AtuartigukNaalakkersuisut suliffeqarnerup atitunerusumik ingerlanneqarnissaa qulakkeerniarpaat
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Suliniuteqarfiusussat 6-it, suliffeqarnerup suiaassutsinut agguataarneqarsimaneranik akiuiniarfiusussat, Naalakkersuisut toqqarpaat. Suliniuteqarfissani 6-ini taakkunani innuttaasut suliffeqalersinnaaneranni suiaassusaasa apeqqutaatinneqartannginnissaa qulakkeerneqassaaq.
Sulisussaaleqineq suliassaqarfinni tamaginni ajornartorsiutaavoq. Avataaniit sulisussarsiorneq ajornartorsiummut aaqqiissutaasarpoq. Aaqqiissutissaq alla tassaavoq inuiaqatigiit tamakkerlugit sulisussarsiorfigineqarnissaannik aporfiusartut aporfiujunnaarsinnissaat. Ullumikkut ilinniartitaanermi suliffeqarnermilu suiaassutsinut agguataarisarneq ileqqorineqarpoq. Suliffeqarnermi naligiissitaanerup suiaassutsillu siunnerfeqarnerusumik tulleriissaarnerusumillu periaaseqarluta sulissutiginerisigut inuiaqatigiittut aatsaat angusaqarsinnaavugut.
Inuiaqatigiittut naligiinnginnerup akiornissaa kissaatigigutsigu, sooq naligiinnginnerit pilersimanersut paasisariaqarparput. Pissutigalugu naligiinnginneq nammineerluni pilertanngimmat. Suliassaqarfinni arlalinni ataatsikkut suleqatigiikkutta aatsaat, innuttaasut tamarmik naligiimmik periarfissaqalernissaat anguneqarsinnaavoq.
Taamaattumik suliniuteqarfissat 6-it, suliffeqarnerup suiaassutsinut agguataarneqarsimaneranik akiuiniarfiusussat, Naalakkersuisut toqqarpaat. Taakkua tassaapput ”akissarsiat assigiit”, ”ilinniartitaaneq suliffeqarnerlu”, ”Naligiissitaaneq assigiinngisitaartitsinerlu”, ”erninermut atatillugu sulinngiffeqarneq”, ”gender budgeting” aamma ”paasissutissat nalunaarsukkat”.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen oqarpoq;
”Suliffeqarfiit, oqartussat, ilinniarfiit suiaassutsinut isummersussasut Naalakkersuisut kaammattuutigaat. Angutinut arnanullu annertoqqatigiimmik pilerisaarisarneq qularutigineqanngila, suiaassutsit aappaanni ikinnerusoqarnera isummerfigineqassava? Angutit arnallu akornanni akissarsiat assigiinngissuteqarpat imaluunniit ajunngitsorsiassat assigiinngitsuuppat? Sulisussaqarniarnerup ilungersuutigineqarnerata nalaani tamanna tunngaviulluinnartumik apeqqutaavoq pisortaatitat, siulersuisut oqartussallu imminnut apeqqutigisariaqaraluagaat. Tamanna pillugu Naalakkersuisut suleqataarusuttorujussuupput, taamaalilluta ataatsimoorluta nutaamik pitsaanerusumillu siunnerfeqalersinnaaniassagatta”.
Paasissutissanik annertunerusunik piniarnermi attaveqarfigineqassaaq Naalak-kersuisup allattaa Jeanette L. Petersen, jalp@nanoq.gl, oqarasuaat: +299 26 54 76
'Suliffeqarnerup Suiaassutsinut agguataarnera - Periusissiatigut suliniutit'