AtuartigukPeqqissutsimut Naalakkersuisup Maniitsoq tikeraarpaa
Nassiussisuuvoq: Peqqissutsimut Naalakkersuisoqarfik
Peqqissutsimut Naalakkersuisup Agathe Fontainip piffissami 12. -14. martsimi Maniitsoq tikeraarpaa.
Kigutileriffiup peqqinnissaqarfiullu sulisui tikillugit oqaloqatiginissaat aamma peqqissutsimut tunngatillugu isumaqatigiissut Inatsisartuni partiit tamarmik ataaseq minillugu november 2023-mi peqataaffigisaat pillugit qaninnerusumik oqaloqateqarnissaq tikeraarnermi siunertarineqarpoq. Tassunga atatillugu Maniitsumi kigutileriffik, Peqqissaavik, utoqqaat illuat Neriusaaq aammalu innuttaasut tarnimikkut napparsimasut najugaqatigiiffiat Agathe Fontainip pulaarpai.
Taassuma saniatigut Maniitsumi innuttaasunik ataatsimiitsitsisoqarpoq, tassani Agathe Fontain peqqissutsimut tunngatillugu isumaqatigiissut aamma ukiuni qulini tullinnguuttuni peqqissutsimut tunngatillugu isumaqatigiissummi suliniutissatut Naalakkersuisut naatsorsuutigisaat pillugit saqqummiussivoq.
Agathe Fontain oqarpoq:
”Aamma Maniitsumi peqqissutsimut suliassaqarfimmi paaqqutarinninnermullu suliassaqarfimmi arlalinnik unammilligassaqartoq ajornartorsiuteqartorlu erseqqippoq. Ataatsimut isigalugu peqqinnissakkut sullissisunut tamanut tunngatillugu sulisussarsiortarnermi unammilligassaqarpoq. Peqqissutsimut tunngatillugu isumaqatigiissummi nutaami suliniutissatut qitiutitavut ajornartorsiutinut peqqinnissaqarfiup unammilligassaanut naapertuunnerat uppernarseqqippara. Peqqinnissakkut sullissisunut aalajangersimasunut ataqqinningaarpunga, taakku ullut tamaasa suliartortarput aamma sulisut amigaraluartut innuttaasut pitsaanerpaamik sullinniarlugit iliuuseqangaartarput.”
Paasisaqarnerorusukkuit naalakkersuisup allattaa Birgithe Heinrich e-mailikkut: bihe@nanoq.gl imaluunniit oqarasuaatikkut ugguuna attaveqarfigineqarsinnaavoq: +299 34 66 17