AtuartigukImmami itisuumi aatsitassarsiorfimmik ingerlatsinermut tunngatillugu mianersuussiniarluni unillatsiarnissaq Naalakkersuisut akueraat
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Immami itisuumi aatsitassarsiorfimmik ingerlatsinermi mianersuussiniarluni unillatsiarnissaq pillugu Naalagaaffiit Peqatigiit siunnersuutaat Kalaallit Nunaata tapersersoraa, Naalakkersuisut danskit naalakkersuisuinut nalunaarutigaat. Unillatsiarnissaq sivisunerpaamik ukiunik marlunnik sivisussuseqassaaq aammalu immami itisuumi aatsitassarsiorfimmik ingerlatsineq pillugu piiaanermut tunngatillugu nunani tamalaani maleruagassat naammassinissaannut Naalagaaffiit Peqatigiit piffissaqartilissallugit.
Immami itisuumi aatsitassarsiorfimmik ingerlatsinermi mianersuussiniarluni unillatsiarnissaq1 , aamma nunarpassuit allat tapersersimasaat, taperserniarlugu Naalakkersuisut ulloq 7. marts 2024 ataatsimiinnerminni aalajangerput. Naalakkersuisut aalajangernerat qaammatip ingerlanerani kingusinnerusukkut Naalagaaffiit Peqatigiit Nunani tamalaani Immap naqqanut oqartussaasuinut, ISA-mut2 nalunaarutigineqassaaq.
Mianersuussiniarluni unillatsiarnerup kingunerisaanik immami itisuumi aatsitassarsiorfimmik ingerlatsinermi aatsitassarsiorluni misissuinissamut akuersissutit suli akuerisaapput, kisianni piiaanissaq unillatsiarnerup nalaani akuerineqarsinnaanani. Naalagaaffiit Peqatigiit Nunani tamalaani Immap naqqanut oqartussaasuisa, ISA-p, immami itisuumi aatsitassarsiorfimmik ingerlatsinermut maleruagassat ataatsimoortut 2025-p aallartinnerani naammassinissaat naatsorsuutigaa.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen oqarpoq:
”Naalakkersuisut aatsitassanik piiaanermut akuersaartumik inissisimapput, kisianni immami itisuumi aatsitassarsiorfimmik ingerlatsinermi avatangiisinut tunngasut ilisimaneqanngitsut nunanit tamalaanit isumanerluuteqarfigineqarnerat isumaqatigalugu. Nunatut immami pisuussutit inuussutigaagut, taakkulu immami avatangiisit minguitsuunissaat pinngitsoorneqarsinnaanngilaq. Taamaattumik mianersuussiniarluni unillatsiarnissaq tapersersorparput. Inerteqquteqarnerpiaq pillugu aalajangiisoqassappat, Aatsitassanut inatsit malillugu tamanna Inatsisartunut saqqummiunneqartussaassaaq. Naalakkersuisut immami itisuumi aatsitassarsiorfimmik ingerlatsineq aammalu immami aatsitassarsiorfimmik ingerlatsineq pillugit paasissutissat nalunaarusiallu attuumassutillit ingerlaavartumik ilisimatitsissutigisassavaat, taamaalilluta ataatsimoorluta mianersuussiniarluni unillatsiarnerup kingorna aqqutissaq oqallisigissallutigu”.
Tunngaviusoq
Nunarsuarmi sumiiffinni nunarsuarmioqatigiit ataatsimoorfiini immami itisuumi aatsitassarsiorfimmik ingerlatsineq maannakkut annertoorujussuarmik sammineqalerpoq. Immami itisuumi aatsitassarsiorfimmik ingerlatsineq tassaavoq immap itisuup naqqaniit aatsitassanik piiaanermik amerlanertigullu assaanermik suliaqarnerup ingerlasarnera. Immap itisuup naqqa nassuiarneqarpoq tassaasoq immap naqqa 200 meterinit itinerusuniittoq aammalu nunarsuarmi immap naqqata tamarmiusup pingajorarterutaasa marluk missaannik annertussuseqarluni. Immami itisuumi aatsitassarsiorfimmik ingerlatsinermut maleruagassat ataatsimoortut nunani tamalaani ujartorneqarput, tassami immami itisuumi aatsitassarsiorfimmik ingerlatsinermi avatangiisinut sunniutaasussat ilisimaneqanngimmata. Tamanna tunngavigalugu Naalagaaffiit Peqatigiit Nunani tamalaani Immap naqqanut oqartussaasuia maleruagassanik ataatsimoortunik suliaqarnissamik suliassaq tigusimavaa. Maleruagassat ataatsimoortut taakkua naammassineqarnissaasa saniatigut immami itisuumi aatsitassarsiorfimmik ingerlatsineq pillugu nalunaarusiat marluk Naalakkersuisut utaqqimaarpaat. Nalunaarusiap aappaa danskit naalakkersuisuinit inniminnerneqarsimavoq aammalu nalunaarusiap aappaa immikkut Kalaallit Nunaata imartaani aatsitassarsiorfimmik ingerlatsineq ukkataralugu Naalakkersuisunit inniminnerneqarluni.
Naalakkersuisut eqqumaffigeqqussavaat, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup apeqqutit avatangiisinut tunngasut akissuteqarfigisinnaammagit, mianersuussiniarluni unillatsiarnissaq pillugu suliaqarnermut Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik suliassaqarfimmut akisussaasuulluni.
Attaveqarfissaq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmi Naalakkersuisup allattaa Jeanette L. Petersen jalp@nanoq.gl oqarasuaat: 345206
_____________________________
1Precautionary pause
2International Seabed Authority