.”
Missingiut naapertorlugu elcykelinut malittarisassat tassaassapput:
- Sikkili ataasiinnarmik motooreqarsinnaavoq.
- Taamaallaat tukkartortilluni motoori ikiuutissaaq, taamaattoq 6 km/t tikillugu ikiuuteqarsinnaavoq (pisuttutut sukkatigisoq).
- Motoori annerpaamik 750 watt-inik sakkortussuseqassaaq.
- 25 km/t tikillugu motoori taamaallaat ikiuussinnaassaaq.
- Bremsinut, qullernut, atortunullu allanut tunngatillugu nalinginnaasumik sikkilinut malittarisassat atuutissapput.
- Sikkilertoq sikkilertilluni niaquarnaveeqquteqassaaq.
Nalunaarutissatut missingiutip tusarniutigineqarnera uaniippoq:
https://naalakkersuisut.gl/Hoeringer/2024/03/2103_elcykler?sc_lang=kl-GL
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl